Украинскиот претседател Володимир Зеленски пристигна во Вашингтон, каде се очекува да потпише важен договор за минерали со американскиот претседател Доналд Трамп.

Сè уште не се познати сите клучни детали од договорот што Доналд Трамп и Володимир Зеленски ќе го потпишат денеска.

Украинскиот премиер Денис Шмихал вчера изјави дека прелиминарниот договор предвидува формирање „инвестициски фонд“ за обнова на Украина. Фондот заеднички би бил управуван од Киев и Вашингтон „на еднакви услови“, при што Украина во него ќе инвестира 50 отсто од идните приходи од минералните ресурси на државата, нафтата и гасот, а средствата потоа ќе се користат за проекти во земјата.

Зеленски го потврди постоењето на фондот, но за Би-Би-Си изјави дека е „прерано да се зборува за пари“. „Њујорк тајмс“ наведува, повикувајќи се на нацрт-договор, дека САД ќе поседуваат најголем можен удел во фондот според американскиот закон, но не нужно и целиот фонд.

Според извештаите, Вашингтон првично барал украински минерални ресурси во вредност од 500 милијарди долари, што Киев го одбил, а тоа барање подоцна било повлечено. Зеленски се залага договорот да вклучи силна американска безбедносна гаранција, но Трамп вчера посочи дека самиот договор може да послужи како форма на заштита за Украина.

Поголем број на експерти на ОН денеска објавија дека администрацијата на американскиот претседател Доналд Трамп ги поткопува човековите права и основните слободи во земјата и во странство.

„Загрижени сме поради обидот на новата американска администрација да ја ослабне домашната заштита на човековите права, да ги поткопа меѓународните човекови права и хуманитарни системи, да го уназади деценискиот напредок во родовата еднаквост и да ги поткопа меѓународните институции и граѓанското општество ширум светот“, велат експертите во заедничката изјава.

Експертите додаваат дека се вознемирени од растечките напади на САД врз „меѓународната архитектура на човековите права, владеењето на правото, мултилатерализмот, принципите на суверена еднаквост и самоопределување и виталните меѓународни договори за мир и безбедност, климатските промени, глобалната правда и меѓународната соработка“.

Експертите потсетија дека Повелбата на ОН забранува закана или употреба на сила против територијалниот интегритет на земјите-членки.

Огласот го потпишаа 32 специјални известувачи, уште седум експерти и членови на шест работни групи, што е невообичаено голема бројка за вакви заеднички изјави на експерти на ОН.

Експертите за човекови права на ОН се независни, доброволни поединци назначени од Советот за човекови права на ОН да известуваат во нивната област на експертиза.

„Заканите да се врати Панамскиот канал, да се окупира Газа со протерување на палестинското население, да се бара од Украина да ги изнуди нејзините минерали како цена за поддршка на отпорот против Русија или да ја преземе контролата врз Гренланд, се јасно незаконски акти според меѓународното право“, велат експертите.

Тие додаваат дека ги вознемирува и „проблематичната улога на главните бизнис играчи во новата американска администрација, кои вршат несоодветно влијание без никакви механизми за спречување на конфликт на интереси“, индиректно алудирајќи на милијардерот Илон Маск.

Експертите оценија дека ваквите потези им ја отвораат вратата на компаниите да ја преземат контролата врз американските власти.

За време на заедничката прес-конференција во Белата куќа, американскиот претседател Доналд Трамп го прекина говорот на британскиот премиер Кир Стармер. Инцидентот се случи додека Стармер одговараше на прашање за заканите на Трамп да ја направи Канада 51-та американска држава.

Имено, Стармер бил прашан дали тој или кралот Чарлс III е загрижен за реториката на Трамп кон членката на Комонвелтот на крајот од посетата на Белата куќа која вклучуваше повеќе состаноци на теми како трговијата и војната во Украина. Британскиот лидер рече дека темата за Канада не била спомната за време на тие разговори и се обидел да го истакне историското пријателство меѓу Обединетото Кралство и САД.

„Ја спомнавте Канада. Мислам дека се обидувате да најдете јаз меѓу нас што не постои, ние сме меѓу најблиските нации и имавме одличен разговор денес…“. Трамп потоа нагло го прекина со зборовите „доста е, благодарам“ и повика друг новинар.

Starmer: “You mentioned Canada,I think you’re trying to find a divide that doesn’t exist.”

Trump: “That’s enough.”

Trump seems tense around democratic leaders but perfectly comfortable with Xi, Putin, and Orbán. We all know why
pic.twitter.com/fp7ciWlrHN

— Republicans against Trump (@RpsAgainstTrump) February 27, 2025

Како одговор на прозивките кон Трамп на социјалните мрежи, се јави еден од официјалните профили на Белата куќа. На профилот беше споделена снимка од далечен агол, на кое се гледа како американскиот лидер гледа во новинар додека го прекинува британскиот премиер.

President Trump cut off the reporter trying to goad the two leaders into division, you morons. https://t.co/ZZTicT10xY pic.twitter.com/LpvAVyglbz

— Rapid Response 47 (@RapidResponse47) February 27, 2025

„Претседателот Трамп го прекина новинарот кој сакаше да создаде јаз меѓу двајцата лидери“, напишаа тие.

Во описот на сметката се вели дека е создадена за да ја поддржи агендата на Трамп „Америка на прво место“ и „брзо да реагира“ на лажните вести.