Свет
Мохамед е најпопуларно име за бебиња во предградијата на Париз
Мохамед сега е најпопуларното име за машките бебиња во предградија населени со мигранти во Париз, покажуваат податоците објавени од Францускиот национален институт за статистика и економски студии (INSEE). Според INSEE, овој тренд, најверојатно, ќе продолжи во 2019 година, пренесува радиодифузерот BFMTV.
Неколку други нетрадиционални француски имиња исто така се најдоа во првите десет машки имиња во предградијата, меѓу кои Ибрахим на трето место, Рајан на четвртото место, Амир на седмото, Имран на осмото и Али на деветтото место. Габриел, најпопуларно име Париз, не успеа да се најде ни во првите десет имиња во предградијата.
Од првите 20 имиња на листата, 12 се од блискоисточно потекло, а листата на имиња на девојчиња во Сена-Сен Дени исто така има значителен број што потекнуваат од регионот. Новите статистики доаѓаат кога Мохамед и разните алтернативни пишувања на името се покажаа како најчесто име во Англија и Велс за новородените момчиња претходно месецов.
Во Германија, во извештајот на Друштво за германски јазик (GfdS), во јануари годинава бил забележан драматичен пораст на бројот на бебиња со име Мохамед во Германија во последните неколку години, со што името се искачило од 97. место на 26. место за помалку од една деценија. Исто како и Велика Британија, ни GfdS не ги брои сите варијациите на името Мохамед, па вистинскиот број може да е многу поголем.
Популарноста на имињата ја одразува зголемената популација на мигранти во Европа, а масовната миграција сега се смета за главна причина за порастот на населението во речиси цела Западна Европа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лавина во Австрија, двајца сноубордери загинаа
Двајца австриски сноубордери кои беа надвор од пистата на глечерот Штубај во Тирол, западна Австрија, загинаа во лавина, објави полицијата.
Мажите, на возраст од 37 години, кои не се вратиле откако излегле на снегот, беа пронајдени синоќа, но спасувачките служби можеа само да ја потврдат смртта, соопшти австриската полиција по големата потрага во која учествуваа спасувачи, кучиња и дронови.
Лавините низ Алпите веќе одзедоа десетици животи од почетокот на сезоната, а многу скијачки центри издадоа предупредувања за лавини. Во регионот каде што се случи последниот инцидент, во последните денови е во сила предупредување за лавина од ниво 4 на скала од 5 поради големи количини на нов снег.
Во соседна Италија, двајца скијачи загинаа во лавина во неделата, а третиот е во сериозна состојба.
Фото: depositphotos
Свет
Републиканец тврди: Досиејата за Епстин се кријат поради врски со Израел
Републиканскиот конгресмен, Томас Масие, изјави дека документите поврзани со починатиот финансиер и осуден сексуален престапник Џефри Епстин ѝ се ускратуваат на јавноста поради неговите наводни блиски врски со израелските и американските разузнавачки служби.
Според Масие, причините за блокирање на објавувањето на досиејата лежат и во тоа што тие би можеле да компромитираат влијателни милијардери и политички донатори.
Масие смета дека постои организиран напор да се спречи објавувањето на документите. „Постои настојување ова да се запре и верувам дека ќе се обидат да го запрат и на друго место, но тоа ќе им се врати како бумеранг“, изјави конгресменот.
Во изминатите години, Масие се позиционираше како еден од почестите републикански критичари на Трамп, јавно разидувајќи се со него по прашања од надворешната политика, извршните овластувања и транспарентноста на власта.
Во последните недели беа објавени нови документи поврзани со врските на Епстин со влијателни личности, во кои Трамп се споменува повеќе илјади пати. Се проценува дека остануваат уште околу два милиона необјавени списи. Опозицијата, критичарите, но и дел од републиканците, изразуваат сомневање дека актуелната администрација го крие целосното објавување на документите и ги цензурира објавените со цел да заштити влијателни личности.
Свет
Орбан: Нападите од Украина врз мене достигнаа ново ниво
Украинскиот претседател директно се вклучи во изборната кампања на Унгарија со напаѓање на нејзината влада, изјави унгарскиот премиер Виктор Орбан.
Тој рече дека политичките напади од Украина достигнаа ново ниво, објави унгарската новинска агенција МТИ.
„Кога претседателот (Володимир) Зеленски ме напаѓа лично затоа што не го поддржуваме забрзаното пристапување на Украина во Европската Унија, тој всушност ја доведува во прашање суверената одлука на унгарскиот народ“, тврди лидерот на Фидес.
Орбан верува дека Унгарците покажаа дека не сакаат Украина да стане дел од ЕУ во анкетата Vox2025. Ова е владина иницијатива за необврзувачка национална консултација спроведена во 2025 година. Во земја со околу 9,6 милиони луѓе, владата тврди дека 2,2 милиони луѓе учествувале во анкетата.
„Како премиер на Унгарија, моја должност е да ги исполнувам одлуките на унгарскиот народ. И ќе го правам тоа, одново и одново, без разлика дали на претседателот Зеленски му се допаѓа или не“, заклучи Орбан.
Премиерот на Унгарија, земја која беше исклучително зависна од руската енергија пред војната во Украина, и за која критичарите велат дека не е подготвена да се откаже од оваа поповолна финансиска опција, неодамна ја прогласи Украина за „непријател“ на Унгарија.
„Украинците мора да престанат постојано да бараат во Брисел да се прекине протокот на евтина руска енергија кон Унгарија“, рече Орбан минатата недела.
„Додека Украина го прави ова, таа е наш непријател“, заклучи унгарскиот премиер, кој ја посети Москва најмалку три пати од почетокот на офанзивата во Украина.
Орбан ги претставува изборите во април како одлука „за војна или мир“, а аналитичарите веруваат дека тој одлучил да се фокусира на украинското прашање во кампањата за да избегне да зборува за унгарската економија, која стагнира по зголемената инфлација.
фото/Depositphotos

