Свет
Ирска стјуардеса во Дубаи обвинета за „консумација на алкохол“: И го уништиле пасошот

Против ирска стјуардеса Тори Тови во Обединетите Арапски Емирати, поднесени се повеќе кривични пријави, меѓу кои и „обид за самоубиство“ и „консумација на алкохол“. Како што јавува Би-би-си, властите во Емиратите и го уништиле пасошот. И ирската влада се вклучи во случајот преку дипломатски канали.
Како што јави Би-би-си, Тови се наоѓа во Дубаи, најголемиот град на Обединетите Арапски Емирати (ОАЕ). Нејзе ѝ помага адвокат и застапник за човекови права, кој за медиумите изјави дека 28-годишната девојка е „уништена и исцрпена“, но „се надева дека наскоро ќе може да го напушти Дубаи“.
Рада Стирлинг, која ја води групата Затворени во Дубаи, рече дека разговарала со Тови утринава и дека „работите сè уште се движат“.
„Ирската влада дејствуваше во рекордно време, обично не гледаме дека дејствуваат толку брзо“, рече таа.
Адвокатот, исто така, рече дека Тови оттогаш била контактирана од единицата за поддршка на жртви на полицијата во Дубаи.
„Очекувам дека со тој дипломатски притисок можеби ќе успееме да ја вратиме дома дури и пред судењето следната недела, но секако треба да планираме дека може да помине многу лошо и таа да заврши со затворска казна“, изјави адвокатот за Би-би-си Њуз.
Стирлинг претходно изјави дека Тови била обвинета за консумирање алкохол и обид за самоубиство. „Ирската влада со право стои зад нас во обидот да ја натера полицијата на ОАЕ да се откаже од случајот против неа“, рече таа.
Би-би-си се обрати до владата на ОАЕ за коментар за случајот, но сè уште нема добиено одговор.
Министерството за надворешни работи соопшти дека е запознаено со случајот и дава конзуларна помош.
Стирлинг рече дека Тови не може да си дозволи адвокат, „што и ја отежна ситуацијата уште повеќе“. Таа рече дека дури и ако Тови биде прогласена за невина, правниот процес може да потрае „месеци и месеци“, но семејството е оптимист дека меѓународниот притисок ќе помогне.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Стармер: Путин го саботира мирот, зградата на Британскиот совет во Киев беше бомбардирана

Британскиот премиер Кир Стармер го обвини рускиот претседател Владимир Путин дека „го саботира мирот“ откако руските сили испукаа две ракети кон зградата на Британскиот совет во Киев утрово.
Премиерот потврди дека канцелариите на Британскиот совет биле погодени и додаде дека сочувствува со „сите погодени од бесмислените руски напади врз Киев“.
„Путин убива деца и цивили и ги саботира надежите за мир. Ова крвопролевање мора да заврши“, напиша Стармер на платформата X.
Британскиот совет, кој нуди програми на англиски јазик за Украинците во главниот град, соопшти дека неговите канцеларии се „сериозно оштетени“ и дека еден ноќен чувар е повреден. Во јуни, Москва им забрани на граѓаните да работат со институцијата, тврдејќи дека тоа е параван за британски шпиони.
Зградата во која се наоѓа делегацијата на Европската Унија во Киев, исто така, беше тешко оштетена во нападите, според официјални лица на ЕУ, кои го нарекоа нападот „намерен“.
Русија испали вкупно 629 дронови и 31 ракета, при што загинаа најмалку 15 лица, вклучувајќи четири деца, јавуваат светските медиуми.
Русија тврди дека во синоќешните напади гаѓала воени објекти користејќи хиперсонични ракети.
Фото: принтскрин
Регион
15-годишно девојче загина по удар од автобус во Земун, повредени се неколку лица

15-годишно девојче загина денеска во сообраќајна несреќа во Земун, додека четири лица се пренесени во болница, меѓу кои бремена жена и шестгодишно дете, пишуваат медиумите во регионот.
Девојчето што починало било удрено од автобус, по што се судриле три патнички возила, според Танјуг.
Според сведоците, жена трчала преку улицата, а возачот на автобусот се обидел да ја избегне, па всушност преминал на тротоарот, каде што го удрил детето.
И јавното комунално претпријатие GSP се огласи по повод тешката сообраќајна несреќа во Земун во која девојче (15) почина кога беше удрено од автобус а неколку лица беа повредени, стои во написите на српските медиуми.
„Денес околу 12:20 часот, на улицата Цар Душан на број 136, се случи тешка сообраќајна несреќа со смртоносен исход и неколку полесни повреди. Во оваа несреќа учествуваа неколку патнички возила и автобус од линија 18 што ја напушти гаражата и се упати кон терминалот за да се вклучи во сообраќајот. Околностите под кои се случи оваа сообраќајна несреќа се уште се непознати и полицијата работи на нивно утврдување“, изјави GSP.
Како што пишува „Телеграф“, автобусот се обидел да избегне жена која трчала преку улицата надвор од пешачкиот премин, поради што свтел на тротоарот, удирајќи го девојчето кое завршило под возилото. На патот, тој удрил во неколку паркирани автомобили, а потоа се забил во порта на куќата.
Телото на девојчето било извлечено од под автобусот од пожарникари, а екипите за итни случаи можеле само да констатираат смрт. Во несреќата биле повредени десет лица, меѓу кои деветмесечна бремена жена, мајка и шестгодишно дете, 74-годишна жена.
Фото: принтскрин
Свет
Фон дер Лајен: Путин мора да седне на преговарачка маса, Европа ќе ја одигра својата улога

Претседателката на Европската комисија, Урсула фон дер Лајен, денес разговараше телефонски со украинскиот претседател Володимир Зеленски и американскиот претседател Доналд Трамп по веста за комбинираниот руски напад синоќа, во кој беше погодена и Делегацијата на ЕУ во Украина, меѓу другите цивилни цели.
„Тукушто разговарав со украинскиот претседател Володимир Зеленски, а потоа и со американскиот претседател Доналд Трамп по масовниот напад врз Киев, кој ја погоди и нашата канцеларија во ЕУ“, напиша фон дер Лајен на платформата X.
Таа рече дека рускиот претседател Владимир Путин мора да започне преговори со Киев.
„Путин мора да седне на преговарачка маса. Треба да обезбедиме праведен и траен мир за Украина со цврсти и веродостојни безбедносни гаранции“, истакна претседателката на Европската комисија.
Таа додаде дека Европа „целосно ќе ја одигра својата улога“.
„Нашиот одбранбен инструмент SAFE, на пример, ќе биде важен за зајакнување на храбрите украински вооружени сили“, истакна фон дер Лајен.
Таа претходно објави дека руските напади врз Киев, во кои загинаа 18 лица во текот на ноќта, меѓу кои и четири деца, „само ќе го зајакнат единството на Европа и пркосот на Украина“.
Фото: принтскрин