Свет
Мултикултурниот Брисел има 3-4 пати повеќе случаи на туберкулоза од остатокот на Белгија

Според податоците на министрите од Брисел, Алан Марон и Елке ван ден Брант, белгискиот главен град има три до четири пати повеќе нови случаи на туберкулоза од остатокот на земјата, при што особено погодени се барателите на азил, пренесува РТБФ.
Просечната стапка на заболување во Белгија е 8,6 на 100,000 луѓе, но во Брисел стапката е 29,5 случаи на 100. 000лица, при што градот претставува 36 отсто од сите нови случаи на туберкулоза во земјата. Бројките постојано се зголемуваат од 2014 година.
Податоците дојдоа по барање на пратеничката Бјанка Дебет, член на Христијанско-демократската и фламанската партија (ЦД-В), која изјави:
„Секако, урбаниот контекст секогаш го зголемува ризикот од одредени заболувања, но фактот дека една третина од случаите пријавени во Белгија се концентрирани во Брисел е значајна“.
Дебет ја посочи високата застапеност на болеста кај барателите на азил кои живеат во главниот град, велејќи: „Меѓу јули 2017 и мај 2019 година, 45 случаи на туберкулоза биле дијагностицирани кај бегалците во паркот Максимилијан“.
Здравствените професионалци во Европа со години забележуваат дека туберлколозата е вистински проблем кај мигрантското население кое доаѓа во различни земји низ целиот континент.
Во 2015 година д-р Масуд Дара од СЗО изјави дека до 80 отсто од случаите на туберколоза во европските земји биле меѓу мигрантите.
„Мигрантското население, особено ако доаѓа од супсахарските африкански земји каде што стапките на инфекција со туберколоза се прилично високи – во некои држави е дури 1.000 на 100.000 жители – веројатно е носител на оваа болест“, рече тој.
Бидејќи бројот на мигрантите повторно започнува да расте, многумина се плашат дека кај нив не само што ќе има високи стапки на болести како туберкулоза или шуга, туку и ќе бидат носители на коронавирус. Италија забележа десетици нови мигранти позитивни на Ковид-19, што доведува до стравувања од втор бран на епидемија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Лекар силувал и сексуално злоставувал 299 деца во текот на три децении: во Франција започна неговото судење

Во Франција денеска почна судењето на поранешниот лекар Жоел Ле Скварнек, обвинет за силување или сексуално злоставување на 299 луѓе, главно деца, кои беа негови пациенти повеќе од три децении.
За време на четиридневното судење, кое се одржува во градот Ван во Бретања, 74-годишниот Ле Скуарнек ќе се соочи со стотици свои жртви, пренесува АП.
Доколку биде прогласен за виновен, му се заканува затворска казна до 20 години, покрај 15-годишната казна што веќе ја отслужува откако беше прогласен за виновен во 2020 година за силување на дете. Адвокатот на лекарот, Максим Тесије, пред судот изјави дека неговиот клиент ја прифаќа одговорноста за повеќето обвиненија против него.
Некои од жртвите на Ле Скуарнек не се сеќаваат на нападот бидејќи во тоа време биле под анестезија. Многу жртви, иако не се сеќавале на нападите, опишуваат дека се чувствувале депресивно, иако не ја знаеле причината за тоа.
Случајот со поранешниот лекар почна да се расплетува во 2017 година, кога шестгодишно девојче кое живее до него рече дека тој ја допрел низ оградата меѓу нивните имоти.
Потоа следеше претрес во куќата на Ле Скуарнек при што беа откриени повеќе од 300.000 фотографии, 650 видео фајлови со педофилска содржина, како и дневници во кои тој детално ги опишал своите активности, покажуваат судските документи.
Тој беше осуден во 2020 година за силување и сексуален напад на четири деца, вклучително и две негови братучеди, и беше осуден на 15 години затвор.
На судењето во Ван ќе бидат разгледани случаите на силување извршени од него во периодот од 1989 до 2014 година против 158 мажи и 141 жена, кои во тоа време во просек имале 11 години.
Лекарот сексуално злоставувал и момчиња и девојчиња кога биле сами во болничките соби, покажуваат документите од истрагата.
Ле Скуарнек веќе еднаш во 2005 година беше осуден за поседување материјал за злоупотреба на деца и доби условна казна од четири месеци, но и покрај тоа следната година беше назначен за општ лекар во болница.
Свет
Нова средба на руски и американски претставници утре во Ријад?

