Свет
Нилски коњ голтна, па плукна дете, момчето го спаси случаен минувач
Необичен инцидент се случил во Уганда кога двегодишно момче било проголтано и исплукано од нилски коњ додека си играло во близина на својот дом крај езерото.
Пол Ига бил во устата на нилски коњ на само неколку стотини метри од работ на езерото Едвард во Уганда, јавуваат странските медиуми.
За среќа, локалниот жител Криспас Багонза бил сведок на инцидентот и почнал да го гаѓа нилскиот коњ со камења во обид да го спречи да го изеде детето.
Нилскиот коњ, веројатно, бил изненаден од ова и го плукнал детето пред да се врати во водата.
Пол за чудо го преживеал овој грозоморен напад по што бил пренесен на лекување во клиника. Тој помина со неколку полесни повреди. Момчето наводно било однесено во болница во Бвера, но било пуштено кога примило вакцина против беснило.
„Ова е прв ваков инцидент во кој нилски коњ излегол од езерото Едвард и нападнал мало дете“.
Потребна била храброст на еден Крипас Багонза, кој бил во близина, да ја спаси жртвата откако го каменувал нилскиот коњ и го исплашил принудувајќи го да ја ослободи жртвата од устата, се вели во соопштението на локалната полиција.
Се проценува дека нилските коњи убиваат најмалку 500 луѓе годишно во Африка, пренесе „Новости.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Песков: Русија ги осудува убиството на лидерот на Хезболах и нападите врз Либан
Русија ги осудува убиството на лидерот на Хезболах, Хасан Насрула, и израелскиот напад врз Либан и верува дека тоа доведе до значителна дестабилизација на регионот на Блискиот Исток, изјави денеска портпаролот на Кремљ, Дмитриј Песков.
„Руската страна ги осудува сличните акции. Сметаме дека тие доведоа до значително дестабилизација на ситуацијата во регионот“, рече Песков одговарајќи на новинарско прашање, пренесува „РИА новости“.
Песков изјави дека неселективното бомбардирање станбени области во Либан доведува до огромен број жртви, што ќе резултира со хуманитарната катастрофа што ја гледаме во Газа, пренесува „Танјуг“.
Од минатата недела израелските воздухопловни сили вршат масовни напади врз цели на Хезболах во Либан, пишува медиумот.
Израелски авиони извршија и неколку целни воздушни напади врз Бејрут, во кои беше убиен и лидерот на Хезболах, Хасан Насрала.
Свет
Објавено драматично видео од последиците од ураганот Хелен: „Ова е постапокалиптично“
Новите снимки откриваат огромни штети во Северна Каролина по ударот на ураганот Хелен, кој ја опустоши американската сојузна држава предизвикувајќи катастрофални поплави. Членот на градскиот совет на Шарлот, Тарик Бохари, сподели фотографија од езерото Луре преполно со отпадоци опишувајќи ја сцената како постапокалиптична.
Ураганот Хелен, кој на крајот на минатата недела ги опустоши југоисточните држави на САД, предизвика катастрофални поплави од Флорида до Вирџинија, огромни материјални штети и според последните податоци однесе најмалку 90 животи.
Жителите на југоисточните американски држави почнаа со санирање на штетите откако милиони луѓе останаа без струја, а беа уништени домови, патишта и мостови.
Најмалку 90 луѓе ги загубија животите во невремето, пресмета „Ројтерс“ врз основа на податоците на локалните власти во Јужна и Северна Каролина, Флорида, Џорџија, Вирџинија и Тенеси. Си-ен-ен, пак, јавува за вкупно 93 загинати лица.
Според последните податоци, најмногу луѓе, од кои 36, починале во Северна Каролина. Јужна Каролина пријавила 25 смртни случаи, Џорџија – 17, а Флорида – 11. Вирџинија пријавила два смртни случаја, како и Тенеси.
Се стравува дека бројот на загинати може да биде поголем. Осигурителните компании проценуваат дека штетата предизвикана од ураганот Хелен би можела да изнесува меѓу 15 и повеќе од 100 милијарди долари.
Свет
„Не можам повеќе ни да плачам од толку многу тага“ – над 6.000 луѓе во Романија евакуирани поради поплавите
Повеќе од 6.000 луѓе од 28 населени места се евакуирани, повеќето од округот Галаци, поради неповолните временски услови, објави Генералниот инспекторат за вонредни состојби (ИГСУ) истакнувајќи дека се потребни интервенции на 116 места во 29 окрузи поради последиците од обилните дождови и ветерот.
Еден по еден жителите на населбите од областа Галаци жандармеријата ги носеше во спортска сала откога невремето го уништи нивниот имот.
„Не можам повеќе ни да плачам од толку тага. Поплави, господине! Нè уништија поплави. Третпат. Два и пол метра вода. Сè е уништено“, рекла една старица.
„Седиме тука за да не нè фати пак дождот и повеќе не размислуваме дека водата ќе дојде и ќе нè однесе. Седиме тука. Тоа е тоа! Што да правиме? Водата беше до покривот од куќата немам телефон да ви покажам слики за да можете да видите“, рече еден жител.
Со солзи во очите, дури и далеку од опасност, луѓето цела ноќ не можеа да ги затворат очите. Како што велат, повторно го преживуваат ужасот што ги снашол.
„Сè во куќата е уништено, ѕидовите испукани, до висина на мојата глава. Го молам Бога да не дојде вечерва водата за да се вратам дома“.
„Се надевавме дека водата нема повторно да дојде, но две недели подоцна, ете ја повторно. Ги напуштивме животните, оние што преживеаја минатиот пат, оние што успеавме да ги спасиме. Не сме завршиле со чистење на калта, ништо не сме завршиле“, рекоа мештаните.
Од паднатите дрвја оштетени се 14 возила и два објекта. Спасени се 11 лица што беа блокирани на шумскиот пат во Ковасна. Поморскиот и речниот сообраќај е прекинат.