Русија може да биде протерана од Украина доколку се употребат експлозивни подводни дронови, тврди еден од водечките пензионирани американски генерали, објави британски „Мирор“. По серија провокации кои, според извештаите, ја направиле војната „неизбежна“ со западна Европа, освен ако не се преземат мерки за одвраќање на Владимир Путин, пензионираниот генерал Дејвид Петреус, кој ги предводеше војните во Ирак и Авганистан, верува дека знае како диктаторот може да биде запрен.

Украина располага со ракети кои можат да нанесат сериозна штета, а тврди дека нејзиниот морски дрон TLK-1000 има способност да уништува цели на оддалеченост од 1.900 километри. Генералот Петреус вели дека постои план со три точки кој би можел да го порази Путин, но Киев сè уште има потреба од поддршка од Западот за да го претвори тоа во реалност.

„Ова е моментот кога Украина може да ги запре Русите на бојното поле, доколку успее да произведе уште повеќе беспилотни системи,“ изјави тој за „Телеграф“ во Њујорк.

„Пред неколку дена управував со беспилотен морски систем на тајна локација во Украина и достигна брзина од 100 км/час, неверојатно е. Покрај воздушните дронови, Украина сега располага и со Фламинго, крстосувачка ракета со домет од 3.000 километри“.

Тој додаде: „Ако тие три акции се спроведат истовремено, мислам дека конечно би можеле да дојдеме до ситуација во која Русија би била принудена да го запре војувањето или би можело да се постигне договор за прекин на огнот ако тоа е возможно.“

Во меѓувреме, се тврди дека Русија не е заинтересирана за завршување на војната во Украина и се подготвува за судир со НАТО. Експертите стравуваат дека Путин гради стратешка резерва од нови воени регрути, подготвувајќи се за „директен конфликт“ со воената алијанса.

Според Институтот за проучување на војната, бројот на нови регрути сега расте со просек од речиси 8.000 неделно.

Американскиот претседател Доналд Трамп одржа 72-минутен говор пред највисоките воени лица на базата Квантико, Вирџинија, во кој предложи американските градови да се користат како обуки терени за војската. Овој потег претставува радикално отстапување од долгогодишната традиција на раздвојување на војската од политиката.

Трамп ги нарече градовите, како Портланд, Лос Анџелес, Сиетл и Вашингтон, опасни и воени зони повикувајќи ги воените лидери да се справат со непријателот однатре пред ситуацијата да излезе од контрола. Тој веќе нареди распоредување на Националната гарда во неколку градови, а најави можни интервенции и во Чикаго, Атланта, Балтимор и во Њујорк.

„Внатрешните градови се голем дел од војната“, рече Трамп додавајќи дека нема да се двоуми да ги заштити луѓето од чумата што доаѓа однатре.

Настанот, кој чинеше милиони долари, ги собра речиси сите генерали и адмирали од активни борбени зони. Министерот за одбрана Пит Хегсет ги охрабри војниците да се дистанцираат од цивилното општество и од политичката коректност нарекувајќи ги класа над цивилите.

Говорот содржеше и низа политички пораки, меѓу кои критики кон Џо Бајден, имигрантите, медиумите и концептите за различност и инклузија. Трамп го нарече новото Министерство за војна клучно за одржување на редот во земјата алудирајќи на историски примери на домашна употреба на војската, но во контексти многу поинакви од денешните.

Фото: принтскрин

Животот во Авганистан е речиси парализиран откога талибанската власт го исклучи интернетот на национално ниво. На аеродромот во Кабул владее хаос – авионите не летаат, летовите се откажуваат, а семејства залудно чекаат свои блиски.

Банките се отворени, но не исплаќаат пари бидејќи системите не работат, што е тежок удар за граѓаните што зависат од дознаки од странство. Болниците, полицијата и итната помош се соочуваат со сериозни проблеми.

Властите тврдат дека станува збор за замена на стари оптички кабли, но граѓаните и меѓународната заедница стравуваат дека се воведува широка цензура и дополнителни ограничувања за правата на жените и девојчињата. „Амнести интернешнл“ предупреди дека оваа мерка има катастрофални последици за здравството, образованието и за испораката на хуманитарна помош.