Свет
Израел до своите граѓани: Не патувајте на Малдивите

Малдивите најавија дека ќе забранат влез во земјата на сопствениците на израелските пасоши поради израелската војна против Хамас во Газа.
Претседателската канцеларија на островската држава во Индискиот Океан, позната по своите луксузни одморалишта и бескрајните плажи со бел песок, го објави ова вчера преку соопштение за медиумите.
Претседателот на Малдивите, Мохамед Муицу, одлучи да воведе забрана по препорака на владата, се вели во соопштението за печатот. Законите во земјата ќе бидат изменети и ќе биде формиран владин поткомитет кој ќе ги надгледува овие напори, соопшти кабинетот на претседателот, пренесува Си-Ен-Ен.
По веста за забраната, израелското Министерство за надворешни работи им препорача на Израелците да избегнуваат патување на островот, а „на израелските граѓани кои живеат во земјата им се советува да размислат за заминување, бидејќи ако западнат во неволја од која било причина, ќе им биде тешко да добијат помош“.
Претседателот Муицу, исто така, ќе назначи специјален пратеник за да ги процени потребите на Палестина и да воспостави кампања за собирање средства за „да им помогне на браќата и сестрите од Малдивија во Палестина“. Муицу ќе одржи и национален митинг под слоганот „Falastheenaa Eku Dhivehin“, што во превод значи „Малдиви во солидарност со Палестина“.
Веста доаѓа само неколку дена откако претседателот на Малдивите го осуди израелскиот воздушен напад врз бегалскиот камп во Рафа, во кој загинаа најмалку 45 Палестинци, а повеќе од 200 беа ранети.
„Заедно со владата и народот на Малдивите, повикувам на итен прекин на огнот, крај на насилството и непречен хуманитарен пристап“, објави тој тогаш на X.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Неколкумина загинаа откако патнички воз излета од шините во југозападна Германија

Неколку лица загинаа, а многу други се повредени откако патнички воз излета од шините во југозападна Германија, јави ДПА, повикувајќи се на безбедносни извори.
Спасувачките тимови се на местото на настанот и го пребаруваат возот и околината во потрага по патници.
Свет
Тројца мажи завршија во болница поради топлотен удар во Кипар

Тројца мажи се хоспитализирани денеска во Лимасол и Никозија во Кипар поради топлотен удар, при што еден од нив е во критична состојба.
Во исто време, двајца постари мажи, на возраст од 78 и 89 години, се хоспитализирани во Никозија во сериозна, но стабилна состојба. Уште еден 88-годишен пациент бил примен со симптоми на топлинска исцрпеност и е надвор од животна опасност.
Се апелира населението, особено до ранливите категории, да избегнуваат директна изложеност на сонце, да бидат внимателни и да внесуваат доволно течности, поради екстремно високите температури што зафатија делови од островот.
Свет
Фон дер Лајен се сретна со Трамп во обид да се договорат околу царините

Претседателката на Европската комисија, Урсула фон дер Лајен попладнево во шкотското место Трнбери ќе се сретне со американскиот претседател Доналд Трамп, во обид да биде постигнат трговски договор во пресрет на истекот на крајниот рок – 1 август за воведување на царини од 30 отсто за извозот на европски производи во САД.
Најавувајќи ја средбата во објава на Икс, Фон дер Лајен наведе дека со Трамп ќе „разговараат за трансатлантските трговски односи и за тоа како тие може да се одржат силни“.
Американската администрација веќе воведе царина од 50 отсто за увозот на челик и алуминиум од ЕУ, од 25 проценти за автомобили и автомобилски делови, како и основен данок од 10 отсто за поголемиот дел европски производи, со кои е опфатен околу 70 проценти од вкупниот извоз на Унијата во САД.
Средбата се одржува во услови на зголемени надежи во ЕУ дека Европската комисија би можела да постигне договор со Вашингтон по примерот на оној постигнат претходно неделава меѓу САД и Јапонија за просечна царина од 15 отсто на извозот на јапонски стоки на американскиот пазар.
ЕУ се надева дека, исто така, ќе постигне договор со САД за царинска стапка од 15 проценти, која би ја вклучувала и просечната царина од 4,8 отсто што ја плаќаат европските извозници на американскиот пазар уште од пред враќањето на Трамп во Белата куќа во јануари годинава.
Средбата доаѓа откако во четвртокот Европската комисија усвои пакет контрамерки на увозот на американски стоки во ЕУ, како одговор на најавената царина од САД од 30 отсто.
Портпаролот на ЕК за економска безбедност, трговија и царини Олоф Гил во четвртокот изјави дека фокусот на ЕУ е на постигнување на договор со САД за царините, а доколку тоа не се случи усвоените контрамерки ќе стапат во сила на 7 август.