Свет
Никој не знае каде летува канцеларката – Меркел исчезна од радарот на германските медиуми
Каде е канцеларката Ангела Меркел е прашање кое деновиве се обидуваат да го одгатнат германските медиуми и тамошната јавност. Фактот дека германската канцеларка летото го користи за да одмара не е никаква новост, но за новост може да се смета тоа што овој пат слободните денови не ги минува заедно со сопругот Јокаим Сауер во Јужен Тирол, како што тоа обично го прави, и тоа во присуство на медиумите.
Наместо тоа, медиумите годинава се изненадени од нејзиното „исчезнување“.
Имено, Сауер го поминува својот одмор со синот од првиот брак, во хотел, во кој изминатите години друштво му правеше и Меркел.
Ваквата ситуација беше повод весникот „Билд“ да шпекулира за причините за одвоениот одмор.
Новинарите од „Билд“ се прашуваат каде е Меркел, дали таа одмара сама на нова локација, непозната за медиумите, или е кај нејзината мајка во Укермарк. Весникот остава можност и дека германската канцеларка можеби е на некоја тајна мисија.
Во исто време, „Билд“ ги запраша своите читатели дали канцеларката има право едноставно да исчезне од очите на јавноста.
Други медиуми имаат разбирање за исчезнувањето на канцеларката, па така „Зидвест Пресе“ пишува дека смирувачки делува фактот што годинава дури и шефицата на германската влада може, барем на кратко, да се повлече од јавноста.
Нејзиното последно јавно појавување беше на 25. јули на фестивалот Вагнер во Бајрот, а следниот термин за кој се најавени нејзини обврски е 20. август.
Дневниот весник „Минхер Меркур“ наведува дека Меркел била видена во Минхен во вторникот за време на оперска претстава и тоа не во посебна ложа, туку меѓу другите посетители.
Инаку, Меркел, на летната прес-конференција објави дека годинава ќе замине на одмор од неколку дена, за време на кој планира добро да се наспие.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас предаде тела, Израел порачува: „Борбата за нашите заложници не запира“
Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.
Свет
Медведев го нарече белгискиот министер „имбецил“, Франкен му возврати со песна на Селена Гомез
Белгискиот министер за одбрана Тео Франкен влезе во вербален судир со поранешниот руски претседател и сегашен заменик-претседател на Советот за безбедност на Русија, Дмитриј Медведев.
Се започнало кога Франкен изјавил дека, доколку Русија ја нападне Белгија, „НАТО би ја израмнил Москва со земја“. На тоа, Медведев остро реагирал, нарекувајќи го „имбецил“ и потсетувајќи дека оваа недела Русија го тестирала нуклеарното суперторпедо „Посејдон“, кое го опишал како „вистинско оружје на судниот ден“.
Франкен утрово возвратил преку Инстаграм: „Главниот руски насилник не престанува да се заканува и навредува. НАТО не е во војна со Русија, но принципот на одмазда е неприкосновен веќе 76 години. Не повлекувам ниту збор.“
На крајот, министерот ја споделил песната „Calm Down“ од Селена Гомез со порака до Медведев – да се „смири“.
Свет
Зеленски: Новите санкции ќе ѝ донесат на Русија загуби од најмалку 50 милијарди долари годишно
Украинскиот претседател Володимир Зеленски изјави дека новите санкции против Русија ќе ѝ предизвикаат годишни загуби од најмалку 50 милијарди долари, пренесе „Укринформ“.
Тој се повика на извештај на шефот на украинската надворешна разузнавачка служба Олег Ивашченко и рече дека санкциите против нафтените компании веќе создаваат сериозни финансиски последици за Москва.
Зеленски изрази надеж дека ќе следат и нови санкциски мерки, нагласувајќи дека арапските земји со своите испораки нафта можат да спречат какви било потреси на светскиот пазар.
Тој додаде дека Украина сојузниците редовно ги информира за лица и структури што заслужуваат санкции и дека „голем дел од нашите предлози се земаат предвид“.
На 23 октомври високата претставничка на ЕУ за надворешна политика Каја Калас објави дека е одобрен 19-от пакет санкции против Русија, а американското министерство за финансии веќе воведе мерки против „Росњефт“ и „Лукоил“. Зеленски претходно изјави дека американските санкции би можеле да ги намалат руските приходи за околу 5 милијарди долари месечно.

