Свет
Нетанјаху: Ние самите ги избравме целите во Иран, не ни ги диктираше САД
Израелскиот премиер Бенјамин Нетанјаху изјави дека Израел ги избрал целите што ги нападнал во Иран врз основа на сопствените национални интереси, а не диктирани од САД.
Канцеларијата на Нетанјаху издаде соопштение по извештајот на локалната телевизија дека Израел избегнал да ги гаѓа иранските гасни и нафтени постројки бидејќи Вашингтон го побарал тоа.
„Израел однапред ги избра целите на нападот според своите национални интереси, а не според американските диктати. Така беше, така ќе биде“, соопштија од неговиот кабинет.
Израел во саботата вечерта нападна цели во Иран, при што загинаа четворица ирански војници.
Израелските одбранбени сили (ИДФ) соопштија дека целеле на ракетни фабрики и други локации во близина на Техеран и во западен Иран рано во саботата.
Меѓународната агенција за атомска енергија (МААЕ) во саботата навечер потврди дека иранските нуклеарни постројки не биле погодени.
Израелската одмазда за нападот на Иран со речиси 200 балистички проектили истрелани врз Израел на 1 октомври се очекуваше со недели.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Путин: Ако Западот дозволи удари со долг дострел врз Русија, нашиот одговор ќе пристигне
Рускиот претседател Владимир Путин изјави дека Москва подготвува различни начини да одговори доколку Соединетите Држави и нивните сојузници во НАТО и дозволат на Украина да користи западно оружје со долг дострел за да напаѓа цели длабоко во Русија.
Украинскиот претседател Володимир Зеленски со месеци ги моли сојузниците на Киев да и дозволат на Украина да истрела западни ракети со долг дострел, вклучувајќи ги американските „АТАЦМС“и британските „Сторм шедоус“, длабоко во руската територија за да ја ограничи способноста на Москва да ја нападне неговата земја. Засега тоа го отфрла Западот, тврдејќи дека не сака дополнителна ескалација.
Кога Путин беше прашан дали земјите од НАТО ги слушнале неговите претходни изјави дека таквиот потег на оние кои го снабдуваат Киев со ракети со долг дострел директно ќе ги вовлече во војна, одговори: „Не ми кажаа ништо за тоа, но се надевам дека слушнаа“, рече Путин. „Бидејќи, се разбира, и ние ќе треба да донесеме некои одлуки за себе“, додаде тој.
Путин истакна дека е малку рано да се каже точно како, кога и каде Русија ќе одговори, но дека доколку се одобрат ударите со долг дострел, Москва ќе мора соодветно да одговори.
Путин рече дека само персонал од земјите на НАТО може да управува со специфичната опрема што ја сака Украина, бидејќи Киев ги нема потребните експерти. „Украинската армија не е способна сама да го направи тоа, не може“, рече Путин.
Свет
Се чини дека израелските напади и’ предизвикале сериозна штета на иранската војска, покажуваат некои проценки
Американски истражувач рече дека израелскиот воздушен напад погодил зграда која била дел од згасната програма за развој на нуклеарно оружје на Иран, а тој и друг истражувач изјавиле дека биле погодени и објекти што се користат за мешање на цврсто ракетно гориво.
Проценките врз основа на сателитски снимки беа направени одделно од поранешниот инспектор за оружје на ОН Дејвид Олбрајт и истражувачкиот аналитичар во вашингтонската тинк-тенк „Си-ен-еј“, Декер Евелет.
„Ројтерс“ објави дека Израел погодил згради во Парчин, огромен воен комплекс во близина на Техеран, како и Хоџир, голем капацитет за производство на ракети во близина на Техеран.
هكذا أقلعت طائرات سلاح الجو لتنفيذ الضربات المحددة والموجهة بدقة ضد الأهداف العسكرية في إيران pic.twitter.com/B07Xgdwy4H
— افيخاي ادرعي (@AvichayAdraee) October 26, 2024
„Ројтерс“ во јули објави дека Хоџир значително се шири. Евелет рече дека е можно израелските напади „значително да ја компромитираат способноста на Иран за масовно производство на ракети“.
Олбрајт изјави за Ројтерс дека сателитските снимки на Парчин покажале дека Израел оштетил три згради, вклучително и две каде се мешало цврсто гориво за балистички ракети.
Евелет рече дека снимката на Парчин од комерцијалната сателитска компанија Планет Лабс покажала дека Израел уништил три згради за мешање и складирање гориво за цврсти балистички ракети во големиот комплекс.
Снимката од Планет Лабс, исто така, покажа дека израелскиот напад уништил две згради во комплексот Хоџир каде што се мешало цврсто гориво за балистички ракети, рече тој.
Според него, со ограничената операција, Израел можеби значително ја загрозил способноста на Иран за масовно производство на ракети и го отежнал пробивањето во ракетната одбрана на Израел во секој иден ирански ракетен напад.
„Изгледа дека нападите се многу прецизни“, додаде.
Свет
Грузиската опозиција не ги признава изборните резултати. „Нè ограбија, ова е уставен удар“
Грузиската опозиција одбива да ги признае прелиминарните резултати од вчерашните парламентарни избори, според кои национално-конзервативната владејачка партија победи на изборите.
Лидерката на проевропската опозициска партија Обединето национално движење, Тина Бокучава, вчера вечерта ја обвини изборната комисија дека „вршела валкана работа за милијардерот Биџин Иванишвили“.
Иванишвили е основач и почесен претседател на владејачката партија Грузиски сон, која се залага за соработка со Русија и е резервирана за влез на Грузија во ЕУ.
Бокучава рече дека опозицијата во следните неколку часа ќе договори план за активности.
68-годишниот Иванишвили почна да ја слави победата на својата партија веднаш по затворањето на гласачките места.
Опозициската прозападна коалиција за промени исто така најави дека нема да ги признае резултатите.
„Изборите се украдени. Ова е уставен удар и злоупотреба на власта“, рече Ника Гварамиа на прес-конференција. Гварамиа тврди дека изборите биле наместени со помош на комплицирана технолошка шема, но не наведе детали.
Во земјава се регистрирани околу 3,5 милиони гласачи. Според прелиминарните податоци, одѕивот на гласачите бил околу 59 отсто. По пребројувањето на 70 отсто од гласачките ливчиња, Грузискиот сон, кој опозицијата го обвинува за проруски наратив, освои 53 отсто од гласовите наспроти 38,28 за блокот од четири проевропски партии, објави изборната комисија.
Брисел предупреди дека од исходот на овие избори ќе зависат шансите таа поранешна советска република на Кавказ со околу четири милиони жители да се приближи до ЕУ.