Свет
Министерство на Хамас: Израелците пукаа во луѓето кои чекаа помош, шест мртви

Шест Палестинци загинаа, а десетици се ранети кога израелските сили отворија оган врз толпата која чекаше камиони со помош во Газа, соопшти денеска палестинското Министерство за здравство. Палестинците брзаа да добијат помош на кружниот тек во населбата Кувајт јужно од градот Газа во средата вечерта кога израелските сили отворија оган, изјавија жителите и здравствените власти. Израелската војска не одговори веднаш на барањето за коментар за инцидентот.
Поради војната во Газа, повеќето од 2,3 милиони жители на енклавата се раселени. За време на дистрибуцијата на хуманитарна помош, имаше хаотични сцени и смртоносни инциденти додека очајно гладните луѓе се борат да добијат храна. Палестинските здравствени власти на 29 февруари соопштија дека израелските сили убиле повеќе од 100 Палестинци додека чекале камиони со храна во близина на градот Газа.
Израел соопшти дека мажите загинале среде толпата околу камионите со хуманитарна помош, велејќи дека жртвите биле прегазени. Во бегалскиот камп Ал-Нусеират во централниот дел на Појасот Газа, палестинските здравствени власти соопштија дека осум лица загинале во израелски воздушен напад што денеска погоди центар за дистрибуција на храна.
Во Деир Ал Балах, исто така во центарот на Газа, израелски проектил погоди куќа, при што загинаа девет лица, соопштија палестинските лекари. Жителите рекоа дека израелските воздушни и копнени бомбардирања продолжија во текот на ноќта врз областите низ енклавата, вклучително и Рафах на југ, каде што се засолниле повеќе од милион раселени луѓе.
Како што војната влегува во шестиот месец, ОН предупредија дека најмалку 576.000 луѓе во Газа – четвртина од населението – се на работ на глад, а глобалниот притисок се зголемува врз Израел да овозможи поголем пристап до енклавата. Израел негира дека ја попречува испораката на помош за Газа. Тој ги обвинува одложувањата за неуспесите на хуманитарните агенции и го обвинува Хамас за пренасочување на помошта.
Хамас го негира ова и вели дека Израел го користи гладот како оружје во својата воена офанзива. Хамас денеска повика на ескалација на протестите и нападите врз Израел во Газа, Западниот Брег и Ерусалим во петок.
„Ја повикуваме нашата револуционерна младина, бригадите на отпорот низ Западниот Брег, во населбите на Ерусалим да се кренат на масовни собири“, се вели во соопштението на Хамас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Таткото на Илон Маск: Тешко е да немаш почит кон Путин како човек

Ерол Маск, таткото на американскиот милијардер Илон Маск, изјави дека неговото семејство има одредено воодушевување од рускиот претседател Владимир Путин.
„Ако го гледаме Путин едноставно како човек, а не во контекст на меѓународната политика, тешко е да немаме почит кон него“, рече Ерол Маск во интервју за Би-Би-Си на руски јазик.
На прашањето дали Илон, кој е на чело на американското Министерство за владина ефикасност, рекол нешто слично за Путин, Ерол Маск потврди дека нивните ставови се слични.
Ерол Маск изјави дека луѓето околу него често се обидуваат да ги убедат другите да не му веруваат на Путин, но дека тој самиот го смета рускиот претседател за пример за силен лидер.
На забелешката дека Путин ја започнал војната во Украина, Ерол возвратил дека „само со текот на времето ќе може да се разбере кој навистина ја започнал“.
Зборувајќи за ставот на Илон Маск за Украина, Ерол Маск рече дека обезбедувањето пристап на Украина до сателитската интернет мрежа Старлинк на самиот почеток на војната изгледало како правилна одлука, но како што конфликтот се одолговлекува, ставовите на Илон за тоа се менуваат.
Тој категорично ја отфрли сугестијата дека пресвртот на Илон е поврзан со бизнис интереси, велејќи дека нивното семејство има се и не им требаат повеќе пари.
На прашањето дали може да каже нешто за неговиот син што пошироката јавност не го знае, но што смета дека е важно да се знае, Ерол Маск рече дека Илон е срамежлива личност и нема самодоверба кога зборува во јавност, пренесува Танјуг.
Свет
Рубио: Пазарите пропаѓаат, но мораме да го ресетираме светскиот трговски поредок

Американскиот државен секретар Марко Рубио денеска призна дека пазарите пропаѓаат откако администрацијата на претседателот Доналд Трамп воведе глобални царини, но рече дека пазарите ќе се прилагодат со текот на времето.
„На компаниите ширум светот, вклучително и оние во трговскиот сектор и меѓународната размена, едноставно треба јасно да им се каже какви се условите. Кога ќе го знаат тоа, ќе се прилагодат“, им рече Рубио на новинарите на состанокот на министрите за надворешни работи на НАТО во Брисел, одговарајќи на прашање за високите американски царини кои ги изненадија европските економии.
„Мислам дека не е фер да се каже дека економиите пропаѓаат. Пазарите пропаѓаат бидејќи се засноваат на вредноста на акциите на компаниите кои моментално се длабоко во режим на производство што е штетен за САД“, додаде тој.
„Мораме да го ресетираме глобалниот трговски поредок“, рече Рубио, а потоа додаде: „Најлошото нешто би било да го оставиме како што е. Ова не може да трае вечно. Не можеме да останеме земја која повеќе не произведува ништо“.
Како пример ја наведе Кина. „Тоа е безобразно. Тие не трошат ништо. Сè што прават е да извезуваат, да го преплават пазарот и да го нарушат, со сите царини и бариери што ги воведуваат“, рече тој.
Коментарите на Рубио дојдоа откако Кина објави реципрочна царина од 34 отсто за целиот увоз од САД, која ќе стапи на сила на 10 април.
„Претседателот правилно заклучи дека моменталната состојба на глобалната трговија е лоша за Америка и добра за еден куп други. Тој е решен да го промени тоа, и тој е апсолутно во право“, заклучи Рубио.
Свет
„Тоа не ви требаше“: Трамп до Кина за царините

Претседателот на Соединетите Американски Држави, Доналд Трамп, на својата социјална мрежа „Truth social“ со објава по најавата на Народна Република Кина дека ќе воведе реципрочни мерки како одговор на високите американски царини.
Њујоршката берза доживеа пад по отворањето, а Доналд Трамп набрзо на својот профил објави за потегот на Кина, кој се очекува од 10 април.
„Народна Република Кина направи лош потег, ги фати паника. Тоа е единственото нешто што не можеа да си го дозволат“, напиша Трамп.
„Потегот на администрацијата на Доналд Трамп не е во согласност со правилата на меѓународната трговија, сериозно ги поткопува кинеските интереси и го загрозува глобалниот економски развој и стабилноста на синџирот на производство и снабдување“, се наведува во соопштението од Пекинг.
Кинеското Министерство за надворешни работи апелираше до САД веднаш да ги укинат едностраните царини. Тие апелираат „итно да се решат сите трговски прашања на заемно корисен начин“.
Американски Волстрит падна веднаш по отворањето, според светските агенции.
Што се однесува до нафтата, цената на барелот е во „слободен пад“. Утрово цената беше 67 долари, а моментално е на 62 – пад од шест отсто.