Свет
Иран ги предупреди пилотите да го избегнуваат воздушниот простор; САД: Очекуваме напад врз Израел

Иран издаде известување до пилотите и авиокомпаниите да го избегнуваат неговиот воздушен простор по постојаните закани на иранските власти за напад на Израел, пишува Волстрит Журнал.
Соопштението на Иран дојде откако американскиот државен секретар Ентони Блинкен им кажал на министрите за надворешни работи на Г7 вчера во телефонски разговор дека Техеран може да го нападне Израел во рок од 24 до 48 часа, според двајца дипломати запознаени со разговорот.
Блинкен не прецизираше во каква форма може да биде нападот.
Израел вели дека е подготвен, Америка вели дека ќе го брани Израел
Израел соопшти дека е подготвен да се брани и да одговори на секој одмазднички напад. Вашингтон изјави дека ќе помогне во одбраната на Израел. Американските власти соработуваат со нивните меѓународни партнери за да се обидат да ги смират тензиите на Блискиот Исток по предупредувањата на Иран и проиранските милиции дека ќе го нападнат Израел по атентатот на главниот политички лидер на Хамас Исмаил Ханија во Техеран минатата недела.
Известувањето за воздушниот простор на Иран значи дека комерцијалната и цивилната авијација се држат настрана без да се наведат детали за тоа што би можело да следи.
Во 2020 година, Иран собори украински патнички авион, при што загинаа сите 176 луѓе во него, неколку часа откако Америка го уби највисокиот ирански генерал, генерал Касем Сулејмани. Иран го нарече инцидентот ненамерен.
Германската авиокомпанија Луфтханза вчера објави дека ја продолжува суспензијата на сите летови до Техеран, Тел Авив и Бејрут до 12 август.
Израел ја стави својата војска во состојба на готовност додека американските власти работат на подготовка на воени ресурси и регионални партнери за да спречат напад за кој некои стравуваат дека може да биде поширок и покомплексен од нападот во Иран во април.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Долгиот прекин на струјата во Шпанија и Португлија предизвика хаос

Сообраќаен хаос низ Шпанија и Португалија предизвика долгиот прекин на електричната енергија. Прекинот на струја зафати големи области од овие две држави, а меѓу погодените градови се Барселона, Лисабон, Мадрид, Порто и Севиља. Делови од Баскија исто така накратко беа погодени од прекинот.
Хаос има на метри станиците, улиците, аеродромите, семафорите се исклучени. Оневозможена е интернет и мобилната мрежа, банкоматите за плаќања, лифтовите се заглавени. Не се во функција ниту полначите за електрични возила и бензинските пумпи.
Градоначалникот на Мадрид, Хозе Луис Мартинез-Алмеида ги повика граѓаните да останат таму каде што се и да го намалат движењето на апсолутен минимум.
„Ги замолувам сите жители на Мадрид да излегуваат што е можно помалку и, ако воопшто е можно, да останат таму каде што се во моментов. Сакаме да ги задржиме сите патишта слободни“, рече Мартинез-Алмеида во видео пораката објавена на социјалните мрежи.
Говорејќи од интегрираниот центар за вонредни ситуации во Мадрид, тој рече дека покрај исклучувањето на семафорите, морале да ги затворат и тунелите на некои автопати.
Мрежите на мобилната телефонија исто така беа погодени.
Новинарите на АФП од Мадрид и Барселона известија дека луѓето излегле на улиците, држејќи ги мобилните телефони високо во воздухот за да се обидат да фатат сигнал.
Според агенцијата, многумина ги следеле вестите преку радио, а не преку мобилни уреди.
Се појави и видео од жичница во Билбао, Шпанија, каде луѓето морале да слезат и да продолжат пеш.
Gente bajando a pie del funicular de Artxanda en Bilbao#apagon pic.twitter.com/PthoY01CNq
— Javi Regalado (@djobi71) April 28, 2025
Португалската авиокомпанија ТАП Ер Португалија ги предупреди патниците да не се упатуваат кон аеродромите до понатамошно известување.
Во соопштението објавено на својата Фејсбук страница, ТАП наведува дека некои летови не се одвиваат според распоредот и бара од патниците да чекаат нови информации.
Пристигнуваат бројни извештаи дека многу граѓани на Шпанија и Португалија останале без вода.
Неколку луѓе изјавија за „Скај њуз“ дека забележале панично купување вода и други потреби во супермаркетите во Лисабон.
Свет
Белата куќа: Трамп сака трајно, а не привремено примирје

Американскиот претседател, Доналд Трамп, јасно стави до знаење дека сака трајно примирје во Украина, а не привремен прекин на непријателствата, изјави портпаролката на Белата куќа, Каролин Левит.
Таа зборуваше откако рускиот претседател Владимир Путин објави тридневно примирје од 8 до 11 мај, по повод 80-годишнината од крајот на Втората светска војна.
„Претседателот сака да види трајно примирје што ќе ги запре убиствата и крвопролевањето“, рече Левит.
Таа додаде дека Трамп останува оптимист за можноста за постигнување договор, но дека е сè повеќе фрустриран од лидерите на двете страни, кои, како што рече, мора да седнат на маса и да преговараат за излез од конфликтот.
Левит, исто така, нагласи дека недамнешната средба меѓу Трамп и украинскиот претседател Володимир Зеленски во базиликата Свети Петар покажала дека Трамп сака повторно да биде претседател кој носи мир, како што беше во неговиот прв мандат.
Свет
Пристигна првата реакција на Украина на најавата на Путин за тридневно примирје

Украина реагираше на предлогот на Русија за тридневно примирје следниот месец.
Министерот за надворешни работи Андриј Сибиха на платформата „Икс“ порача дека ако Русија навистина сака мир, борбите треба веднаш да престанат.
„Зошто да чекате до 8 мај? Ако огнот може да престане сега и да продолжи без прекин најмалку 30 дена, тоа би покажало дека примирјето е реално, а не само заради парада“, напиша Сибиха.
Тој додаде дека Украина е подготвена да поддржи траен, стабилен и целосен прекин на огнот, кој, како што нагласи, постојано го предлага.
Рускиот претседател Владимир Путин претходно објави таканаречен хуманитарен прекин на огнот од 8 мај до полноќ на 11 мај по повод 80-годишнината од крајот на Втората светска војна, соопшти Кремљ.