Свет
Министерот за внатрешни работи на Естонија ја нарече финската премиерка касиерка

Министерот за внатрешни работи на Естонија, Март Хелме, крена голема прашина со своите неодамнешни изјави за финската влада во која доминираат младите жени, пренесува „Спутник“ .
Хелме не штедеше зборови критикувајќи ја новата финска влада на левиот центар велејќи дека е составена од улични активисти и неписмени повикувајќи се дури и на историски паралели и го цитира Владимир Ленин, водачот на Октомвриската револуција во 1917 година.
Во радиоинтервју за естонската радиодифузна компанија ЕРР, Хелме изрази силни сомнежи за новата влада на Финска предводена од социјалдемократката Сана Марин, која во моментот е најмлада премиерка во светот со 34 години.
Хелме дури и потсети на Граѓанската војна од 1917 година, сè уште многу болна тема во Финска, повлекувајќи паралели помеѓу Црвената гарда и сегашната влада на левиот центар, доведувајќи ја во прашање нејзината способност да ги брани интересите на земјата.
„Сега можеме да ја видиме до одреден степен одмаздата на црвените врз белите, со тоа што црвените, кои сакаа да ја уништат Финска, се дојдени на власт и сега се обидуваат да ја направат Финска некаква европска провинција, која може да го носи името Суоми или Финска“, рече Хелме цитиран од „ Хуфвудстадсбладет“.
Понатаму, Хелме изрази сомнеж и за искуството и способноста на Сана Марин, па дури и го цитира Владимир Ленин, водачот на Руската револуција.
„Се сеќавам дека Владимир Улјанов Ленин тврдеше оти секоја слугинка може да стане министер или што и да било. Сега гледаме дека касиерката стана премиер, а во исто време некои други улични активисти и неписмени станаа членки на владата “, рече Хелме предвидувајќи пораст на моќта за десничарската партија Финци.
Кога вербалниот напад на Хелме се рашири во Финска, многу Финци побрзаа кон социјалните мрежи да го изразат својот гнев.
„Почитуван министере, Март Хелме! Се гордеам што живеам во земја во која секоја слугинка може да стане министер. Уште сум горд што Финска беше првата земја каде што слугинката стана министер пред 92 години кога Мина Силанпа го доби портфолиото на министерот за социјална сигурност“, објави корисник на „Твитер“.
„Изгледа е завист. Се сеќавам на естонската економија базирана на продажба на маици и чорапи пред речиси 30 години“, се подбиваше друг корисник на „Твитер“.
Другите го нарекоа Хелме идиот и популистичко пувало, па дури и го споредуваа со иранското свештенство.
„Преку својата изјава естонскиот министер Март Хелме значително им наштети на односите на Естонија со еден од нашите најзначајни пријатели – Финска. Срамота е што владата се однесува кон Финска на овој начин. Министерот за внатрешни работи треба да биде разрешен веднаш“, изјави поранешниот министер за надворешни работи на Естонија, Урмас Пает, во твит.
Самата Сана Марин, која стана премиер по оставката на нејзиниот висок партиски колега Анти Рин, возврати дека се гордее на Финска, земја во која дури и касиерка може да стане премиер.
„Јас неверојатно се гордеам со Финска. Тука дете од сиромашно семејство може да добие добро образование и да постигне многу во животот. Дури и касиерката може да стане премиер. Финска не би преживеала без работници“, објавила таа во твит.
Хелме подоцна изјави дека неговите изјави за финската премиерка се негови и не претставуваат став на естонската влада. Во исто време тој истакна дека не ги доведува во прашање соработката, пријателството и топлите чувства помеѓу Финска и Естонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Детали за пукањето во Белград: Напаѓачите дошле со комбе до кафулето и почнале да пукаат кон гостите

