Свет
Иранскиот претседател: Израел ќе зажали, ќе одговориме силно

Претседателот на Иран, Масуд Пезешкијан, вети дека Иран ќе одговори легитимно и силно на израелските воздушни напади што утрото го погодија Техеран и неколку други градови.
Во пораката објавена на официјалната веб-страница на неговата канцеларија, Пезешкијан рече дека иранскиот народ и официјалните лица нема да молчат пред злосторството за кое рече дека го извршил Израел.
„Одговорот на Иран ќе го натера Израел да зажали за оваа глупава одлука“, рече Пезешкијан, повикувајќи ја нацијата „на единство, доверба, солидарност и консензус повеќе од кога било“.
Тој додаде дека е убеден дека иранскиот одговор ќе биде „поостар, помудар и посилен“.
Пезешкијан ги нарече нападите „брутална агресија врз Техеран и другите ирански градови“, истакнувајќи дека меѓу загинатите има „деца, жени, невини цивили, воени команданти и нуклеарни научници“. Тој го обвини Израел дека со своите постапки ги прекршува меѓународните обврски и ја потврдува „криминалната природа на нелегалниот ционистички режим“.
Тој рече и дека неговата влада ќе се погрижи секојдневниот живот на граѓаните да продолжи без прекин во услугите.
Израелските воздухопловни сили рано утрото нападнаа цели во Техеран и неколку други ирански градови. Државната новинска агенција ИРНА објави дека началникот на Генералштабот на иранските вооружени сили Мохамад Багери, командантот на Корпусот на гардата на Исламската револуција Хосеин Салами, командантот на Генералштабот на Катам ал-Анбија Голам-Али Рашид и командантот на воздухопловната единица на ИРГЦ Амир Али Хаџизаде се убиени во нападот во Техеран.
Иранскиот врховен лидер Али Хамнеи по нападот рече дека Израел „мора да чека строга казна за неговото злосторство против Иран“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Украина возвраќа на Унгарија: На тројца воени функционери им е забранет влез

Украина им забрани на тројца високи унгарски воени функционери да влезат на нејзина територија, реагирајќи на слична одлука на Будимпешта, што означува нова епизода во затегнатите односи меѓу двете соседни земји.
Украинскиот министер за надворешни работи Андриј Сибиха ја потврди мерката на платформата Икс. „Воведовме забрана за влез на тројца високи унгарски воени функционери“, напиша тој, додавајќи дека ова е одговорот на Украина на потезите на Будимпешта.
„Секој чин на непочитување од Унгарија ќе добие соодветен одговор, особено непочитување кон нашата армија“, рече украинскиот министер.
Односите дополнително се влошија во август кога Унгарија, еден од ретките сојузници на Москва во Европа, го прогласи високиот украински офицер Роберт Бровди, член на унгарското малцинство во Украина, за персона нон грата. Будимпешта го обвини за оркестрирање на нападот врз рускиот нафтовод „Дружба“, со што се прекинаа руските испораки на нафта.
фото: принтскрин
Свет
(Видео) Скандал во Генералното собрание: стотици дипломати му го свртеа грбот на Нетанјаху, ја напуштија салата

Премиерот на Израел, Бенјамин Нетанјаху, се обрати на денешното продолжение на сесијата на Генералното собрание на ОН, а пред говорот, стотици дипломати ја напуштија салата.
Кога Нетанјаху се качи на говорницата, неколку стотици дипломати од целиот свет, решија да испратат јасна и директна порака, пренесуваат медиумите.
Delegates walk out in protest as Israeli PM Benjamin Netanyahu – who has an ICC arrest warrant against him for alleged war crimes in Gaza – arrived at the podium to address the #UNGA80 assembly. pic.twitter.com/1oXNP14wPk
— Al Jazeera English (@AJEnglish) September 26, 2025
Во исто време, израелските дипломати кои останаа во салата се обидоа со аплауз да го одвлечат вниманието на присутните во салата, како и на публиката која го следеше Генералното собрание преку ТВ екрани или преноси во живо преку веб-страницата на ОН.
Претседавачите на Генералното собрание на Обединетите нации се обидоа да воспостават ред и мир во салата, но тоа не беше можно.
На овој начин, бројни дипломати го искажаа своето мислење за израелската политика на Блискиот Исток и со заминувањето, јасно ставија до знаење дека не сакаат да го слушаат обраќањето на израелскиот премиер, според написите.
Фото: принтскрин
Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.