Свет
Кина: Уапсени лекари поради кражба на органи нa починати пациенти

Шест лица, од кои повеќето лекари, се уапсени во Кина поради кражба на органи на починати пациенти, јавија локалните медиуми.
Криминалната група ги лажела семејствата на починатите дека органите ги користат за да им помогнат на болните луѓе на кои им е потребна трансплантација, објави Би-би-си.
Истрагата утврди дека меѓу 2017 и 2018 година тие отстраниле црн дроб и бубрези од 11 лица во болниците во провинцијата Анхуи.
Во Кина има многу луѓе на списокот на чекање за органи и на државата ѝ е тешко да најде доброволни донори, додава Би-би-си.
Според извештаите на локалните медиуми, со трговијата со органи се занимавале четворица високорангирани лекари, кои работеле во одделот за донирање органи во болници.
Претежно краделе органи од жртви на сообраќајни несреќи кај кои имало сериозни повреди на мозокот, а другите органи останале неоштетени. Шефот на интензивна нега, Јанг Суксун, одел кај семејствата за да ги праша дали се согласуваат да ги донираат органите на починатиот, на што некои семејства дале писмена согласност.
Телата на починатите потоа биле однесени од болниците среде ноќ и биле ставани во комбе, кое било обоено во брза помош, а потоа органите биле вадени на непознати локации.
Органите подоцна им биле продавани на поединци или болници во тајност, а криминална група била откриена кога се посомневал синот на една од жртвите.
Ши Ксијанглин ги прегледал документите на мајка си неколку месеци по нејзината смрт во 2018 година наведувајќи дека се согласил на донирање органи, но сепак тој открил некои недостатоци во документацијата, како и празни полиња, што укажувало на тоа дека не се знае каде одат органите.
Кога открил дека нема информации каде отишле органите на мајка му, го прашал Јанг каде се, на што шефот на интензивна нега му понудил голема сума пари само за да молчи, но тој отишол во полиција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.