Репортерка на „Н1 Белград“ од Вишњичка бања, каде денеска околу 14:30 часот се случи пукање во кое пет лица беа ранети, јави дека едно комбе дошло по Сланачки пат до локалниот бар и почнало да пука по присутните.
На местото на настанот има полиција и форензичари, а полицајците ги замолиле медиумските екипи да се оддалечат бидејќи е во тек увид.
Според жителите, кафулето е познато по тоа што таму се собираат и навивачи, а во него има и простор наменет за деца.
Не е познато дали во моментот на пукањето имало деца во кафулето, но жители и очевидци изјавиле дека на автобуската станица имало голем број деца кои се уплашиле и се разбегале, и додале дека долго се чекало на пристигнувањето на итната помош.
Жителите посочиле дека последните месеци имале големи проблеми со навивачки групи, за што редовно пријавувале во полиција. Полицијата и обвинителството реагирале кога медиумите укажувале на тоа.
„За нив ова е шокантно, но не толку изненадувачко, затоа што навивачките групи одамна прават проблеми,“ јави репортерката на „Н1“.
Засега нема официјални информации за мотивот за пукањето, а српски „Телеграф“ пишува дека станува збор за пресметка меѓу навивачи.
Регион
„Се пукаше од повеќе страни, луѓето се разбегаа“: Во пукање во Белград петмина ранети

Пет лица се повредени во пукање што се случи околу 14:25 часот во белградската населба Вишњичка бања.
Според официјалните информации, повредени се тројца мажи и две жени, а пукањето се случило во угостителски објект.
Сите се хоспитализирани.
Сведок на настанот во изјава за „Нова.рс“ рекол дека напаѓачите го опколиле кафулето и дека, во моментот кога отвориле оган, настанал општ хаос, бидејќи на улицата се нашле неколку минувачи.
Сведокот, со кого новинарот разговарал на лице место, рекол дека сè се случило околу 14:30 часот, кога излегол да земе нешто од автомобилот.
„Одеднаш слушнав пукање. На почетокот не знаев што се случува, но кога видов, се сокрив. Се пукаше од повеќе страни, трчаа оддолу и од оваа страна, близу кафулето. Имаше луѓе на улица и на автобуската станица, сите избегаа“, рекол соговорникот.
„Имаше седум или осум истрели, беа поединечни.“
Сепак, рекол дека не знае што би можел да биде мотивот за ова пукање.
„Сите ние што живееме во близина седиме овде. Тука има и детска игротека, за време на викенд има многу деца. Немало проблеми од отворањето,“ додал сведокот.
Голем број полициски службеници се на местото на настанот и потрагата по напаѓачите е во тек.
Фото: колаж/нова.рс
Свет
Руте: Иницијативата „ѕид против беспилотни летала“ е навремена и неопходна

Генералниот секретар на НАТО, Марк Руте, денес изјави дека иницијативата „ѕид против беспилотни летала“ е навремена и неопходна, бидејќи милиони евра или долари не можат да се потрошат на ракети за соборување беспилотни летала што чинат само неколку илјади долари.
Руте, кој присуствуваше на состанокот на Колеџот на комесари на Европската Унија организиран од претседателката на Европската комисија, Урсула фон дер Лајен, во Брисел, рече дека од првиот ден кога ја презеде функцијата генерален секретар на НАТО, работи со ЕУ заедно како еден тим, се наведува во соопштението на НАТО.
„НАТО е силен во поставувањето стандарди и цели за капацитети, додека ЕУ има огромна моќ на внатрешниот пазар, како што рековте, обезбедувајќи развој на одбранбената индустриска база, обезбедувајќи средства и ресурси достапни за поддршка на Украина, а исто така и кога станува збор за иницијативата „ѕид против беспилотни летала“, што, според мене, е одлична идеја“, рече тој и додаде дека НАТО пред сè мора да го заштити своето небо.
„Во последните неколку недели видовме што се случи со беспилотните летала во Полска, со МИГ-31 во Естонија, но и што се случува сега во Данска. Во Данска сè уште проценуваме што стои зад тоа. Кога станува збор за Полска и Естонија, јасно е дека станува збор за Русите. Сè уште проценуваме дали е намерно или не, но дури и да не е намерно, тоа е неодговорно и неприфатливо“, рече Руте. „Значи, ни треба ѕид против беспилотните летала“, нагласи тој.
Кога станува збор за Украина, тој се согласи со Урсула фон дер Лајен дека таа земја е првата линија на одбрана. „Им помагаме на Украинците затоа што станува збор за нашите вредности, но и за нашата колективна безбедност. Затоа е клучно да издржат во битка, па затоа ние продолжуваме да ги поддржуваме“, нагласи Руте.
Како што наведе тој, сè што Европската комисија го прави сега преку SAFE и други иницијативи за да ја стави Украина во најдобра можна позиција е клучно, како во борбата, така и за евентуалните мировни преговори, за да можат потоа да бидат во најсилна можна позиција, се наведува во соопштението на НАТО.
Фото: принтскрин