Свет
Непал ја укина забраната за социјалните медиуми откога 19 лица загинаа во протестите

Владата на Непал ја укина забраната за социјалните медиуми, што предизвика насилни судири меѓу демонстрантите и полицијата, при што загинаа најмалку 19 лица, објави „Би-би-си њуз“.
Илјадници млади луѓе во понеделникот упаднаа во зградата на парламентот во главниот град Катманду барајќи владата да ја укине забраната за 26 платформи, вклучувајќи ги „Фејсбук“ и „Јутјуб“. Тие исто така повикаа на решителна борба против корупцијата што ја зафати земјата.
Одлуката за укинување на забраната беше донесена вчера за да се исполнат барањата на „Генерацијата З“, изјави министерот за комуникации и информации, Притви Суба Гурунг. Повеќе од 100 лица беа повредени во протестите, кои се проширија и во други градови.
Платформите за социјални медиуми, како „Инстаграм“, имаат милиони корисници во Непал и се клучна алатка за забава, информации и за бизнис. Владата ја оправда забраната, која беше воведена минатата недела велејќи дека е за борба против лажните вести, говорот на омраза и онлајн-измамите.
Но, младите луѓе што излегоа на улиците велат дека нивниот протест е и против авторитарниот став на владата. Многумина носеа транспаренти, на кои пишуваше „доста е“ и „крај на корупцијата“. Некои демонстранти фрлаа и камења кон куќата на премиерот во неговиот роден град Дамак.
Една од демонстрантите, Сабана Будатоки, претходно изјави за Би-би-си дека забраната за социјални медиуми е само изговор за собирање.
„Наместо да се забранат социјалните медиуми, мислам дека фокусот на сите е на корупцијата“, објасни таа додавајќи: „Ја сакаме нашата земја назад. Дојдовме да ја запреме корупцијата“.
фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Катар го прифати извинувањето на Нетанјаху

Катар го поздрави извинувањето и ветувањето на израелскиот премиер Бенјамин Нетанјаху дека Израел нема повторно да изврши напад врз Доха, соопшти Белата куќа.
Нетанјаху претходно денеска од Белата куќа телефонски разговарал со катарскиот премиер Мохамед бин Абдурахман Ал Тани, извинувајќи се за нападот насочен кон раководството на Хамас, со кој била нарушена катарската сувереност.
Во заедничкото соопштение беше потврдено дека е воспоставен „трилатерален механизам“ за подобрување на односите. Катарскиот премиер ги поздравил гаранциите од Израел, нагласувајќи ја подготвеноста на Доха за понатамошна соработка во интерес на регионалната безбедност и стабилност.
Свет
„Ројтерс“: Нетанјаху му се извинил на Катар за нападот врз Доха

Израелскиот премиер, Бенјамин Нетанјаху, се извинил на Катар поради израелскиот воздушен напад врз Доха од почетокот на месецов, во кој цел биле функционери на Хамас, јави „Ројтерс“.
Според извор близок до израелскиот премиер, тој телефонирал со катарскиот премиер Мохамед бин Абдурахман Ал Тани од Белата куќа, каде што во исто време американскиот претседател Доналд Трамп остварил контакт со Катар.
Извинувањето доаѓа во момент кога Нетанјаху престојува во Вашингтон на средба со Трамп. Главна тема е новиот мировен план од 21 точка, со кој се предвидува прекин на огнот, ослободување на израелските заложници и воспоставување ново управување со Газа без учество на Хамас.
Катар претходно го осуди израелскиот напад како „подмолен“ и „груб прекршок на меѓународното право“. Во исто време, Нетанјаху е под силен притисок да го прифати американскиот план кој ја исклучува анексијата на Западниот Брег и бара формирање нова палестинска влада.
Свет
Осомничениот во случајот со Медлин Мек Кен: „Вратете ми го животот!“

Кристијан Брукнер, осомничен во истрагата за исчезнувањето на Медлин Мек Кен, за првпат јавно проговори по излегувањето од затвор. Во интервју за „Скај њуз“ рече дека е жртва на „лов на вештерки“ и побара да му се врати нормалниот живот.
„Не се чувствувам слободен. Носам нараквица и под 24-часовен надзор сум. Сакам ова да престане и некој да преземе одговорност,“ изјави Брукнер.
Тој се обиде да влезе во канцеларијата на германскиот обвинител Ханс Кристијан Волтерс, кој претходно јавно тврдеше дека има докази дека Брукнер ја киднапирал и убил Медлин, иако призна дека тие не се доволни за подигнување обвинение.
Брукнер (49) неодамна беше ослободен по издржана казна за друго кривично дело. Германските медиуми јавуваат дека по неговото ослободување бил сместен во привремено живеалиште, но по јавниот притисок и протестите на граѓаните, бил преместен од градот Нојминстер.
На директно прашање дали има врска со исчезнувањето на британското девојче, Брукнер одговори дека по совет на адвокатите нема да зборува на таа тема.
Тригодишното девојче исчезна од апартмански комплекс во Праја да Луз во Португалија на 3 мај 2007 година, што предизвика истрага низ цела Европа и стана еден од најпознатите случаи на исчезнати лица. Нејзините родители вечерале со пријателите во блискиот ресторан додека таа и нејзините помали браќа и сестри близнаци спиеле во станот. Нејзината мајка Кејт открила дека Медлин ја нема околу 22 часот по локално време.
Случајот останува нерешен, но германските обвинители велат дека имаат докази кои сугерираат дека Брикнер можеби бил во областа кога исчезнала Медлин. Волтерс рече дека иако тој и другите обвинители не веруваат дека имаат доволно докази за формално да го обвинат Брикнер во случајот Меккен, нивните напори ќе продолжат.