Свет
Иранските власти спречиле заговор за атентат на командантот на силите Кудс

Иранските власти спречиле заговор за атентат на командантот на силите Кудс на Исламската револуционерна гарда, Касем Солејмани, при што уапсени биле тројца заговорници, објави иранската новинска агенција „Фарс“.
Според иранските медиуми, генерал-мајорот Солејмани не бил повреден. Обидот да се изврши атентат врз Солејмани бил регионален заеднички израелско-арапски заговор, а сѐ уште нема информации за идентитетот и националноста на уапсените.
Според Хусеин Таеб, шеф на разузнавачката служба на ИРГЦ, планот на групата терористи бил кроен неколку години. Заговорниците планирале да постават меѓу 350 и 500 килограми експлозив под собраниската сала на верски настан во Керман, југоисточен Иран, на кој Солејмани требаше да се појави во септември. Заговорниците се уапсени пред да може да ја извршат операцијата.
Солејмани е познат по учеството во операциите за помош на ирачките и сириските сили вклучени во борбата против Исламската држава. Тој во неколку наврати ги обвинуваше САД за соработка со терористите за постигнување на своите регионални цели. Во 2015 година тогашниот директор на ЦИА, Џон Бренан, изрази загриженост во врска со вмешаноста на Солејмани во војната против ИД во Ирак тврдејќи дека неговото присуство во земјата претставува значителна закана за американските контратерористички напори.
Претходно неделава, Солејмани даде интервју за иранската телевизија откривајќи дека тој и Хасан Насралах, актуелниот генерален секретар на либанското политичко движење и милиција Хезболах, едвај избегнале напад од израелски дронови за време на војната во 2006 година меѓу Израел и Либан.
Единиците на ИРГЦ се соочија со повеќе терористички напади врз нејзините членови во последните години, вклучително и напад со автомобил бомба во февруари 2019 година, во кој загинаа над дваесетина војници на ИРГЦ. Иран ги обвини регионалните противници во Заливот, како и Израел и САД, за насилството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Синот на Бајден: Апчињата за спиење се виновни за дебаклот на дебатата за Трамп

Хантер Бајден во ново интервју изјави дека неговиот татко, поранешниот американски претседател Џо Бајден, земал апче за спиење пред неговата прва претседателска дебата со Доналд Трамп минатиот јуни, што според него придонело за лошите резултати на Бајден.
„Ќе ви кажам точно што се случи во таа дебата“, му рече Хантер Бајден на независниот новинар Ендру Калаган во опсежно интервју објавено во понеделник, точно една година откако Џо Бајден ненадејно ја повлече својата кандидатура за претседателските избори во 2024 година.
„Буквално леташе низ целиот свет… Има 81 година, е уморен како куче, му даваат апче за да му помогне да заспие, а потоа оди на сцената и изгледа како да го заслепило светло од автомобил“, рече Хантер Бајден.
Настапот на Џо Бајден за време на дебатата беше обележан со нејасни, неповрзани одговори и рапав, низок глас што ги изненади гледачите и веднаш покрена прашања за неговата способност да отслужи уште еден мандат како претседател.
Нешто повеќе од еден месец по дебатата, Бајден објави дека се откажува од трката, отворајќи го патот за потпретседателката Камала Харис да ја обезбеди претседателската номинација на Демократската партија.
Неговата кампања во тоа време тврдеше дека неговиот рапав глас е резултат на „настинка“.
Самиот Бајден подоцна го припиша својот слаб настап делумно на неговиот зафатен распоред за патувања во неделите пред дебатата со Трамп. Тој патуваше во Европа двапати во јуни, но се врати во Вашингтон речиси две недели пред дебатата.
Хантер Бајден е првиот член од внатрешниот круг на Бајден кој јавно ја поврза употребата на апче за спиење со настапот на неговиот татко на дебатата.
Фото: принтскрин
Свет
Харвард ја тужи администрацијата на Трамп

Универзитетот Харвард побара од федерален судија да ѝ наложи на администрацијата на Трамп да врати околу 2,5 милијарди долари откажани федерални грантови и да ги запре напорите за намалување на финансирањето на престижниот универзитет.
Но, адвокат од администрацијата на Трамп ѝ рече на судијката дека откажаните грантови го одразуваат приоритетот на владата да не испраќа пари до институции кои практикуваат антисемитизам.
„Харвард им даде приоритет на протестите на кампусот пред истражувањата за рак“, рече Мајкл Велчик, виш адвокат во Министерството за правда. Тој ѝ рече на судијката дека таа воопшто не треба да го разгледува случајот, велејќи дека прашањето е прашање за Федералниот суд за финансиски спорови.
Сослушувањето пред окружниот судија на САД, Алисон Бароуз, во Бостон траеше повеќе од два часа, но заврши без пресуда.
Случајот означува клучен момент во ескалацијата на конфликтот меѓу Белата куќа и Харвард, кој е критикуван од администрацијата откако во април ги отфрли барањата за промена на раководството, практиките за вработување и приемот на студенти.
Универзитетот со седиште во Масачусетс, вели дека стотици истражувачки проекти, вклучувајќи ги и оние поврзани со ракот, заразните болести и Паркинсоновата болест, се во опасност освен ако судијата не пресуди дека намалувањето на финансирањето е нелегално.
Најстариот и најбогат универзитет во Америка стана централен фокус на кампањата на администрацијата за користење на контролата врз грантовите за наметнување промени на американските универзитети, за кои Трамп вели дека се жаришта на антисемитизам и радикална левичарска идеологија.
Стивен Лехотски, адвокат на Харвард, рече дека владата направила големи намалувања под маската на борба против антисемитизмот, но не успеала да идентификува врска меѓу нив.
„Администрацијата не ги зела предвид пациентите, пошироката јавност и штетата што може да ја предизвика намалувањето на финансирањето за истражување“, рече Лехотски пред судот.
Фото: принтскрин
Регион
Трагедија во БиХ: едногодишно дете се удави во базен пред куќа

Едногодишно дете се удави вчера во базен во дворот на семејна куќа во Козарац во близина на Приједор.
Според Аваз, несреќата се случила вчера попладне околу 17:30 часот.
На местото на настанот биле и членови на Полициската управа во Приједор, кои утврдиле дека нема елементи на кривично дело.
Фото: принтскрин