Свет
НАТО: Русија нема сили за нова офанзива

На Русија ѝ недостигаат муниција и војници потребни за да почне нова голема офанзива во Украина, изјави синоќа неименуван висок функционер на НАТО за „Ројтерс“.
Говорејќи пред клучниот самит на НАТО во Вашингтон, функционерот им рече на новинарите дека Русија претрпе многу тешки загуби додека се обидува да профитира од ограничените територијални придобивки.
Новата руска офанзива во мај во североисточниот регион Харков практично престана, но руските трупи продолжуваат да вршат притисок во регионот на Донецк обидувајќи се да го заземат клучниот град Часив Јар.
„Она што тие се принудени да го направат е да испраќаат единици без екипаж, неискусни војници, да одат напред за да постигнат нереални цели“, рече претставникот.
„За да се одржат вистинските офанзивни операции, мислиме дека Русија ќе мора да обезбеди значителни резерви на муниција надвор од она што веќе го добива од Иран и Северна Кореја“, истакна претставникот додавајќи дека ќе биде неопходен и нов бран на мобилизација.
Москва ја продлабочи воената соработка со Техеран и Пјонгјанг за време на војната во Украина.
Додека Иран ѝ достави на Русија беспилотни летала „Шахед“, кои се користат за напади врз украинските градови и инфраструктура, Северна Кореја наводно ѝ испорачала на Русија балистички ракети и милиони артилериски гранати, па дури и испратила воени инструктори во земјата.
Според извор од НАТО, одбраната на Украина е значително подобрена, иако и таа трпи големи загуби. Ќе биде потребно извесно време пред Киев да акумулира доволно ресурси за да почне своја контраофанзива, истакна официјалниот претставник.
Војската на Украина се најде во тешка позиција на почетокот на оваа година поради доцнењето на американската помош. Претседателот Володимир Зеленски минатата недела рече дека иако американскиот Конгрес, конечно ја одобри пакет-помошта од 61 милијарда долари, воената опрема пристигнува многу бавно во Украина.
Шефот на државата рече дека во овој момент не е соодветно да се зборува за украинската контраофанзива бидејќи Киев мора да се фокусира на заштита на она што го има. Секој напад против руските сили ќе биде возможен кога ќе пристигне доволно оружје, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија лансираше 97 беспилотни летала во неколку региони низ Украина

Во текот на ноќта, Русија лансираше 97 беспилотни летала во неколку региони низ Украина, соопштија Воздухопловните сили на вооружените сили на Украина.
Воздухопловните сили објавија на Телеграм дека украинските сили собориле 66 руски беспилотни летала во текот на ноќта.
Во голем број украински региони е прогласена воздушна опасност поради лансирање руски беспилотни летала, вклучувајќи ги Полтавската и Харковската област, Одеса, Киев, Суми, Чернигов, Днепропетровск и Запорожје
Свет
Од денеска за верниците се отвора гробницата на папата Франциско во базиликата Санта Марија Маџоре во Рим

Од денеска гробницата на папата Франциско во базиликата Санта Марија Маџоре во Рим ќе биде отворена за верниците, соопшти Ватикан.
Папата, кој почина на 88-годишна возраст на 21 април од мозочен удар, беше погребан вчера во гробница одвоена помеѓу две капели во римската базилика, по церемонија на жалост одржана во Ватикан. Церемонијата на поставување на ковчегот траеше околу половина час.
На погребот во базиликата Санта Марија Маџоре присуствуваа само најблиските, а едноставниот, дрвен ковчег на папата беше пречекан со ѕвона.
На мисата во Ватикан, според официјалните податоци од Ватикан, присуствуваа околу 250.000 луѓе, како и 170 странски делегации. Меѓу нив имаше шефови на држави и влади, монарси, поранешни државници, политичари од Италија и други земји, интелектуалци, уметници. Подоцна, италијанскиот министер за внатрешни работи Матео Пјантедози изјави дека најмалку 400.000 луѓе присуствувале на погребот на папата Франциск, собрани на плоштадот „Свети Петар“ и по улиците на Рим.
Целиот настан го следеа околу 2.700 акредитирани новинари.
Свет
Има жртви откако возило влета во публиката на уличен фестивал во Ванкувер, Канада

Неколку лица загинаа, а поголем број се повредени кога возило влета во публиката на уличен фестивал во Ванкувер, Канада, соопшти полицијата, без да го прецизира точниот број на жртви.
Полицијата соопшти дека возачот е во притвор по инцидентот во саботата во близина на улицата Фрејзер и Источна 41-ва авенија, објави канадската мрежа Си-Би-Си.
Се наведува дека полицијата ќе објави повеќе информации како што ќе се одвива истрагата.