Свет
Над 20 лица загинаа во нападот во Тексас, напаѓачот напишал расистички манифест

Најмалку 20 лица се убиени, а 26 се повредени во вооружениот напад во трговскиот центар во градот Ел Пасо, во сојузната американска држава Текас, а напаѓачот е уапсен.
Нападот се случил во трговскиот центар Волмарт, во дел од градот каде претежно живее латиноамериканско население.
Полицијата соопшти дека бил уапсен бел маж на 21-годишна возраст, а истрагата како причина наведува омраза, што во САД значи дека нападот бил мотивиран од расизам, верска или омраза кон лица со одредена сексуална оријентација.
На интернет кружи манифест, чијшто автор наводно е напаѓачот. Во текстот се осудува инвазијата од Латинска Америка во Тексас, а се споменува и нападот врз двете џамии што го изврши бел супремист во Нов Зеланд на 15 март, кога загина 51 лице.
Американскиот претседател, Доналд Трамп го осуди нападот, оценувајќи го како трагичен и кукавички чин.
Во моментот на нападот, во трговскиот центар имало околу 1.000 и 3.000 лица кои биле на шопинг.
По веста за нападот, неколку стотици активисти кои се залагаат за заострување на мерките за носење на оружје, се собраа пред Белата куќа.
Во САД, каде поседувањето на оружје е легално, редовно се случуваат вооружани напади пред училишта, трговски центри или на работните места.
Нападот во Ел Пасо е 249. во САД од почетокот на годината.
Ел Пасо брои околу 680.000 жители и се наоѓа на границата помеѓу САД и Мексико.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.