Свет
Израел има нов план за Палестинците; Поранешен израелски премиер: Тоа би било логор

Поранешниот израелски премиер Ехуд Олмерт за „Гардијан“ изјави дека т.н. хуманитарен град за Палестинците, предложен од израелскиот министер за одбрана, Израел Кац, ќе биде концентрационен логор.
Тој призна дека Израел веќе извршил воени злосторства во Газа и на Западниот Брег, но верува дека овој потег ќе означи ескалација.
„Тоа би бил концентрационен логор. Жал ми е“, рече Олмерт.
Кац претходно потврди дека кога ќе влезат внатре, на Палестинците нема да им биде дозволено да заминат, освен во други земји. Тој ѝ нареди на војската да почне со изготвување оперативни планови за изградба на хуманитарен град врз урнатините на јужна Газа, првично сместувајќи 600.000 луѓе, а на крајот и целото палестинско население.
„Ако тие (Палестинците) треба да бидат депортирани во нов хуманитарен град, тогаш може да се каже дека тоа е дел од етничко чистење. Тоа би било неизбежното толкување на секој обид за создавање логор за стотици илјади луѓе“, предупреди Олмерт.
Тој не смета дека сегашната израелска кампања претставува етничко чистење бидејќи „евакуацијата на цивилите за да се заштитат од борбите е легална според меѓународното право, а Палестинците се враќаат во областите во кои воените операции се завршени“.
Проектот за таков хуманитарен град е поддржан од израелскиот премиер Бенјамин Нетанјаху, а одбивањето на Израел да се повлече од областа што Кац ја замислува за кампот е камен на сопнување во застојот во разговорите за договор за прекин на огнот, објавија израелските медиуми.
„Кога градат камп во кој планираат да исчистат повеќе од половина од Газа, неизбежната перцепција е дека Палестинците не се спасени, туку депортирани, протерани и отфрлени. Барем јас немам друга перцепција“, забележа Олмерт.
Израелската влада тврди дека планот е наменет за заштита на Палестинците. Израелците кои го опишаа планираниот хуманитарен град како концентрационен логор беа нападнати поради споредби со нацистичка Германија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.