Свет
Нетанјаху: Се обидуваме да го намалиме бројот на убиени цивили во Газа, но безуспешно

Израел прави сѐ што може за да ги извлече цивилите од опасност додека се бори со Хамас во Газа, вклучително и фрлање летоци со предупредување да бегаат, но неговите обиди да ги минимизираат жртвите не беа успешни, изјави вчера израелскиот премиер, Бенјамин Нетанјаху.
Нетанјаху беше прашан од „Си-би-ес њуз“ дали убиството на илјадници Палестинци од страна на Израел како одмазда за нападот на милитантите на Хамас на 7 октомври ќе поттикне нова генерација на омраза.
„Секоја цивилна смрт е трагедија и не треба да ја имаме бидејќи правиме сѐ што можеме за да ги извлечеме цивилите од опасност, а Хамас прави сѐ за да ги држи во опасност“, рече Нетанјаху.
„Тоа е она што ние се обидуваме да го направиме: минимални цивилни жртви. Но, за жал, не сме успешни“.
„Затоа испраќаме летоци, им се јавуваме на мобилните телефони и им кажуваме да си одат. А многумина си заминаа“, додаде тој. Израел изјави дека целта на неговата воена кампања е уништување на Хамас. „Втората работа што можам да ја кажам е дека ќе се обидеме да ја завршиме таа работа со минимални цивилни жртви. Тоа е она што се обидуваме да го направиме: минимални цивилни жртви. Но, за жал, не сме успешни“, рече Нетанјаху.
Палестинските цивили го понесоа товарот од повеќенеделната воена кампања на Израел како одговор на нападот на Хамас, во кој Израел вели дека загинале 1.200 луѓе, главно цивили. Според Израел, Хамас зеде како заложници околу 240 луѓе од разни националности.
Министерство за здравство во Газа: Загинаа најмалку 11.500 луѓе
Здравствените власти во Газа, на кои им веруваат Обединетите нации, велат дека е потврдено оти загинале најмалку 11.500 луѓе во израелското бомбардирање и копнената инвазија, од кои повеќе од 4.700 се деца.
Две третини од 2,3 милиона жители на Појасот Газа останаа без покрив над главата поради војната. Вчера, израелските воздухопловни сили фрлија летоци во делови од јужна Газа во кои им кажуваа на луѓето да се евакуираат за своја безбедност.
Израел исто така користеше летоци во северниот дел на Газа за да ги предупреди цивилите да си заминат. Стотици илјади го сторија тоа во масовното раселување за кое многу Палестинци стравуваат дека може да стане трајно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Илон Маск – првиот полубилионер во светот

