Свет
Минатиот месец беше вториот најтопол мај досега

Мај 2025 година беше вториот најтопол мај досега регистриран во светот, со глобална просечна температура од 15,79 степени Целзиусови, само 0,12 степени под рекордот поставен во мај 2024 година, објави службата за климатски промени „Коперникус“ на ЕУ.
Температурата беше за 1,4 степени Целзиусови над проценетиот прединдустриски просек за периодот 1850-1900 година, соопшти агенцијата со седиште во Бон.
Исклучително суво време
Делови од северозападна Европа доживеаа исклучително сува пролет, вклучувајќи ги март, април и мај со најниски нивоа на врнежи и влажност на почвата, најмалку од 1979 година.
Во мај 2025 година се забележа значителен контраст во температурите на површинскиот воздух низ цела Европа. Во источна Европа, од источна Италија и Балканот на југ до Финска на север, температурите беа претежно под климатолошките вредности за периодот 1991–2020 година.
Најголемите отстапувања кон постудено време беа забележани северозападно од Црното Море, со фокус на западна Украина и околните области, каде што можеа да предизвикаат проблеми за земјоделството.
Месецот мај 2025 во Бугарија беше еден од трите најстудени маја од 2005 година. Изолирани области со постудено време беа забележани и во Шпанија и Франција. Спротивно на тоа, западна Европа беше претежно потопла од просекот.
Службата за климатски промени „Коперник“ редовно објавува податоци за површинските температури, морската ледена покривка и врнежите. Нејзините наоди се базираат на компјутерски генерирани анализи на мерења од сателити, бродови, авиони и метеоролошки станици низ целиот свет.
Голем дел од податоците датираат од 1950 година, а некои записи датираат уште подалеку.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп ја повика Турција да престане да купува нафта од Русија

Американскиот претседател, Доналд Трамп, ја повика Турција да престане да купува нафта од Русија, објави денес Би-Би-Си.
Трамп му рече на турскиот претседател Реџеп Таип Ердоган во Белата куќа дека прекинувањето на увозот би било „најдоброто нешто“ што Анкара може да го направи.
Средбата во Овалната соба заврши без решение за прашањето за санкциите на САД против Турција или продажбата на напредни борбени авиони Ф-35, но Трамп изрази оптимизам.
Турција со години не може да набави американски авиони Ф-35. Во 2020 година, Трамп воведе санкции врз Турција затоа што купи руски противвоздушни системи С-400, а една година претходно поради ова, беше исфрлена од програмата во која произведуваше делови за тој авион.
За време на кратките изјави за медиумите, Трамп денес изјави дека сака Турција „да не купува нафта од Русија додека таа продолжува со своите напади во Украина“.
„Најдоброто нешто што може да го направи е да не купува нафта и гас од Русија“, рече Трамп.
Заедно со Индија и Кина, Турција е еден од најголемите купувачи на руски енергетски производи.
Трамп додаде дека верува оти Ердоган е почитуван и од украинскиот претседател Володимир Зеленски и од рускиот претседател Владимир Путин, што значи дека би можел да има големо влијание врз војната ако сака, пишува Би-Би-Си.
Фото: ЕПА
Свет
Лавров: НАТО и Европската Унија се во војна со Русија

Министерот за надворешни работи на Русија, Сергеј Лавров, изјави дека НАТО и Европската Унија водат војна против Русија „користејќи ја Украина како посредник“ и „директно учествуваат“ во конфликтот.
Пораката на Лавров беше објавена на јавниот канал Телеграм и е продолжение на честите тврдења на Кремљ дека западната воена и финансиска помош за Украина претставува директна непријателска акција против Русија.
Изјавата доаѓа во време кога се регистрирани нови упади на руски беспилотни летала и авиони во воздушниот простор на членките на НАТО. Алијансата во вторникот ја предупреди Москва дека е подготвена да го брани „секој сантиметар од територијата“ откако Естонија минатата недела пријави повреда на нејзиниот воздушен простор.
Сличен инцидент се случи претходно овој месец во Полска, кога околу 20 руски беспилотни летала влегоа во полскиот воздушен простор. Оваа недела, Данска пријави повеќе беспилотни летала во близина на критична инфраструктура, додека руски десантен брод беше забележан покрај нејзиниот брег.
Кремљ, исто така, вчера реагираше на изјавата на американскиот претседател Доналд Трамп, нарекувајќи ја Русија „хартиен тигар“ и рече дека Владимир Путин „ги цени неговите напори за решавање на војната во Украина“.
Портпаролот на Кремљ, Дмитриј Песков, рече дека Русија е мечка, а не тигар, додавајќи: „Не постои такво нешто како хартиена мечка“. Коментирајќи ја изјавата на Трамп дека Украина би можела да ја врати целата окупирана територија под своја контрола, Песков рече дека „руските сили напредуваат на сите фронтови во Украина“, додавајќи дека „динамиката на војната е очигледна“.
Песков, исто така, коментираше за можноста за средба меѓу рускиот претседател Владимир Путин и украинскиот претседател Володимир Зеленски, велејќи дека „средба меѓу двајцата без соодветна подготовка би била ПР-шоу осудено на неуспех“.
Трамп претходно изјави дека земјите-членки на НАТО треба да соборуваат руски авиони што го нарушуваат нивниот воздушен простор. Тој, исто така, рече дека верува оти Украина, со поддршка на Европската Унија и НАТО, може да ја врати целата територија што Русија ја зазеде од почетокот на инвазијата, откако долго време тврдеше дека и Киев и Москва ќе мора да се откажат од дел од територијата за да се стави крај на војната.
Свет
Сијарто: Крајот на војните е можен само преку преговори

Ниеден вооружен конфликт никогаш не завршил на бојното поле, а решение може да се најде само преку дипломатија, поради што медијацијата меѓу завојуваните страни е исклучително важна, изјави денес во Њујорк унгарскиот министер за надворешни работи Петер Сијарто.
За време на состанокот за медијација меѓу завојуваните страни на маргините на Генералното собрание на Обединетите нации во Њујорк, Сијарто истакна дека медијацијата е особено важна за Унгарија, која се соочува со безбедносни предизвици поради војната во соседна Украина, како и поради нелегалната миграција, што е исто така последица од вооружените конфликти, според соопштението за медиумите на министерството, пренесено од МТИ.
„Затоа се залагаме за мир низ целиот свет и ја поддржуваме секоја иницијатива насочена кон постигнување мирно решение. Колку побрзо завојуваните страни седнат на преговарачка маса, толку побрзо ќе има шанса војната да заврши, да се спасат повеќе животи и да се спречи поголемо уништување“, рече Сијарто.