Иранскиот заменик-министер за надворешни работи, Абас Арагчи, ги негира обвиненијата дека Исламската Република е вмешана во нападот врз танкерите за нафта на ОАЕ – наводи што претходно беа изнесени од советникот за национална безбедност на САД, пренесува „Спутник“.

Тој ги нарече тврдењата смешни и ги обвини советникот за национална безбедност, Џон Болтон, и другите „хушкачи на војна“ за заговор против Иран.

Болтон претходно тврдеше дека морските мини вклучени во нападот на неколку нафтени танкери во близина на пристаништето на Обединетите Арапски Емирати речиси сигурно потекнуваат од Иран, без да се елаборира на какви информации се базираат неговите тврдења. Два саудиски, еден норвешки и еден танкер на ОАЕ беа оштетени во саботажа во ексклузивната економска зона на ОАЕ во Оманскиот Залив во мај.

САД цело време тврдат дека Иран, или неговите „посредници”, стојат зад инцидентот без да обезбедат докази за тврдењата. Во исто време, ниту ОАЕ ниту Саудиска Арабија, чии танкери беа оштетени, го обвинија Иран за несоодветно однесување.

Арагчи, понатаму вели дека некои луѓе се обидуваат да ги втурнат САД во војна со Иран во обид да ги постигнат своите цели. Тој истакна дека Иран е подготвен за војна со САД, но повеќе би сакал да почне дијалог.

„Ние сме целосно подготвени за двете сценарија. Војната ќе биде катастрофа за сите во регионот. Се надеваме дека во Вашингтон ќе преовлада мудроста, дека нема да ја направат најголемата грешка во регионот досега, но ние сме целосно подготвени и за тоа сценарио”, рече Арагчи.

Тој, исто така, ја повтори изјавата на американскиот претседател Доналд Трамп дека САД не сакаат војна со Иран, наведувајќи дека Вашингтон прво мора да преземе чекори за да го докаже ова тврдење.

Арагчи, исто така, се осврна на прашањето за неодамнешното зголемување на американските воени сили на Блискиот Исток, кое, како што истакна, може да создаде нови предизвици во регионот. Тој рече дека Иран сè уште чека одговор од државите од Заливот на предлогот за потпишување договор за ненапаѓање. Заменик-министерот призна дека процесот на разгледување на предлогот може да потрае, но изрази надеж за позитивен одговор на тоа.

„Иран е целосно подготвен да ги преземе сите мерки за градење доверба за да воспостави добри, конструктивни и пријателски односи со секоја земја во регионот”, рече Арагчи.