Илон Маск, директорот на компанијата „Тесла“, е првиот човек во историјата со богатство од повеќе од 500 милијарди долари (околу 425 милијарди евра).
Богатството на Маск накратко достигна 500,1 милијарда долари во попладневните часови на 1 октомври, по њујоршко време, за пред малку да падне на нешто над 499 милијарди долари, според листата на милијардери на Форбс.
Покрај „Тесла“, вредностите на другите компании на Маск исто така се зголемија, како што се стартапот во областа на вештачката интелигенција xAI и компанијата SpaceX.
Сето ова дополнително го зајакнува статусот на Маск како најбогат човек во светот, далеку пред конкурентите во глобалниот технолошки сектор.
Втор најбогат човек во светот моментално е Лари Елисон, основачот на технолошката компанија „Оракл“, чие богатство се проценува на околу 350,7 милијарди долари.
Елисон накратко го престигна Маск минатиот месец, кога акциите на „Оракл“ скокнаа за повеќе од 40 проценти, по оптимистичките деловни прогнози во областа на вештачката интелигенција.
Огромното богатство на Маск е главно поврзано со неговиот удел од над 12 проценти во „Тесла“, чии акции значително пораснаа оваа година.
Во среда, на затворањето на берзата во Њујорк, акциите на „Тесла“ пораснаа за повеќе од 3,3 проценти, а од почетокот на годината забележаа раст од повеќе од 20 проценти.
Инвеститорите позитивно реагираат на фактот дека Маск во последно време повеќе се посветува на своите компании, а помалку на политиката.
Неодамна, тој беше цел на критики за неговата работа со администрацијата на Трамп, првенствено со Одделот за владина ефикасност, кој беше задолжен за намалување на владините трошоци и бројот на вработени во јавниот сектор.
Маск, кој е и сопственик на социјалната мрежа Икс, често јавно ги искажува своите ставови за теми како што се имиграцијата и Програмата за разновидност, еднаквост и вклучување (DEI), што исто така предизвикува големо внимание.
Тој сега е целосно посветен на „Тесла“, изјави Робин Денолм, претседател на Управниот одбор на „Тесла“, во септември.
Управниот одбор, исто така, објави бонус од една милијарда за Маск ако постигне многу амбициозни цели во следните десет години.
За да го постигне ова, тој би морал да ја зголеми вредноста на „Тесла“ осум пати, да продаде милион роботи базирани на вештачка интелигенција, дополнителни 12 милиони автомобили и да исполни голем број други барања.
Минатиот месец, Маск објави дека купил акции на „Тесла“ во вредност од околу една милијарда долари, што многу инвеститори го протолкуваа како знак на доверба во иднината на компанијата.
Сепак, во последните години, „Тесла“ се соочи со сериозна конкуренција, првенствено од кинескиот гигант BYD, како и со предизвици поврзани со трансформацијата во компанија што се занимава со вештачка интелигенција и роботика.
Фото: принтскрин
Свет
Орбан: Цврсто ќе ја бранам позицијата на Унгарија за Украина

Унгарскиот премиер Виктор Орбан денес изјави дека на самитот во Копенхаген „цврсто ќе стои зад унгарската позиција“ за Украина, посочувајќи дека лидерите на ЕУ сакаат да финансираат испораки на оружје и да го забрзаат пристапувањето на Украина во Унијата.
„Копенхаген, втор ден. Ситуацијата е сериозна. На маса има отворени предлози за војна. Тие сакаат да ѝ ги предадат средствата од ЕУ на Украина. Тие се обидуваат да го забрзаат пристапувањето на Украина со секакви правни трикови. Тие сакаат да ја финансираат испораката на оружје“, рече унгарскиот премиер на социјалните мрежи и нагласи дека „цврсто“ ќе стои зад унгарската позиција, објави Ројтерс.
По вчерашниот неформален самит на лидерите на ЕУ со фокус на заедничката одбрана и поддршката за Украина, денес во Копенхаген ќе се одржи самит на Европската политичка заедница (ЕПЗ), каде што ќе се дискутира за безбедноста, трговијата со луѓе и миграцијата, со учество на околу 40 шефови на држави или влади.
Фото: принтскрин
Свет
Израел објави фотографии од активистите: Пловат кон Израел, ќе ги депортираме во Европа

Израел објави дека активистите од флотилата, која Израел ја нарекува „Хамас-Сумуд“, пловат безбедно и мирно кон Израел, каде што ќе започне нивната постапка за депортација во Европа.
„Сите се безбедни и во добра здравствена состојба“, објави израелското Министерство за надворешни работи. Грета Тунберг е, исто така, на една од фотографиите.
Hamas-Sumud passengers on their yachts are making their way safely and peacefully to Israel, where their deportation procedures to Europe will begin. The passengers are safe and in good health. pic.twitter.com/pzzitP5jN8
— Israel Foreign Ministry (@IsraelMFA) October 2, 2025
Само еден од 44-те бродови во флотилата сè уште плови кон Газа. Според флотилата, 40 бродови биле пресретнати од израелски војници, два брода за логистичка поддршка претходно отстапиле од својот курс, додека бродот што влегол во територијалните води кај Газа не се поместил со часови.
Индекс.хр објави дека бродот „Ширин“, кој им обезбедува правна помош на бродовите во флотилата, вчера морал да отстапи од својот курс и денес е во мирување. Капетан на бродот е хрватската адвокатка Морана Миљановиќ. Според флотилата, израелските војници не се качиле на овој брод.
Исто така, сите преноси во живо од бродовите на флотилата се исклучени.