Свет
Истражување: Најчести симптоми на Ковид-19 кај оние што се вакцинирани

Како што се менува коронавирусот, така се менуваат и симптомите што ги предизвикува оваа болест кај луѓето. Губењето мирис, на пример, порано беше еден од значајните показатели за инфекција со коронавирус, но сега е деветтиот најчест симптом кај оние што имаат коронавирус и кои не се вакцинирани.
Исто така, постојат разлики во тоа како болеста се манифестира кај оние што примиле една или две дози од вакцината, покажа британската студија ZOE COVID-19. Иако постојат сличности во симптомите помеѓу оние што се вакцинирани и оние што не се вакцинирани, постојат некои разлики.
Симптоми кај оние што не се вакцинирани
Според студијата, овие се моментно најчестите симптоми на инфекција со коронвирус кај оние што не се вакцинирани:
1) Главоболка
2) Болки во грлото
3) Течење на носот
4) Температура
5) Постојана кашлица
Така, губењето на мирисот веќе не е меѓу првите пет најчести симптоми. недостигот на воздух сега е, на пример, на триесеттото место.
Симптоми кај оние што примиле една доза вакцина
1) Главоболка
2) Течење на носот
3) Болки во грлото
4) Кивање
5) Постојана кашлица
Симптоми кај оние што ги примиле двете дози вакцина:
1) Главоболка
2) Течење на носот
3) Кивање
4) Болки во грлото
5) Губење мирис
Треба да се напомене дека симптомите кај оние што ги примиле двете дози вакцина биле пократки, односно имале помалку сериозни симптоми на болеста.
„Постојат неколку причини зошто симптомите може да се променат“, наведуваат научниците што работеле на студијата.
„На пример, сега голем број заболени се помлади луѓе за кои знаеме дека имаат поблаги симптоми. Исто така, оние што се вакцинирани имаат помалку сериозни симптоми“, додаваат тие.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нуклеарните инспектори на ОН пристигнаа во Иран за прв пат по израелскиот напад

Нуклеарните инспектори на ОН се вратија во Иран за прв пат откако Иран ја прекина соработката со агенцијата по израелските напади врз нејзините нуклеарни постројки, објавија денес иранските државни медиуми.
Иранскиот министер за надворешни работи, Абас Аракчи, им рече на пратениците дека Техеран сè уште не постигнал договор за тоа како да ја продолжи целосната соработка со нуклеарното надзорно тело на ОН, објави парламентарната новинска агенција ICANA.
Тој рече дека инспекторите ќе ја следат размената на гориво во иранската нуклеарна централа Бушер, според извештајот.
Коментарите на Аракчи дојдоа еден ден откако Иран се сретна со Франција, Велика Британија и Германија за да се обиде да ги оживее разговорите за неговата нуклеарна програма, за која западните сили велат дека е насочена кон развој на бомба, додека Исламската Република вели дека е насочена кон цивилни проекти.
Иранските власти велат дека на земјата ѝ е потребен нов договор за соработка со Меѓународната агенција за атомска енергија (МААЕ) по 12-дневната воздушна војна со Израел во јуни, на која брзо ѝ се придружија и САД. Во јуни, иранскиот парламент донесе закон со кој се суспендира соработката со МААЕ и се бара сите идни инспекции да бараат зелено светло од Врховниот совет за национална безбедност на Техеран.
Советот ја одобри посетата на инспекторите, но „нацрт за нов начин на соработка со МААЕ не е финализиран ниту одобрен“, рече Аракчи, според ICANA. „Полнењето гориво на нуклеарниот реактор Бушер мора да се изврши под надзор на инспектори на меѓународната агенција“, додаде тој.
Шефот на МААЕ, Рафаел Гроси, изјави за Фокс њуз дека „првиот тим инспектори на МААЕ се врати во Иран“, но дека агенцијата сè уште дискутира за тоа како да ги продолжи инспекциите. По нападите во јуни, Иран исто така тврдеше дека објектите повеќе не се безбедни за инспекторите.
фото: принтскрин
Европа
Кремљ: Ги поддржуваме мировните напори на Трамп, но ги отфрламе гаранциите на ЕУ за Украина

Кремљ на денешниот редовен брифинг за медиумите изјави дека ги смета напорите на САД за постигнување мир во Украина за „многу важни“ и дека тие би можеле да помогнат во решавањето на долготрајниот конфликт. Сепак, портпаролот Дмитриј Песков јасно стави до знаење дека Москва има негативен став кон европските предлози за безбедносни гаранции за Украина.
Песков го повтори долгогодишниот став на Русија дека не треба да има распоредени трупи од земјите-членки на НАТО на украинска територија. На прашањето за можни мировни разговори на високо ниво, тој рече дека ваквите состаноци мора внимателно да се подготвуваат за да бидат ефикасни.
По извештаите дека руските напади во текот на ноќта биле насочени кон украинската енергетска инфраструктура, Песков рече дека Русија ги таргетирала само воените и воено поврзаните цели.
Песков, исто така, објави дека се во тек интензивни подготовки за претстојната посета на рускиот претседател Владимир Путин на Кина.
Путин ќе присуствува на самитот на Шангајската организација за соработка, кој ќе се одржи од 31 август до 1 септември во кинескиот пристанишен град Тјенџин. Според Песков, на самитот ќе учествуваат повеќе од 20 светски лидери.
Потоа, Путин ќе го посети Владивосток, голем руски пристанишен град во близина на кинеската и севернокорејската граница, на 5 септември.
фото: принтскрин
Свет
Папата апелира за траен прекин на огнот во Газа и ослободување на заложниците

Папата денес упати силен апел до глобалната заедница да го прекине речиси двегодишниот конфликт меѓу Израел и Хамас повикувајќи на траен прекин на огнот, ослободување на заложниците во Газа и обезбедување хуманитарна помош.
„Уште еднаш упатувам силен апел да се прекине конфликтот во светата земја, кој предизвика толку многу терор, уништување и смрт“, рече папата на својата неделна аудиенција во Ватикан.
„Барам ослободување на сите заложници, постигнување траен прекин на огнот, олеснување безбеден влез на хуманитарна помош и целосно почитување на меѓународното хуманитарно право“, рече тој.
Папата не ги именува Израел или палестинската милитантна група Хамас, но рече дека меѓународното право бара „обврска за заштита на цивилите, забрана за колективно казнување, неселективна употреба на сила и присилно раселување на населението“.
Фото: принтскрин