Свет
Италија е меѓу најизложените членки на ЕУ на американските царини

Американските царини од 30 проценти за стоки од Европската Унија би можеле да го намалат БДП-то на Италија за 0,8 проценти во 2027 година, предупреди здружението Конфиндустрија.
Претседателот на САД, Доналд Трамп, се закани дека ќе воведе царини од 30 проценти за увоз на стоки од ЕУ на 1 август, предупредувајќи на „цврстата“ позиција на Брисел во преговорите за трговија.
Министерот за трговија, Хауард Лутник, изјави во неделата дека има „доволно простор за маневрирање“ за договор со европските земји.
Доколку САД навистина ги воведат, вредноста на италијанскиот БДП би можела да се намали за 0,25 проценти оваа година, и за 0,59 проценти во 2026 година и за 0,8 проценти во 2027 година, под услов ЕУ да не возврати со контрамерки, пресмета Конфиндустрија.
Брисел веќе подготви пакет мерки што предвидуваат царини за увоз на американска стока во вредност од 21 милијарда евра, но го одложи нивното усвојување до 6 август. Тие сè уште не постигнале договор за дополнителни контрамерки што би го опфатиле американскиот увоз во вредност од 72 милијарди евра, забележува Ројтерс.
Проценката на консултантската фирма EY е уште помрачна и покажува дека американските царини од 30 проценти би го намалиле БДП на Италија за 1,4 проценти во периодот 2025-2026 година, при што економската активност ќе стагнира.
Пред една недела, шефот на Конфиндустрија, Емануеле Орсини, предупреди дека извозот на ЕУ во САД веќе страда поради зајакнувањето на еврото во однос на доларот и може да толерира само нулта царинска стапка.
Доларот, од сите светски валути, најмногу ослабе во однос на еврото, нагласи Орсини, предупредувајќи дека во наредните месеци, според пресметките на здружението на италијанската индустрија, доларот би можел да биде во минус во однос на заедничката европска валута за дури 20 проценти.
Според него, со воведувањето царини, работите целосно би излегле од контрола бидејќи поевтиниот долар сам по себе е еден вид „највисока царина“ што првично ја става Европа во полоша позиција.
Зголемувањето на царинската стапка од страна на Америка за еден процентен поен би значело загуба од 874 милиони евра за италијанските извозници, пресмета Конфиндустрија, без да прецизира во кој временски период.
Минатата година, ЕУ забележа трговски суфицит со САД од приближно 200 милијарди евра, според податоците на Евростат. Убедливо најголем извозник беше Германија со вредност на испорачаната стока од 161 милијарда евра. На второ место е Ирска со 72 милијарди евра, а на трето место е Италија со 65 милијарди евра.
Италија главно извезува машини, фармацевтски производи, автомобили и прехранбени производи како што се маслиново масло, тестенини, сирење и вино во САД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Џими Кимел се враќа на екранот

Американскиот водител Џими Кимел утре се враќа на екранот со својот популарен ноќен шоу-програм, откако продукцијата беше привремено стопирана поради неговите контроверзни коментари за убиството на Чарли Кирк, соопшти Дизни.
„Емисјата ја суспендиравме за да избегнеме дополнителни тензии во чувствителен момент за земјата“, порачаа од компанијата, додавајќи дека по разговори со Кимел, одлучиле да продолжат со снимањето.
Кимел, познат по својата критика кон Доналд Трамп, на 14 септември коментираше дека осомничениот напаѓач, Тајлер Робинсон, бил поддржувач на поранешниот претседател. Тој ја исмеа и реакцијата на Трамп по убиството на Кирк, прикажувајќи изјава во која претседателот зборува за реновирање на Белата куќа.
„Ова не е начин на кој возрасен човек тагува по убиство на пријател. Вака четиригодишно дете тагува за златна рипка“, саркастично додаде Кимел.
Емисјата на Кимел се емитува на „Еј-би-си“, телевизија во сопственост на Дизни.
Свет
Франција ја призна Палестина

Францускиот претседател Емануел Макрон вечерва на Генералното собрание на ОН потврди дека Франција ја признава Палестина како независна држава.
Со ова, Франција се приклучува на земји како Обединетото Кралство, Канада и Австралија, кои го направија истиот чекор во последните недели.
„Светот е на чекор до губење на шансата за мир. Време е да се стави крај на војната во Газа“, порача Макрон, додавајќи дека решението со две држави е единствен пат.
Израел остро реагираше, оценувајќи дека признавањето е награда за тероризмот и повтори дека палестинска држава нема да се случи.
Палестинските власти го поздравија чекорот и го оценија како неповратен пат кон дводржавно решение.
Со Франција, вкупно 153 земји-членки на ОН – речиси 80 отсто ја имаат признато Палестина.
Во меѓувреме, Израелската офанзива продолжува. Според здравствени власти во Газа, во последните 24 часа загинале 61 лице, со што вкупната бројка од 7 октомври 2023 достигнува 65.344 загинати.
Свет
Голем напад со беспилотни летала врз Москва, небото е затворено

Москва вечерва беше нападната со беспилотни летала.
Градоначалникот на Москва, Сергеј Собјанин, објави дека противвоздушните сили собориле вкупно девет дронови , а подоцна уште два. Жителите на Московскиот регион слушнале експлозии на пристапот кон градот, а според првите информации што ги објавија руските медиуми, нема повредени или голема материјална штета.
Многу откажани и одложени летови
Повеќе од 35 летови беа откажани и одложени на московските аеродроми Шереметјево, Домодедово и Внуково во вечерните часови поради украински напади со беспилотни летала. Работата на аеродромот Шереметјево беше привремено суспендирана.
„До 20:19 часот по московско време, 21 лет беше одложен, а уште еден откажан во Шереметјево. Девет одложувања и две откажувања беа регистрирани во Домодедово, а четири летови беа одложени во Внуково“, објавуваат руските медиуми.
Руските медиуми наведуваат дека по нападот, тајната служба на ФСБ и Истражниот комитет ќе спроведат истрага и дека се очекува кривична постапка за тероризам. Оперативните служби на терен ги проверуваат остатоците од беспилотните летала и проверуваат дали предизвикале дополнителна штета.