Свет
Кремљ: Истекувањето на гасоводoт е голем проблем за Русија

Истекувањето гас од гасоводот „Северен тек 2“ е голем проблем за Русија и загуба на вредни средства, изјави портпаролот на Кремљ, Дмитриј Песков.
Песков призна дека оштетувањето на гасоводот предизвикало голем проблем за Русија.
Овој гас е многу скап, рече Песков, додавајќи дека сега гасот испарува во воздухот.
Песков ги отфрли наводите за вмешаност на Русија во инцидентот со истекување нарекувајќи ги обвинувањата „предвидливи, апсурдни и глупави“ и потсети на говорот на американскиот претседател Џо Бајден за неопходноста од отстранување на гасоводот „Северен тек 2“ на почетокот на годината.
„Се сеќавате ли на изјавите на американскиот претседател, кои беа дадени на почетокот на февруари? Кој тогаш вети дека ќе се ослободи од ‘Северен тек 2’? На што мислеше американскиот претседател не знаеме“, рече тој.
Песков истакна дека Русија трпи загуби поради истекување на гасоводот, а американските енергетски компании имаат корист од тоа.
„Ги гледаме огромните профити на американските доставувачи на течен природен гас, кои ги умножија испораките на европскиот континент, тие се многу, многу заинтересирани да продолжат да ги остваруваат овие супер супер профити“, рече тој.
Портпаролот на Кремљ исто така инсистира „Газпром“, сопственик на гасоводот, да учествува во истрагата за инцидентите во Балтичкото Море.
Тој рече дека ситуацијата отвора многу прашања и бара дијалог меѓу инволвираните страни, кој во моментот недостига.
Данската агенција за енергија потврди во вторникот три истекувања на гасоводите „Северен тек 1“ и „Северен тек 2“.
Сеизмолозите објавија дека експлозии го потресоа Балтичкото Море пред да бидат откриени невообичаените истекувања.
Гасоводот „Северен тек“ се протега на 1.200 километри под површината на Балтичкото Море, од рускиот брег во близина на Санкт Петербург до североисточна Германија. Отворен е во 2011 година, а максималниот капацитет на овој гасовод е 170 милиони кубни метри гас, кој се испраќа од Русија во Германија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Се нуди награда од 50.000 долари за осомничен за двојно убиство во Минесота

Американските власти во Минесота и натаму трагаат по 57-годишниот Венс Лутер Бетлер, осомничен за убиство на демократската пратеничка Мелиса Хортман и нејзиниот сопруг, како и за ранување на сенаторот Џон Хофман и неговата сопруга.
Државното Биро за кривични дела на Минесота објави дека Бетлер е висок 195 см, тежи околу 100 килограми, има кафеава коса и очи, и последен пат бил виден вчера во Минеаполис, облечен во светол каубојски шешир, темна кошула со долги ракави и светли панталони, носејќи темна торба.
– Не знаеме дали има соучесници, можно е да бил со други лица. Сакам да ги сослушаме сите што можеби биле во контакт со него, изјави полицискиот претставник Дру Еванс.
ФБИ објави фотографија од Бетлер како стои пред домот на еден пратеник маскиран како полицаец, и понуди награда од 50.000 долари за информации што ќе доведат до негово апсење и осуда.
Бетлер живее во округот Сибли, близу градот Грин Ајл, и работи како директор за безбедносни патроли во приватна фирма. Во минатото бил генерален менаџер во синџир продавници и фабрика за храна.
Во 2016 година бил назначен од тогашниот гувернер Марк Дејтон за претставник од приватниот сектор во Советот за развој на работната сила, организиран од гувернерот. Во истиот совет членувал и сенаторот Хофман, жртвата на нападот.
Засега не е јасно дали Бетлер и Хофман имале лична поврзаност.
Американските власти нападите ги опишаа како „чинови на политичко насилство“.
Свет
Германија, Франција и Велика Британија нудат итни преговори со Иран

Германија, Франција и Велика Британија се подготвени веднаш да започнат разговори со Иран околу неговата нуклеарна програма во обид да се намали тензијата на Блискиот Исток, изјави германскиот министер за надворешни работи Јохан Вадефул.
– Се надевам дека ова сè уште е можно, изјави Вадефул за германската јавна телевизија АРД, додавајќи дека Техеран претходно ја пропуштил можноста за конструктивни разговори.
Тој нагласи дека деескалацијата и долготраен мир во регионот се можни само ако Иран престане да биде закана за регионот, Израел и Европа.
Свет
Еден загина откако се урнаа два воздушни балони над долината Ихлара, дел од познатата туристичка област Кападокија

Два воздушни балони се урнаа во централна Турција, при што загина најмалку едно лице, а 19 се повредени, јави турската државна телевизија ТРТ.
Загинатиот бил еден од лицата што управувале со балоните.
Несреќата се случила при лет над долината Ихлара, дел од познатата туристичка област Кападокија, која е позната по балонските летови и живописниот пејзаж.