По земјотресот што го погоди Мјанмар, неколку земји испратија спасувачки тимови да помогнат во потрагата и спасувањето.

Кина вчера испрати спасувачки тим од 82 члена во Мјанмар, а друг тим во трговскиот центар Јангон.

Хонг Конг денеска испрати тим од 51 член, со кучиња трагачи, специјализирана опрема и уреди за откривање живот.

Индиски хуманитарен авион слета во Мјанмар со тим за пребарување и спасување, комплети за хигиена, ќебиња и пакети со храна.

Малезиското Министерство за надворешни работи соопшти дека испраќа тим од 50 луѓе.

Други земји кои испратија спасувачки тимови се Филипините, Виетнам, Индонезија, Ирска, Јужна Кореја и Нов Зеланд.

Каника трпеливо чека покрај облакодерот од раните утрински часови во саботата. Нејзиниот сопруг Јотин работел како главен електричар на 24-ти кат на недовршен облакодер кога зградата се урнала за време на земјотресот. И двајцата се во средината на триесеттите години и потекнуваат од село во северен Тајланд.

Јотин дошол во Бангкок да работи на градилиште и да испрати пари на своето семејство. По земјотресот, Каника патувала повеќе од 300 километри за да чека вест за нејзиниот исчезнат сопруг. Тој е еден од илјадниците работници во Тајланд кои доаѓаат во главниот град во потрага по подобра иднина за своите семејства.

„Ќе останам овде додека треба“, вели таа, бришејќи ги солзите. Нивните две деца, петгодишно и дванаесетгодишно, моментално се со нејзината сестра во нејзиниот роден град.

„Помладиот постојано прашува зошто тато не се јавува. Тој е многу добар човек и многу добар татко. Ние сме заедно многу години. Се молам да го најдат жив“, рече таа.

Сирискиот претседател Ахмед Ал Шара ја претстави новата преодна влада, клучен чекор во транзицијата од долгогодишното владеење на семејството Асад и во подобрувањето на врските на Сирија со западните земји, јави Ројтерс.

Новите власти во Сирија, предводени од исламистите, беа под притисок на Западот и арапските земји да формираат влада која подобро ќе ја одразува етничката и религиозната различност во земјата. Овој притисок дополнително се зголеми по убиствата на стотици алавити, заедницата од која доаѓа соборениот лидер Башар Ал Асад.

Мухамед Јоср Бернија беше назначен за министер за финансии, додека Кристијан Хинд Кабават ја презеде функцијата министер за социјални работи и труд. Владата го задржа Мурхаф Абу Касра како министер за одбрана и Асад Ал-Шибани како министер за надворешни работи, кој исто така ги имаше овие улоги во претходната привремена влада формирана по соборувањето на Асад во декември.

Новата уставна декларација ги гарантира правата на жените и слободата на изразување. Ал Шара беше назначен за привремен претседател во јануари и вети дека ќе формира инклузивна преодна влада која ќе работи на обновата на уништените јавни институции во Сирија и ќе управува со земјата до изборите, за кои рече дека може да потрае и до пет години. Новата влада нема да има премиер, а се очекува Ал Шара да преземе водечка улога во извршната власт.

Претходно овој месец, Сирија усвои уставна декларација што ќе послужи како основа за преодниот период под водство на Шаријатот. Декларацијата ја задржува централната улога на исламскиот закон, но ги гарантира правата на жените и слободата на изразување.