Свет
Кремљ: Трамп се обидува да ги разбере причините за конфликтот

Кремљ денеска ја пофали администрацијата на американскиот претседател Доналд Трамп за обидот да ги разбере основните причини на конфликтот во Украина и да го прекине она што, како што се наведува, е во спротивност со пристапот на Европа.
Овие изјави се меѓу најјасните признанија на Кремљ дека има голема промена во американската политика кон војната откога Трамп ја презеде функцијата пред пет недели.
Поништувајќи ги тригодишните напори на САД да ја казнат и изолираат Москва под администрацијата на Џо Бајден, Трамп бргу се фокусира на поправка на односите со рускиот претседател Владимир Путин и поддржа делови од наративот на Кремљ за конфликтот.
Минатата недела Трамп го нарече украинскиот претседател Володимир Зеленски диктатор.
Запрашан за изјавите на Трамп за Зеленски и Бајден, портпаролот на Кремљ, Дмитриј Песков, рече дека самата администрација на Трамп објавила дека го менува својот пристап кон Русија.
„Тоа е она што го поздравуваме и поддржуваме. Тоа е првата работа. Второ, се надеваме дека Вашингтон целосно ќе ги анализира основните причини за украинскиот конфликт – тоа е всушност она на што се обидовме да ги натераме нашите противници во Европа да обрнат внимание, што тие секогаш одбиваа да го прават, исто како и претходната администрација во Вашингтон“, рече Песков.
Русија тврди дека била принудена да ја почне војната за да ги заштити оние што говорат руски јазик во Украина и да обезбеди Украина да не му се приклучи на НАТО. Украина и Западот велат дека ова биле само изговори за грабеж на земјиште во колонијален стил.
„Без длабока анализа и разбирање на основните причини за конфликтот во Украина, во суштина е невозможно правилно да се работи на (мировно) решение. И тука ги гледаме обидите на Вашингтон вистински да разбере што го предизвика овој конфликт и се надеваме дека оваа анализа ќе помогне во напорите во контекст на решавање на конфликтот“, рече Песков.
Од друга страна, Песков тврди дека во овој момент нема основа Русија да го обнови дијалогот со европските земји, кои денеска воведоа уште еден пакет-санкции кон Москва, вклучително и забрана за увоз на алуминиум. Песков ги опиша санкциите како „целосно предвидливи“.
Кремљ нагласи дека сака да најде решение за конфликтот во Украина преку разговори со САД обвинувајќи ја Европа дека сака да ги продолжи непријателствата во услови на зближување меѓу Русија и САД, што доведе до тоа Доналд Трамп да заземе попомирлива позиција кон Москва.
„Европејците продолжуваат по патот (…) на нивното убедување за неопходноста од продолжување на војната. Ова убедување на Европејците е во целосна спротивност со желбата да се најде решение за Украина, што во моментот го правиме со Американците“, додаде Песков на третата годишнина од рускиот напад врз соседната земја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нова средба на руски и американски претставници утре во Ријад?

Американските и руските претставници утре треба да одржат последователен состанок, една недела по средбата на шефовите на дипломатиите на двете земји, изјавил денеска дипломатски извор за „Франс прес“.
За време на состанокот на 18 февруари, министрите за надворешни работи на САД и Русија, Марко Рубио и Сергеј Лавров се согласија да воспостават „механизам за конзулати“ чија цел е да ги реши нивните спорови и да назначи преговарачи за војната во Украина.
Според дипломатски извор во вторник во Ријад ќе се одржи „пропратен состанок“ меѓу претставниците на САД и Русија.
Нивото на претставници ќе биде пониско отколку на состанокот на 18 февруари, но тоа сепак е „знак за напредок“, додал изворот, според медиумот.
Свет
Џjинпинг: Кина и Русија се вистински пријатели кои делат и добро и лошо

