Поранешниот претседател на Боливија, Ево Моралес, го оправдува повикот за формирање вооружени групи во неговата земја, што го испратил до граѓаните, а чии снимки беа објавени на државното радио.

Моралес, кој се наоѓа во егзил во Аргентина, потврди дека на снимките се слуша неговиот глас, со повик на формирање вооружени милиции „како оние во Венецуела“, бидејќи луѓето имаат право да се бранат доколку бидат нападнати од новата влада.

Тој прецизираше дека не мислел да се вооружат овие групи со „оружје“, туку да се организираат одбранбени групи на граѓани кои отсекогаш постоеле во неговата земја.

„Во Боливија, ако вооружените сили пукаат и убиваат луѓе, луѓето имаат право да се организираат за своја безбедност“, рече Моралес за „Ројтерс“.

„Понекогаш, тие групи беа нарекувани милиции, подоцна синдикална безбедност или синдикална полиција, а на некои места беа наречени комунални чувари. Ова не е ништо ново“, рече поранешниот боливиски претседател.

Во објавената радиоснимка Моралес вели дека тој и неговите приврзаници „верувале премногу“ пред минатогодишните претседателски избори и требало да има „план Б“.

„Ако се вратам (во Боливија) или некој друг се врати, мора да се организираме, како во Венецуела, со вооружени милиции на народот“, се слуша во клипот.

Моралес ја напушти Боливија во ноември по политичките немири предизвикани од контроверзната изборна победа, доби азил во Мексико, но потоа се пресели во Аргентина.

Најмалку 29 луѓе загинаа во судири на полицијата и демонстрантите во немири, а во средината на декември боливиските обвинители издадоа налог за апсење на Моралс поради обвинувања за бунт и тероризам.