Комитетот на Претставничкиот дом на американскиот Конгрес, кој го истражува нападот на американскиот Капитол на 6 јануари 2021 година, во извештајот го обвини Доналд Трамп за „заговор“.

Објавувањето на извештајот доаѓа само три дена откако комисијата препорача кривична пријава против Трамп.

Комисијата на Претставничкиот дом на американскиот Конгрес, која го истражува нападот на американскиот Капитол на 6 јануари 2021 година, го објави својот конечен извештај, во кој го обвинува поранешниот претседател на Соединетите Американски Држави, Доналд Трамп, за „заговор “.

Комисијата во извештајот наведува дека тоа е направено со цел да се фрустрира волјата на народот и да се наруши демократскиот поредок и препорачува на поранешниот претседател повторно да му се забрани да ја извршува претседателската функција.

Меѓу 11-те препораки предложени од комисијата, како резултат на истрагата, има и предлог да му се забрани вршење јавна функција, што би го оддалечило Трамп од потенцијална претседателска кандидатура на следните избори, пренесува Си-Ен-Ен.

Во извештајот, Комисијата цитираше дел од Уставот на САД кој вели дека поединецот кој се заколнал дека ќе го почитува Уставот, но „учествувал во бунт“ или давал „помош за непријателите на Уставот“ може да биде дисквалификуван од вршење јавна функција. .

Поделен на осум поглавја, извештајот од 845 страници вклучува наоди, транскрипти од интервјуа и законски препораки, а неговото објавување доаѓа само три дена откако комисијата препорача кривична пријава против Трамп, пишува Гардијан.

Комисијата, која ќе биде распуштена на 3 јануари, кога републиканците ќе ја преземат контролата врз Претставничкиот дом, спроведе повеќе од 1.000 интервјуа, одржа 10 јавни расправи и собра повеќе од милион документи откако беше формирана минатиот јули.

Во извештајот се оценува дека Трамп сакал да ги поништи изборните резултати и победата на Џо Бајден на претседателските избори во 2020 година, а комисијата заклучува дека Трамп е виновен за насилниот бунт на неговите поддржувачи.

Според извештајот, Трамп знаел дека изгубил, но сепак извршил притисок врз државните претставници и американскиот потпретседател Мајк Пенс да ги поништат изборите.

Како што се посочува, тој бил директно одговорен за свикување на протестот кој подоцна станал насилен, а се забележува дека одбил да ги осуди протестите или да побара од демонстрантите да го напуштат Капитол.

„Еден човек е главната причина за немирите што избувнаа на 6 јануари. Поранешниот претседател Доналд Трамп, кој го следеа многумина“, се наведува во резимето на извештајот, додавајќи дека немирите немаше да се случат без Трамп.