Кинескиот претседател Шји Џjинпинг изјави денеска дека историјата и реалноста покажуваат дека Кина и Русија се добри соседи кои не можат да се оддалечат и вистински пријатели „кои делат добро и лошо, меѓусебно се поддржуваат и постигнуваат заеднички развој“.
Тој ова го изјави за време на телефонскиот разговор со рускиот претседател Владимир Путин, кој беше спроведен на иницијатива на руската страна.
Лидерите на двете земји разговараа за повеќе прашања, вклучително и за конфликтот во Украина и се договорија да одржуваат контакти преку различни канали и да ги координираат нивните активности, пренесува „Ксинхуа“.
Шји нагласи дека кинеските власти ги поддржуваат напорите на Русија за намалување на тензиите во украинскиот конфликт.
„Кина е среќна што гледа дека Русија и другите заинтересирани страни прават напори за деескалација на украинскиот конфликт“, рече кинескиот претседател.
Тој потсети дека на почетокот на ескалацијата на украинската криза го претстави својот четиристран пристап за решавање на кризата во Украина.
„Во септември минатата година, Кина и Бразил, заедно со некои земји од глобалниот југ, ја основаа Групата на пријатели за мир за да ја постават основата за промовирање политичко решение за кризата во Украина“, рече кинескиот лидер.
Тој укажа на важноста на долгорочната дипломатија и националните развојни стратегии на Кина и Русија.
„Различните сектори на двете земји континуирано ја подобруваат соработката на сите полиња во согласност со консензус на двајцата лидери, вклучително и спроведување на активности за одбележување на 80-годишнината од победата на кинескиот народ во војната против јапонската агресија и 80-годишнината од победата во Втората светска војна“, посочи Шји, додавајќи дека врските на Кина и Русија уживаат силна внатрешна движечка сила и единствена стратешка вредност, како и тоа дека развојните стратегии и надворешните политики на Кина и Русија се долгорочни.
Шји оцени дека односите меѓу Кина и Русија се одвиваат со леснотија, што „ќе донесе стабилност и позитивна енергија во меѓународните односи“.
За време на долгиот телефонски разговор меѓу двајцата лидери „имаше фундаментална размена на мислења за актуелните прашања за понатамошен развој на сеопфатното партнерство и стратешката интеракција меѓу Русија и Кина“, а разговорот беше „топол и пријателски“, соопшти Кремљ, пренесуваат руските медиуми.
Соговорниците разговараа за начините за проширување на заемно корисната соработка на полето на економијата и трговијата, инвестициите, културата, образованието и спортот.
Лидерите на Кина и Русија го потврдија распоредот на претстојните состаноци на високо ниво по повод 80-годишнината од победата во Втората светска војна во Москва, претстојниот самит на Шангајската организација за соработка (SCO) и комеморативните настани во Пекинг по повод 80-годишнината од крајот на Втората светска војна и победата над Јапонија.
Путин го информирал претседателот на Кина за неодамнешните руско-американски контакти.
Кинеската страна ја изрази својата поддршка за започнатиот дијалог меѓу Русија и САД, како и подготвеноста да помогне во изнаоѓањето начин за мирно решавање на украинскиот конфликт, се додава во соопштението на Кремљ.
Лидерите особено истакнаа дека руско-кинеските надворешнополитички односи се најважниот стабилизациски фактор во светските работи.
„Овој однос е од стратешки карактер, не е подложен на надворешно влијание и не е насочен против никого“, се заклучува во соопштението.
Свет
Фон дер Лајен: Украина би можела да влезе во ЕУ пред 2030 година

Претседателката на Европската комисија, Урсула фон дер Лајен денеска на прес-конференција ги коментираше можните временски рамки за пристапување на Украина во Европската унија.
Таа изјави дека целиот процес на проширување е „заснован на заслуги“ и оти пристапувањето мора да биде од корист и за земјата кандидат и за Унијата.
Фон дер Лајен нагласи дека ЕУ не сака да даде точен датум кога Украина би можела да се приклучи, бидејќи другите земји-кандидатки би можеле да постават слични очекувања.
Сепак, таа оптимистички додаде дека Украина прави добар напредок и дека „тоа би можело да биде прифатено пред 2030 година“ ако продолжи со реформите со таа брзина и со тој квалитет.