Свет
Израелските воени авиони ја нападнаа Сирија по нападот на припоениот Голан
Воени авиони на Израел ја нападнаа „терористичката инфраструктура“ во Сирија по нападот од Сирија врз припоениот Голан, објави израелската војска.
„Како одговор на нападот насочен кон Голан вчера (сабота), борбени авиони нападнаа терористичка инфраструктура во Сирија“, се вели во соопштението на израелската армија.
Во саботата израелската војска објави дека два проектила истрелани од Сирија паднале во ненаселените области на Голан, а се огласиле и сирените за предупредување за ракетен напад.
Израелската војска веќе изврши напад врз Сирија во петокот, откако беспилотно летало од оваа земја се урна во училиште во Еилат, јужен Израел.
Израел освои дел од Голан во Сирија за време на израелско-арапската војна во 1967 година, а во 1981 година ја анектира таа територија, која Обединетите нации не ја признаваат.
Размена на оган има и на границата меѓу Израел и Либан, каде што е активно либанското шиитско движење Хезболах.
Поради ова, Израел во саботата вечерта упати остри предупредувања до Хезболах да не си игра со оган и порача дека главниот град на Либан, Бејрут, може да ја доживее судбината на Газа.
Израел ја засили опсадата на Газа по нападот на палестинското исламистичко движење Хамас на 7 октомври, во кој, според Израел, загинаа 1.200 луѓе, а околу 240 беа киднапирани во палестинската енклава.
Здравствените власти во Газа соопштија дека повеќе од 11.000 луѓе, од кои многу жени и деца, се убиени откога Израел ја започна својата операција во малиот крајбрежен појас со 2,3 милиони луѓе.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Германија го суспендираше новиот извоз на воено оружје во Израел
Германија го суспендираше новиот извоз на оружје за Израел додека се справува со правните предизвици, според анализата на податоците на Ројтерс и извор близок до Министерството за економија.
Извор близок до министерството цитираше висок владин функционер дека работата за одобрување дозволи за извоз на оружје во Израел е стопирана поради правниот и политичкиот притисок од правните случаи кои тврдат дека таквиот извоз од Германија го прекршува хуманитарното право.
Министерството за економија соопшти дека нема и нема да има забрана за извоз на оружје во Израел, а одлуките се носат од случај до случај по внимателно разгледување, додавајќи дека меѓународното право, надворешната и безбедносната политика се клучни фактори во нивните оценки.
– Нема бојкот на германскиот извоз на оружје против Израел – изјави владиниот портпарол во средата, коментирајќи го извештајот.
Минатата година Германија одобри извоз на оружје за Израел во вредност од 326,5 милиони евра, вклучувајќи воена опрема и воено оружје, што е десеткратно зголемување во споредба со 2022 година, покажуваат податоците на Министерството за економија, кое одобрува извозни дозволи.
Но, годинава одобренијата паднаа, а од јануари до 21 август се дадени само 14,5 милиони евра, покажуваат податоците на Министерството за економија како одговор на пратеничко прашање.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.
Свет
Фолксваген сака да укине до 30.000 работни места во Германија и да ги намали инвестициите
Производителот на автомобили Фолксваген сака да укине до 30.000 работни места во Германија и да ги намали инвестициите, објави германскиот деловен портал Менаџер.
Како што се наведува, поддржувачите на радикалните мерки во менаџментот на Фолксваген очекуваат бројот на работници да се намали од сегашните 130.000 за речиси една четвртина.
Се најавува дека и Фолксваген поради заштеди ќе ги намали инвестициите за речиси 20 милијарди евра, а можни се отпуштања и во одделот за истражување и развој, пренесува Bild.