Американските и руските претставници утре треба да одржат последователен состанок, една недела по средбата на шефовите на дипломатиите на двете земји, изјавил денеска дипломатски извор за „Франс прес“.
За време на состанокот на 18 февруари, министрите за надворешни работи на САД и Русија, Марко Рубио и Сергеј Лавров се согласија да воспостават „механизам за конзулати“ чија цел е да ги реши нивните спорови и да назначи преговарачи за војната во Украина.
Според дипломатски извор во вторник во Ријад ќе се одржи „пропратен состанок“ меѓу претставниците на САД и Русија.
Нивото на претставници ќе биде пониско отколку на состанокот на 18 февруари, но тоа сепак е „знак за напредок“, додал изворот, според медиумот.
Свет
Џjинпинг: Кина и Русија се вистински пријатели кои делат и добро и лошо

Кинескиот претседател Шји Џjинпинг изјави денеска дека историјата и реалноста покажуваат дека Кина и Русија се добри соседи кои не можат да се оддалечат и вистински пријатели „кои делат добро и лошо, меѓусебно се поддржуваат и постигнуваат заеднички развој“.
Тој ова го изјави за време на телефонскиот разговор со рускиот претседател Владимир Путин, кој беше спроведен на иницијатива на руската страна.
Лидерите на двете земји разговараа за повеќе прашања, вклучително и за конфликтот во Украина и се договорија да одржуваат контакти преку различни канали и да ги координираат нивните активности, пренесува „Ксинхуа“.
Шји нагласи дека кинеските власти ги поддржуваат напорите на Русија за намалување на тензиите во украинскиот конфликт.
„Кина е среќна што гледа дека Русија и другите заинтересирани страни прават напори за деескалација на украинскиот конфликт“, рече кинескиот претседател.
Тој потсети дека на почетокот на ескалацијата на украинската криза го претстави својот четиристран пристап за решавање на кризата во Украина.
„Во септември минатата година, Кина и Бразил, заедно со некои земји од глобалниот југ, ја основаа Групата на пријатели за мир за да ја постават основата за промовирање политичко решение за кризата во Украина“, рече кинескиот лидер.
Тој укажа на важноста на долгорочната дипломатија и националните развојни стратегии на Кина и Русија.
„Различните сектори на двете земји континуирано ја подобруваат соработката на сите полиња во согласност со консензус на двајцата лидери, вклучително и спроведување на активности за одбележување на 80-годишнината од победата на кинескиот народ во војната против јапонската агресија и 80-годишнината од победата во Втората светска војна“, посочи Шји, додавајќи дека врските на Кина и Русија уживаат силна внатрешна движечка сила и единствена стратешка вредност, како и тоа дека развојните стратегии и надворешните политики на Кина и Русија се долгорочни.
Шји оцени дека односите меѓу Кина и Русија се одвиваат со леснотија, што „ќе донесе стабилност и позитивна енергија во меѓународните односи“.
За време на долгиот телефонски разговор меѓу двајцата лидери „имаше фундаментална размена на мислења за актуелните прашања за понатамошен развој на сеопфатното партнерство и стратешката интеракција меѓу Русија и Кина“, а разговорот беше „топол и пријателски“, соопшти Кремљ, пренесуваат руските медиуми.
Соговорниците разговараа за начините за проширување на заемно корисната соработка на полето на економијата и трговијата, инвестициите, културата, образованието и спортот.
Лидерите на Кина и Русија го потврдија распоредот на претстојните состаноци на високо ниво по повод 80-годишнината од победата во Втората светска војна во Москва, претстојниот самит на Шангајската организација за соработка (SCO) и комеморативните настани во Пекинг по повод 80-годишнината од крајот на Втората светска војна и победата над Јапонија.
Путин го информирал претседателот на Кина за неодамнешните руско-американски контакти.
Кинеската страна ја изрази својата поддршка за започнатиот дијалог меѓу Русија и САД, како и подготвеноста да помогне во изнаоѓањето начин за мирно решавање на украинскиот конфликт, се додава во соопштението на Кремљ.
Лидерите особено истакнаа дека руско-кинеските надворешнополитички односи се најважниот стабилизациски фактор во светските работи.
„Овој однос е од стратешки карактер, не е подложен на надворешно влијание и не е насочен против никого“, се заклучува во соопштението.