Свет
Зошто Израел го нападна Иран и зошто токму сега?

Американските разузнавачки агенции предупредија во февруари дека Израел, веројатно, ќе се обиде да нападне објекти кои се критични за нуклеарната програма на Иран оваа година.
Израелскиот премиер Бенјамин Нетанјаху повеќепати заговараше за воена опција за запирање на нуклеарната програма на Иран.
Според неодамнешните извештаи од американската разузнавачка заедница, Израел сега се обидува да ги искористи штетата предизвикана врз иранските постројки за производство на ракети и воздушната одбрана по израелското бомбардирање во октомври.
Во еден таков извештај се наведува и дека Израел, генерално, продолжува да се стреми кон поширока цел – да предизвика промена на режимот во Иран.
За Израел, Иран е егзистенцијална закана
За Израел, Иран е егзистенцијална закана: со години израелските власти тврдат дека Израел има најмногу да изгуби ако Иран, кој одбива да го признае правото на Израел да постои, развие нуклеарна бомба.
Израел и Иран со децении водат војна во сенка преку посредници и тајни операции. Техеран поддржува вооружени групи во регионот, кои директно се спротивставија на Израел, како што се Хезболах во Либан, Хамас во Газа и Хутите во Јемен.
Од почетокот на војната на Израел во Газа нападите од групите поддржани од Иран се интензивираа во знак на солидарност со Палестинците.
Домашни политички мотиви
Нетанјаху под притисок дома: спротивставувањето на новиот закон за задолжителна воена служба предизвика политички ќор-сокак, а израелскиот парламент, Кнесетот, одржа дискусии за можно распуштање, што би можело да доведе до предвремени избори, кои Нетанјаху би ги изгубил, според анкетите.
Парламентот го отфрли предлогот за распуштање во средата давајќи му на Нетанјаху повеќе време да ја реши кризата.
Зошто токму сега?
Се поставува и прашањето зошто Израел одлучи да нападне сега.
Нуклеарно-надзорниот орган на Обединетите нации во четвртокот усвои резолуција со која Иран е прогласен за виновен за кршење на обврските според Договорот за неширење оружје.
Техеран одговори со најава дека ќе ги забрза своите нуклеарни активности предупредувајќи дека „нема друг избор, освен да одговори“.
Ураниумот е нуклеарно гориво, кое, доколку е високо збогатено, може да се користи за производство на бомба. Иран вели дека неговата нуклеарна програма е само за мирни цели.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Калас го критикува Трамп: Европа не може сама да ја носи одговорноста за украинската војна

Шефицата на европската дипломатија, Каја Калас, изјави дека Европа не ја сноси единствената одговорност за прекинување на конфликтот во Украина и дека не може сама да го носи овој товар.
Калас со тоа одговори на неодамнешните изјави на американскиот претседател Доналд Трамп нагласувајќи дека е неопходна заедничка акција на сите сојузници за решавање на кризата.
„Европа не може сама да го носи товарот на војната во Украина“, рече Калас додавајќи дека ова е особено важно со оглед на ветувањата на Белата куќа да се залага за прекин на борбите.
Според „Политика“, во европските дипломатски кругови се проценува дека изјавите на Трамп алудираат на постепено повлекување на САД од украинскиот конфликт со префрлање на главната одговорност на европските членки. Како одговор, Калас истакна дека Вашингтон мора да остане во целосна солидарност со НАТО потсетувајќи дека САД се најголемиот и најважен сојузник на алијансата.
Оваа контроверзност следуваше по моментот кога украинскиот претседател Володимир Зеленски пристигна во Њујорк на 80-тото заседание на Генералното собрание на ОН, каде што се сретна и со претставници на Белата куќа. Трамп претходно изјави дека Украина, со поддршка од Европската Унија и финансиска помош од НАТО, е способна да ги врати изгубените територии.
Реагирајќи на таков став, портпаролот на Кремљ, Дмитриј Песков, оцени дека американскиот претседател дава нови изјави под влијание на „визијата на шефот на киевскиот режим“.
Фото: принтскрин
Свет
Трамп: Русија тоне, време е да запре

Американскиот претседател Доналд Трамп остро ја критикува економската и воената позиција на Москва во екот на војната во Украина велејќи дека руската економија е во катастрофална состојба и дека оди по ѓаволите, пренесуваат светските медиуми.
По средбата со турскиот претседател Реџеп Таип Ердоган, Трамп рече дека „Русија стави сè на коцка и не постигна речиси никакви територијални придобивки“. Според него, Москва потрошила милијарди на бомби, ракети и човечки животи, а исходот е незадоволителен. „Мислам дека е време да се запре. Навистина мислам“, рече тој.
Покана до Турција да се откаже од руската нафта
Трамп нагласи дека Анкара би можела да игра клучна улога во забрзувањето на крајот на конфликтот доколку се откаже од руската нафта. Според него, Турција има многу опции за снабдување со енергија за разлика од Унгарија или Словачка, кои немаат алтернативни извори преку морето.
Спротивставени процени за Москва
Додека Трамп предупредува дека руската економија се урива, официјална Москва испраќа разни сигнали. Гувернерката на Централната банка, Елвира Набиулина, неодамна истакна дека земјата продолжува да бележи умерен раст, а претседателот Владимир Путин нагласи дека западните санкции не ја скршиле руската економија предупредувајќи дека самата Европа се балансира на работ на рецесија.
Американско-руските контакти продолжуваат
И покрај жестоката реторика, дипломатските контакти меѓу Москва и Вашингтон не се прекинати. Рускиот министер за надворешни работи, Сергеј Лавров, и американскиот државен секретар, Марко Рубио, разговараа за можните начини за решавање на украинската криза во Њујорк надоврзувајќи се на договорите постигнати за време на претходните состаноци.
Фото: принтскрин
Свет
Запленети над 200.000 од популарните кукли Лабубу: содржеле токсини

Британската царина заплени фалсификувани играчки во вредност од повеќе од 3,5 милиони фунти, соопшти денес Канцеларијата за интелектуална сопственост (IPO) на земјата.
Од запленетите 259.000 играчки, 90 проценти биле копии од популарните кинески кукли Лабубу, кои станаа глобален хит оваа година благодарение на социјалните медиуми, објави „Скај њуз“.
Меѓу ризиците се задушување, присуство на токсични хемикалии и неисправни делови.
„Сериозни опасности за децата често се кријат зад атрактивно пакување“, предупреди Хелен Барнам од IPO.
Порано овој месец, 100 лажни кукли Лабубу беа пронајдени во две продавници во западен Лондон, кои беа оценети како потенцијално смртоносни поради делови што би можеле да предизвикаат задушување.
Огромното мнозинство од купувачите, 92 процента, се свесни дека на пазарот има фалсификувани играчки, но истражувањата на IPO покажуваат дека цената често им е поважна од безбедноста.
Седум од десет родители рекле дека пониската цена е нивниот најважен критериум, а само 27 проценти ја навеле безбедноста како приоритет.