Свет
Ноам Чомски: Русија во Украина се однесува похумано од САД во Ирак

Американскиот интелектуалец и лингвист Ноам Чомски, децениски критичар на американската надворешна политика, во интервју за неделникот „Њу Стејтсмен“ вели дека Русија се однесува воздржано и умерено во Украина.
Познатиот американски интелектуалец, лингвист, филозоф, писател и професор Чомски е еден од најгласните критичари на надворешната политика на Соединетите Американски Држави по Виетнамската војна.
Неговиот есеј „Одговорноста на интелектуалците“ од 1967 година ја осуди американската интелектуална елита, особено општествените научници и технократите од Вашингтон, бидејќи, како што веруваше Чомски, и помогна на тогашната американска администрација да ги „измие рацете“ од неприфатливите воени потфати и да ги оправда злосторствата извршени во Виетнам.
Иако, 56 години подоцна, конфликтот во Украина е сосема поинаков од војната во Виетнам и Соединетите Американски Држави не војуваат на странска територија, туку поддржуваат суверена земја која е нападната од Русија, Чомски е подеднакво критичен кон Американската политика, но и на Украина, каде што е роден татко му, пред да емигрира во САД во 1913 година.
Во интервју за неделникот Њу Стејтсмен, Чомски вели дека САД и Велика Британија ги отфрлаат преговорите во Украина заради нивните национални интереси, иако земјата е веќе сериозно уништена од војната.
„Украина не е слободен актер, зависи од тоа што ќе определи САД“ истакнува Чомски и вели дека САД го снабдуваат Киев со оружје само за да ја ослабат Русија.
„За САД сето ова е евтино. За само дел од колосалниот воен буџет, тие се способни сериозно да ги деградираат воените сили на нивниот единствен вистински воен противник“, објаснува Чомски.
Смета дека Русија се однесува воздржано и умерено. Тој го споредува руското војување во Украина со американската инвазија на Ирак во 2003 година, тврдејќи дека во Украина не се случило големо уништување на инфраструктурата.
„Несомнено, Русија би можела да го направи тоа, веројатно со конвенционално оружје. Може да го направи Киев неодржлив, како што беше Багдад, може да ги нападне линиите за снабдување во западна Украина“, истакнува Чомски.
На прашањето дали тој имплицира дека Русија се бори во Украина похумано отколку што САД се борат во Ирак, Чомски вели дека тоа е сосема очигледно.
Тој посочува дека делегациите на Обединетите нации морале да се повлечат кога започнала инвазијата на Ирак бидејќи нападот бил толку сериозен и екстремен.
„Тоа е американски и британски стил на војување. Погледнете ги жртвите. Сè што знам се официјалните бројки, а официјалните податоци од Обединетите нации велат дека има околу 8.000 цивилни жртви во Украина. Колку цивилни жртви имаше кога САД и Британија го нападнаа Ирак?“, прашува Чомски.
Тој нагласува дека доказ за воздржаноста на Русија е и бројот на странски функционери кои отпатувале во Киев од избувнувањето на војната.
„Кога САД и Британија го уништија Багдад, отиде ли некој странски лидер во посета? Не, затоа што кога САД и Британија влегуваат во војна, фаќаат право за гуша. Уништуваат сè – комуникации, транспорт, енергија, се што прави општеството да функционира“, набројува Чомски.
На прашањето како би можело да изгледа потенцијалното решение за војната во Украина, Чомски вели дека, пред се, Украина никогаш нема да биде членка на НАТО алијансата.
„Ова е црвената линија на која инсистираше секој руски лидер, од поранешниот руски претседател Борис Елцин до поранешниот советски лидер Михаил Горбачов. Украина го добива статусот на Австрија за време на Студената војна или Мексико денес. Мексико не може да се приклучи на воен сојуз кој е непријателски настроен кон САД. Нема договор за тоа, но тоа е совршено очигледно“, објаснува Чомски.
Тој ја коментираше и желбата на Шведска и Финска да станат членки на НАТО алијансата. Иако двете земји експлицитно ја наведоа инвазијата на Украина како причина за нивното барање за приклучување, Чомски вели дека тврдењата дека Русија може да и се закани на која било земја се западна пропаганда.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Бели дробови од свиња трансплантирани на човек во Кина

