Иранскиот министер за надворешни работи, Абас Арагчи, изјави дека американскиот државен секретар Марко Рубио „признал“ дека Вашингтон влегол во „војна по избор“ против Техеран „во име на Израел“.

„Господинот Рубио призна она што сите го знаевме: Соединетите Американски Држави влегоа во војна по избор во име на Израел“, рече Арагчи, во услови на тековната американско-израелска офанзива врз Иран, која започна во саботата.

Нагласувајќи дека „никогаш“ немало иранска закана, Арагчи тврди дека „и американската и иранската крв затоа е на грбот на израелските поддржувачи“.

Тој ги повика американските граѓани да „ја вратат својата земја“, велејќи дека „заслужуваат подобро“. Нападите врз Иран од страна на Израел и САД предизвикаа критики од демократите против администрацијата на претседателот Доналд Трамп, објави „Њујорк тајмс“.

Трамп претходно изјави: „Ги повикувам сите ирански патриоти кои копнеат по слобода да го искористат овој момент, да бидат храбри, решителни и херојски и да ја вратат својата земја“.

Од саботата, во заедничките американско-израелски напади загинаа голем број високи ирански функционери, вклучувајќи го и врховниот лидер ајатолахот Али Хамнеи.

Техеран одговори со напади со беспилотни летала и ракети, насочени кон локации поврзани со САД во Заливот.

Шест американски војници се убиени, а неколку други се тешко повредени. Според иранската Црвена полумесечина, бројот на жртви од воздушните напади на САД и Израел од саботата се искачи на 555.

САД денес им наредија на некои владини службеници и нивните семејства да ги напуштат Катар, Кувајт, Бахреин, Ирак и Јордан и затворија неколку дипломатски мисии низ регионот поради ескалацијата на конфликтот со Иран.

Мисија на САД во Саудиска Арабија беше затворена утрово по нападот со беспилотни летала, а на Американците во Џеда, Ријад и Дахран им беше наредено да се засолнат. Американската амбасада во Кувајт соопшти дека ќе остане затворена до понатамошно известување и дека сите редовни и итни конзуларни состаноци се откажани.

Во Израел, амбасадата на САД соопшти дека не е во можност да евакуира или директно да им помогне на Американците кои сакаат да ја напуштат земјата и им советуваше на граѓаните сами да направат безбедносни планови.

Мерките доаѓаат во време кога конфликтот меѓу САД, Израел и Иран се шири низ регионот, што доведе до зголемена безбедност во дипломатските објекти на САД и ограничувања за посети на воени објекти.

Снимката што ја геолоцираше Си-ен-ен покажува чад како се издига во Пардис, град источно од иранската престолнина Техеран, откако Израел објави дека го напаѓа главниот град, а американскиот претседател Доналд Трамп предупреди за „голем бран“ напади врз Иран.

На снимките може да се слушнат експлозии, а најмалку три облаци чад се издигаат од планинска област.

Експлозии одекнаа и во различни делови од покраината Исфахан во централен Иран во вторник наутро, објави полуофицијалната новинска агенција Мехр. Напади беа пријавени и во Кангавар на западот од земјата и во Шираз, град во југо-централен Иран.

'#اصفهان، صنایع دفاع (اپتیک)‌ رو هدف گرفتند.'
تصاویر و پیام‌های دریافتی از شهروندان، سه‌شنبه ۱۲ اسفند
📍 32.7023,51.6764#Iran #Isfahan pic.twitter.com/29ZwDNkZc3

— Vahid Online (@Vahid) March 3, 2026

„Уништивме стотици балистички ракети и гледаме дека нивните системи за истрелување се забавуваат“, изјави портпаролот на израелската војска, Надав Шошани, на брифинг во вторник. „Ја намаливме нивната способност да истрелуваат ракети кон нас и регионот“.

Шошани додаде дека Иран сега нема „способност да испукува ракети во големи количини“ и дека ова останува „клучен фокус“ ​​за израелските сили во наредните денови.

'دارند #پردیس رو می‌زنند!'
تصاویر دریافتی از شهروندان 'فاز ۱۱ پردیس در شمال شرق تهران، سه‌شنبه ۱۲ اسفند'#Iran #Pardis pic.twitter.com/iAQjgX7FTN

— Vahid Online (@Vahid) March 3, 2026

Претходно, Израел соопшти дека целите на нападите биле ирански ракетни лансери и системи за воздушна одбрана.