Свет
Избори во Пакистан: води партијата на поранешниот премиер со поддршка од моќни генерали
Партијата на поранешниот пакистански премиер Наваз Шариф има мала предност на општите избори, покажаа првичните резултати објавени утринава, по одложувањето на броењето на гласовите што владата го припишува на исклучувањето на мобилните интернет услуги.
Изборната комисија на Пакистан ги објави резултатите за 47 од 265 места во Националното собрание, при што 17 места ќе добијат Пакистанската муслиманска лига на Шариф и 14 на приврзаниците на затворениот поранешен премиер Имран Кан.
Пакистанската народна партија на Билавал Буто Зардари, син на убиената премиерка Беназир Буто, освои 12 пратенички места. Остатокот отиде кај помалите партии или независни кандидати.
Бидејќи Кан е во затвор, а неговата партија Тахрик-е-Инсаф не може да учествува на изборите, неговите поддржувачи се кандидираа како независни.
Пред изборите, аналитичарите предвидуваа дека изборите нема да дадат јасен победник, што само ќе ги зголеми неволјите во земјата, која е погодена од милитантното насилство и длабоката економска криза во високополаризирано политичко опкружување.
Главната битка на овие избори се очекува да биде меѓу кандидатите на Кан, чија партија победи на последните избори, и партијата на трикратниот премиер Наваз Шариф.
Кан смета дека моќната пакистанска армија стои зад прогонот на неговата партија со цел нејзино целосно уништување. Аналитичарите и ривалите на Сахариф се убедени дека Шариф има поддршка од генералите.
Во 76-те години од постоењето на Пакистан како независна држава, војската директно или индиректно доминираше со оваа нуклеарна сила, но веќе неколку години тврдеше дека не се меша во политиката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Мадуро: САД измислуваат нова војна, носачот на авиони „Џералд Р. Форд“ испратен на Карибите
Претседателот на Венецуела, Николас Мадуро, ја обвини администрацијата на Доналд Трамп дека „измислува нова војна“, откако САД испратија воен носач на авиони во Карипското Море.
Според „Би-Би-Си“, најголемиот американски носач на авиони, USS Gerald R. Ford, кој може да носи до 90 летала, претставува значително зголемување на американското воено присуство во регионот.
Вашингтон тврди дека операцијата е насочена против трговијата со дрога и дека веќе се изведени неколку воздушни напади врз криминални организации. Трамп го обвини Мадуро дека е лидер на нaрко-картел, што венецуелскиот претседател категорично го негира.
Мадуро предупреди дека САД бараат нов вечен конфликт и потсети дека ветиле дека нема да се впуштаат во нови војни. Аналитичарите наведуваат дека толку големо воено присуство не е потребно за операции против дрога и го толкуваат како обид за притисок врз режимот во Каракас.
Американскиот Конгрес, вклучително и дел од републиканците, изразија загриженост за законитоста на нападите и овластувањата на претседателот, предупредувајќи дека Белата куќа ја узурпира контролата врз употребата на воена сила.
Свет
Трамп подготвува нови санкции за Русија
Администрацијата на американскиот претседател Доналд Трамп подготвила пакет нови санкции насочени кон клучни сектори на руската економија, подготвен за активирање доколку Владимир Путин продолжи да одолговлекува со завршувањето на војната во Украина, објави „Ројтерс“.
Според американски извори, санкциите би можеле да ги погодат рускиот банкарски сектор и инфраструктурата за транспорт на нафта. Идејата е да се зголеми економскиот притисок врз Москва, додека Вашингтон размислува и за користење замрзнатиот руски имот во корист на Украина.
Трамп, кој минатата недела за првпат по враќањето на функцијата воведе санкции против Русија, изјавил дека сака да се позиционира како „глобален мировник“, но призна дека прекинувањето на војната е потешко од очекуваното.
Во претходниот пакет, санкции беа воведени против нафтените компании „Лукоил“ и „Роснефт“, што доведе до раст на цените на нафтата за повеќе од два долара по барел.
Иако Трамп не е подготвен да ѝ испорача на Украина ракети Томахок, американските и европските партнери оценуваат дека Вашингтон зазема поцврст став кон Москва.
Според „Ројтерс“, Трамп најверојатно ќе почека неколку недели за да ја процени реакцијата на Русија пред да одлучи дали ќе ги активира новите санкции.
Свет
Турист загина кај Пантеонот во Рим
Јапонски турист, на околу 70 години, починал во Рим откако паднал кај Пантеонот, објави Анса.
Според информациите на италијанските медиуми, човекот не бил на самиот објект, туку на периферниот дел — кај оградениот археолошки простор што го опкружува Пантеонот. Тоа место има камен ѕид висок неколку метри, кој дели рамна површина (каде минуваат туристите) од понизок археолошки дел, нешто како ров.
Се претпоставува дека туристот се потпрел или се наведнал над ѕидот, изгубил рамнотежа и паднал во тој понизок простор, длабок околу 7 метри.
Спасувачките напори не успеале, а пожарникарите морале насилно да ја отворат влезната порта пред Пантеонот за да стигнат до телото.
Полицијата и локалните власти биле на местото на настанот, додека причината за несреќата сè уште не е утврдена.

