Свет
Индија стана најнаселена земја во светот, дневно се раѓаат 86.000 бебиња

Индија ја престигна Кина како најнаселена земја во светот, според проценките на Обединетите нации, што е најзначајната промена во глобалната демографија досега.
Според проекциите на ОН, кои се пресметуваат врз основа на различни фактори, вклучувајќи ги и податоците од пописот и стапката на наталитет и смртност, Индија сега има население од 1.425.775.850 жители, што ја надминува Кина за прв пат, пишува Гардијан.
Тоа е, исто така, прв пат од 1950 година, кога ОН првпат почна да води глобална евиденција за населението, Кина да биде турната од првата позиција.
Намалувањето на населението во Кина е резултат на децениските строги закони за контрола на зголемениот наталитет во земјата, вклучително и воведувањето на политиката за едно дете во 1980-тите.
Тие вклучуваа казни, принудни абортуси и стерилизации. Иако првично беше многу ефикасна во контролата на населението, оваа политика стана жртва на сопствениот успех, а земјата сега се бори со стареењето на населението, што може да има сериозни економски импликации.
Дел од проблемот е што поради традиционалната предност за момчиња, политиката на едно дете доведе до огромна родова нерамнотежа. Сега мажите ги надминуваат жените за околу 32 милиони.
„Како може земјата да го зголеми наталитетот сега, со милиони исчезнати жени?“ прашува Меи Фонг, автор на книгата Едно дете.
Населението на Индија порасна за повеќе од милијарда од 1950 година. Иако растот сега е забавен, се очекува бројот на луѓе во земјата да продолжи да расте во текот на следните неколку децении, достигнувајќи го врвот од 1,7 милијарди до 2064 година. Денес, во Индија во просек се раѓаат 86.000 бебиња дневно, наспроти само 49.400 во Кина.
„Претходните проекции велеа дека ќе ја престигнеме Кина во 2027 година, така што тоа се случи четири години побрзо, главно поради нашата млада популација“, рече Пунам Мутреја, извршен директор на Фондацијата за население на Индија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Зеленски бара акција откако Москва изврши над 4.000 напади за една недела врз Украина

Украинскиот претседател Володимир Зеленски денеска ја повика меѓународната заедница да преземе акција, по една недела во која биле извршени повеќе од 4.000 руски воздушни напади.
„Москва си дозволува да ги ескалира своите напади, отворено искористувајќи го фактот што светот е фокусиран на обезбедување мир на Блискиот Исток“, напиша Зеленски на социјалната платформа Икс.
„Токму затоа не смее да се дозволи никакво слабеење на притисокот. Санкциите, царините и заедничките акции против купувачите на руска нафта – оние кои ја финансираат оваа војна – мора да останат на масата“, рече тој.
Според него, овој пристап може да го отвори патот кон траен мир за Европа.
„Светот може да го гарантира ова паралелно со мировниот процес на Блискиот Исток“, додаде украинскиот претседател.
Украина долго време повикува на санкции, вклучително и против Кина и Индија, кои се меѓу најважните купувачи на руска нафта.
Русија го интензивираше својот „воздушен терор против нашите градови и заедници, засилувајќи ги нападите врз нашата енергетска инфраструктура“, вели Зеленски. Тој рече дека само во изминатата недела Русија употребила повеќе од 3.100 беспилотни летала, 92 проектили и околу 1.360 едрилички бомби против Украина.
„Вчера во Костјантинивка, дете беше убиено во црква од воздушна бомба“, напиша Зеленски. Властите пријавија вкупно четири жртви во регионот Доњецк, вклучувајќи две во Костјантинивка, и две во регионот Керсон.
Според видеото објавено на интернет од Зеленски, кое прикажува пожари и уништување, Русија цела недела ги покривала со терор регионите Суми, Харков и Доњецк.
Украина сè уште ги бара дополнителните системи за противвоздушна одбрана ветени од сојузниците. „Ни треба силна поддршка од нашите партнери“, се наведува во видео апелот.
Свет
Израел е подготвен за итно ослободување на заложниците, вели Нетанјаху

Израелскиот премиер Бенјамин Нетанјаху денеска изјави дека „Израел е подготвен за итно примање на сите наши заложници“, според соопштение од Канцеларијата на премиерот, откако беа објавени информации дека ослободувањето на заложниците од Газа може да се случи уште вечерва.
Во меѓувреме, израелски функционер за јавниот радиодифузен сервис Кан изјави дека армијата очекува заложниците да се вратат во Израел до моментот кога американскиот претседател Доналд Трамп ќе пристигне во Израел утре во 9:20 часот наутро.
– ИДФ ги заврши подготовките за ослободување на заложниците и проценува дека сите ќе бидат ослободени пред пристигнувањето на Трамп, изјави изворот.
Медиумите на хебрејски јазик, повикувајќи се на неименувани израелски претставници, јавија дека Ерусалим добил индикации дека Хамас сака да го забрза ослободувањето на заложниците во Газа за вечерва, јави Тајмс оф Израел.
Свет
Папата Лав дели дека договорот за примирје во Газа даде искра на надеж во Светата земја

Папата Лав Четиринаесетти изјави дека договорот за примирје во Појасот Газа „даде искра на надеж во Светата земја“.
Тој ова го кажа во обраќање за време на неговата неделна молитва пред десетици илјади верници собрани на плоштадот Свети Петар во Ватикан.
– Ги охрабрувам сите вклучени страни храбро да продолжат по патот што го избраа, кон праведен и траен мир што ќе ги почитува легитимните аспирации на израелскиот и палестинскиот народ, изјави поглаварот на 1,4 милијарди католици во светот.
Агенцијата за цивилна заштита на Газа, која е под контрола на Хамас, соопшти дека повеќе од 500.000 лица се вратиле во градот Газа откако првата фаза на прекинот на огнот стапи во сила претходниот ден.
– Повеќе од половина милион лица се вратиле во Газа (Сити) од вчера, изјави Махмуд Басал, портпарол на цивилната одбрана, службата за спасување која работи под надлежност на Хамас.
На снимки објавени од светските медиуми се гледаат Палестинци кои се враќаат во градот Газа, многумина од нив веејќи палестински и египетски знамиња.