Свет
Израел почна да ги вакцинира Палестинците, дури и на окупираниот Западен Брег

Израел почна да ги вакцинира Палестинците кои работат во таа земја, но и во населените места на окупираниот Западен Брег, два месеца по започнувањето на кампањата за имунизација во земјата.
Палестинските работници, кои преку неколку контролни пунктови преминаа во Израел, ја примија првата доза на вакцина на „Модерна“, а акцијата ја спроведе израелската воена агенција која ги координира владините операции на Западниот Брег, пренесе АП.
Околу 100.000 Палестинци на Западниот Брег работат во Израел.
Досега, Израел им дал 8,7 милиони дози на „Фајзер“ на своите граѓани (од вкупно 9,3 милиони), а повеќе од 40 проценти ги примиле обете дози на вакцината.
До денес, Израел им даде помал број вакцини на Палестинците на Западниот Брег и во Појасот Газа, што предизвика меѓународни критики, додаде АП.
Групите за човекови права и многу Палестинци велат дека Израел, како окупаторска сила, е одговорен за обезбедување вакцини за Палестинците, но Израел се повикува на прелиминарниот мировен договор од Осло во 90-тите и тврди дека нема таква обврска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Иран и Израел наскоро ќе постигнат мировен договор, објави американскиот претседател Доналд Трамп

Иран и Израел наскоро ќе постигнат мировен договор, објави американскиот претседател Доналд Трамп на својата социјална мрежа Truth Social.
– Иран и Израел треба да постигнат договор – и ќе постигнат. Исто како што успеав Индија и Пакистан да постигнат договор, напиша Трамп.
Тој додава дека во моментов се одржуваат многу разговори и состаноци.
– Наскоро ќе имаме МИР меѓу Израел и Иран! Работам напорно и никогаш не ги добивам заслугите, но тоа е во ред, луѓето разбираат. Да го направиме блискиот Исток повторно голем“, нагласува Трамп.
Свет
Ердоган повика на итно запирање на конфликтот меѓу Израел и Иран

Турскиот претседател Реџеп Таип Ердоган денеска телефонски разговарал со американскиот претседател Доналд Трамп, и повикал на „итна акција“ за да се спречи конфликтот меѓу Израел и Иран да го запали целиот регион.
– Претседателот Ердоган ја поздрави денешната изјава на претседателот Трамп за решавање на конфликтот меѓу Израел и Иран и ја нагласи потребата од итно дејствување за да се спречи катастрофа што би можела да го запали целиот регион, се вели во соопштението од кабинетот на турскиот претседател.
За време на телефонскиот разговор меѓу двајцата лидери, втор во последните 24 часа, „претседателот Ердоган потврди дека спиралата на насилство предизвикана од израелските напади врз Иран предизвика непоправлива економска и цивилна штета на двете страни и дека оваа опасна ескалација треба да се запре“, се додава во соопштението.
Ердоган, исто така, му соопштил на Трамп дека може да ја преземе улогата на медијатор за решавање на конфликтот, откако претходно и рускиот претседател Владимир Путин изрази потготвеност за посредување меѓу Израел и Иран.
Свет
Иран попладнево започна нов бран ракетни напади врз цели во Израел

Иран попладнево започна нов бран ракетни напади врз цели во Израел, објави иранската новинска агенција Фарс. Во Тел Авив и други локации во централен Израел се објавени тревоги, а сирените се огласија и на северот од земјата.
Израелското Министерство за национална безбедност ги повика граѓаните да останат блиску до засолништата и бункерите.
Секое движење на јавни места треба да се сведе на минимум и да се избегнуваат јавни собири. Овие наредби ќе останат во сила додека не се објави ново известување, соопштија израелските власти.
Ова е прв пат од почетокот на конфликтот Иран да изврши дневен напад врз Израел. Досега сите напади беа изведувани во текот на ноќта