Свет
Кинески град забрани мажите да се шетаат со маици кренати над папокот

Секое лето во текот на големите жештини средовечните мажи низ Кина ги креваат своите маици над папокот за да се разладат, објави Си-ен-ен.
Таквиот стил на носење маица е толку распространет низ земјата што дури и стекнал сопствен назив кој се нарекува „пекиншко бикини“. Меѓутоа, во кинеската провинција Шандонг љубителите на ваквото бикини западнаа во немилост на локалните власти и сега мора да ги променат своите навики за разладување.
Во вторникот властите во главниот град на провинцијата Шандонг, Жинан, кој има неколку милиони жители, издадоа декрет според кој маиците, односно кошулите мораат да се носат на вообичаен начин на јавни места. Со оглед на тоа што температурите се зголемија на 36 Целзиусови степени во текот на неделава, машката популација на градот си зеде слобода, па луѓето масовно се шетале со разголени стомаци или во целост ги соблекле маиците, што е вообичаен тренд во целата земја.
Властите во Жинан сметаат дека ваквите навики се непристојни, а додаваат дека и самите граѓани се жалат на феноменот кој го нарушува имиџот на градот. Од таму објавија дека ќе стават крај на овој тренд на, како што се вели, безобѕирно изложување на телото на јавни места. На мета на влaстите се нашле и други работи, како јавни расправии меѓу граѓаните, непочитување на редовите за чекање, несоодветно фрлање отпад и несоодветно шетање кучиња. Сите овие забрани имаат за цел да го подобрат јавниот имиџ на градот.
Сепак, на социјалните мрежи многу граѓани сметаат дека локалните власти претерале со одлуката. Како причини за нивното противење наведуваат дека разголеното тело ги намалува емисиите на јаглерод диоксид и дека на постарите треба да им се даде слобода да се чувствуваат поудобно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин: Тони Блер можеби не е познат како ангел чувар на мирот, но е искусен политичар

Рускиот претседател Владимир Путин вчера го поддржа мировниот план на американскиот претседател Доналд Трамп за Блискиот Исток.
Најважниот елемент од мировниот договор во регионот останува решение за две држави меѓу Израел и Палестина, нагласи Путин на настан на политичкиот клуб Валдаj во Сочи. Сепак, подготвен e да му даде шанса на моделот на Трамп, рече тој. „Поранешниот британски премиер Тони Блер, кој е назначен за член во привременото меѓународно тело за мониторинг на Газа, можеби не е познат како ангел чувар на мирот, но е искусен политичар“, рече рускиот претседател.
Важно е што и Израел и Палестинската самоуправа и милитантната палестинска организација Хамас се согласија со решението, додаде тој. Трамп предложи прекин на огнот во Појасот Газа како дел од мировниот план од 20 точки што го презентираше во Вашингтон пред пет дена.
Планот вклучува целосно разоружување на Хамас и итно ослободување на сите преостанати израелски заложници што ги држи Хамас во замена за стотици палестински затвореници, како и повлекување на израелската војска од Појасот Газа.
Хамас нема да има никаква улога во управувањето со крајбрежниот појас, а на Израел му е забрането и да анектира територија. Наместо тоа, Појасот Газа ќе биде управуван од преодна влада на палестински технократи под надзор на идни меѓународни сили за стабилизација.
Германија, Франција и Обединетото Кралство, како и министрите за надворешни работи на неколку арапски држави, вклучувајќи ги Катар, Египет, Јордан, Обединетите Арапски Емирати и Саудиска Арабија, исто така изразија поддршка за планот.
фото: принтскрин
Свет
(Во живо) Последниот брод сè уште плови кон Газа, Израел објави забрана за влез

Последниот брод во меѓународната флотила за помош за Газа го продолжи своето патување рано утрово, според организаторите, откако околу 40 бродови беа пресретнати од Израел, кој се подготвува да ги протера пропалестинските активисти на пат.
„Маринет сè уште плови“, објави организацијата на социјалните мрежи доцна во четвртокот, додавајќи дека очекува наскоро пресретнување. „Тие се свесни што ги чека“, соопшти организацијата.
Бродот бил на околу 120 километри од брегот на Газа во 6 часот наутро, според геолокацијата споделена на веб-страницата на флотилата.
„Доколку се приближи, неговиот обид да влезе во активната борбена зона и да се обиде да ја пробие блокадата ќе биде спречен“, соопшти израелското Министерство за надворешни работи во четвртокот.
Повеќе од 400 активисти на 41 брод од флотилата беа уапсени за време на операцијата што траеше околу 12 часа, изјави израелски функционер во четврток вечерта.
„Тие се безбедно префрлени во пристаништето Ашдод за обработка од страна на израелската полиција“, додаде тој под услов да остане анонимен.
Флотилата „Глобал Сумуд“, во која се вклучени политичари и активисти како што е Грета Тунберг од Шведска, тргна од Шпанија во септември со цел да ја пробие израелската блокада на Појасот Газа.
Флотилата се претставува како „мирна и ненасилна хуманитарна мисија“.
фото: принтскрин
Регион
(Видео) Србија под снег: делови од земјата затрупани, патиштата блокирани

Почетокот на октомври донесе вистински зимски услови во делови од Србија. На Копаоник паѓа снег од синоќа, а и други делови од земјата побелеа, вклучувајќи ги Ивањица и Голија, што предизвика први проблеми во сообраќајот, објавува Нова.рс. Денес ќе биде постудено од вчера, со повеќе дожд и снег.
Паднати дрвја и блокади на патиштата
На социјалните мрежи се појавија видеа кои сведочат за последиците од првиот снег во сезоната. Во близина на Ивањица, дрвја паднаа на патиштата под тежината на снегот, блокирајќи го сообраќајот. Видео објавено на Инстаграм ги прикажува граѓаните како сами отстрануваат паднато дрво за да го расчистат патот.
Поради зимските услови на патот, на возачите им се препорачува да бидат исклучително внимателни и да ги одложат непотребните патувања.
фото: принтскрин