Првпат во историјата хирурзи во Кина успешно трансплантираа бели дробови од генетски модифицирана свиња во човек, што претставува огромен чекор во децениските истражувања за ксенотрансплантација – трансплантација на органи помеѓу разни видови.
Научниците од Медицинскиот универзитет „Гуангжу“ во Кина велат дека нивната работа е првиот документиран пример за трансплантација на бели дробови од разни видови.
Белите дробови беа трансплантирани на 39-годишен маж, кој клинички беше прогласен за мозочно мртов по мозочен удар. Органот остана функционален девет дена демонстрирајќи го потенцијалот за идна употреба на свински бели дробови кај луѓето.
Ова истражување покажува дека свинските бели дробови може да ги одржат виталноста и функционалноста во човечкото тело, иако употребата на животински органи кај живи пациенти е веројатно сè уште оддалечена децении, објавува „Дејли мејл“.
Белите дробови на кинеската свиња бама сјанг беа генетски модифицирани со CRISPR-технологијата за да се отстранат антигените што би можеле да предизвикаат отфрлање од страна на човечкиот имунолошки систем. CRISPR е иновативен, но контроверзен метод, што прави прецизни сечења во ДНК, а потоа користи природни процеси на поправка на ДНК за да ги модифицира гените на посакуваниот начин.
Потоа белите дробови на свињата биле трансплантирани кај човек што бил прогласен за мозочно мртов. Ваквите пациенти законски се сметаат за починати, иако машината за дишење ги одржува срцето и белите дробови во функција.
Имунолошкиот систем на примателот не ги отфрлил веднаш свинските бели дробови, но знаци на оштетување биле забележани уште 24 часа по трансплантацијата, а знаци на отфрлање органи се појавиле на третиот и на шестиот ден. Поради ова, експериментот бил прекинат на деветтиот ден.
Резултатите објавени во стручното списание Nature Medicine покажуваат дека ксенотрансплантацијата на белите дробови не е невозможна.
„Нашата студија покажува дека свинските бели дробови може да ги одржат виталноста и функционалноста кај примателите со мозочна смрт до 216 часа“, велат научниците.
Оваа техника е дел од поширок тренд во медицината, каде што бубрегот, срцето и црниот дроб на свињите претходно биле трансплантирани на луѓе, а примателот на свинскиот орган живеел најдолго, 60 дена, со генетски модифициран бубрег.
Белите дробови се особено тешки за трансплантација поради големата изложеност на надворешен воздух и крв, што ги прави подложни на имунолошки напад и инфекции. Сепак, анатомската сличност помеѓу свињите и луѓето го прави овој вид истражување многу ветувачки.
Научниците истакнуваат дека ова истражување е важен чекор кон решавање на глобалниот недостиг на органи и го отвора патот за идните клинички промени кај пациенти на кои им се потребни бели дробови. Понатамошната работа ќе се фокусира на оптимизација на имуносупресивната терапија, дополнителна генетска модификација и стратегии за зачувување органи, со цел да се овозможи трансплантација кај живи пациенти, пренесува медиумот.
Свет
Руски научници развија ново соединение за борба против ракот

Експерти од Државниот универзитет во Мари и Федералниот истражувачки центар „Уфа“ при Руската академија на науките развија ново хемиско соединение што би можело да стане основа за создавање иновативни лекови против тумори, објави Министерството за наука и образование на Русија.
Ова соединение дејствува селективно на туморските клетки, речиси без да ги оштети здравите клетки, а неговата молекуларна структура комбинира фенотијазинска и трифенилфосфониумска група.
Благодарение на оваа комбинација соединението ја таргетира слабата точка на туморските клетки – митохондриите и ја нарушува нивната работа, објавува „РИА новости“.
„Резултатите од истражувањето покажаа дека новото соединение ефикасно го потиснува растот на разни малигни клетки, вклучувајќи рак на црниот дроб, аденокарцином на белите дробови, колоректален карцином и леукемија. Активноста се манифестира дури и при ниски концентрации, што го прави соединението особено ветувачко за развој на лекови“, рече Константин Белослудцев, доктор по биолошки науки и проректор за иновации на Државниот универзитет во Мари, објавува „Танјуг“.
Како дополнителна предност, Белослудцев ја истакна едноставноста на синтезата на соединението, што овозможува негово производство во доволни количини за претклинички и клинички испитувања. Овие студии се спроведени во рамките на програмата „Приоритет 2030“, пренесува медиумот.
Свет
Стаб: Се надевам дека кај Трамп набргу ќе го снема трпението за Путин

Финскиот претседател Александар Стаб денес изјави дека се надева дека трпението на американскиот претседател Доналд Трамп со рускиот претседател Владимир Путин наскоро ќе исчезне и додаде дека европските земји ќе продолжат да се залагаат за траен мир во Украина.
Според него, единствениот начин да се принуди Путин да ја заврши војната во Украина е преку неговите сојузници, со проценка дека оние кои можат да го убедат рускиот претседател да постигне примирје се на Истокот, објавува „ Ile“.
Финскиот претседател, исто така, рече дека го предупредил Трамп дека Путин користи „типични руски тактики на одложување“ за да избегне средба со украинскиот претседател Володимир Зеленски.
Фото: принтскрин