Коронавирусот може да преживее на голем број различни површини многу подолго отколку што се сметаше порано, покажа неодамнешно истражување.

Коронавирусот може да преживее цели 28 дена, односно да ја задржи можноста од инфекција, на површините со кои секојдневно доаѓаме во контакт – мобилни телефони, банкноти и нерѓосувачки челик, пренесува Би-Би-Си.

Сепак, некои експерти се скептични во врска со заканата од заразување преку различни површини во секојдневниот живот.

Вирусот најчесто се пренесува со кашлање, кивање или зборување, потсетува Би-Би-Си.

Претходните студии покажаа дека вирусот може да преживее два до три дена на банкноти и стакло и до шест дена на пластика и нерѓосувачки челик.

Но, неодамнешното истражување на австралиската агенција ЦСИРО открива дека вирусот е „екстремно отпорен“ и ја задржува можноста за зараза до 28 дена на мазни површини, како што е стакло од кое се прават екраните на мобилните телефони и на банкнотите. Истражувањето е направено при температура од 20 степени Целзиусови. За споредба, вирусот на грип може да преживее 17 дена во исти околности, според Би-Би-Си.

Експериментите биле спроведени во темница, бидејќи се покажа дека ултравиолетовото зрачење го убива вирусот.

„Утврдувањето колку долго може вирусот да остане активен на различни површини ни помага попрецизно да го предвидиме или забавиме неговото ширење“, рече извршниот директор на ЦСИРО, д-р Лери Маршал.

Но, професорот Рон Еклс, поранешен директор на Центарот за настинки на Универзитетот Кардиф, ја критикуваше австралиската студија и рече дека тврдењето дека вирусот може да преживее 28 дена на мобилните телефони и на банкнотите предизвикува „непотребен страв во јавноста“.

„Вирусите завршуваат на површините од слуз што доаѓа од кашлање и кивање или валкани раце, а во оваа студија не се користела свежа човечка слуз како метод за пренесување на вирусот. Имено, свежата слуз е непријателска средина за вирусите бидејќи содржи многу бели крвни клетки кои произведуваат ензими кои уништуваат вируси, а исто така може да содржат антитела и други хемикалии кои ги неутрализираат вирусите“, рече проф. Екли.

„Според мене, заразните вируси во слузта на површините можат да преживеат со часови, но не и со денови“, додаде тој.

Минатата недела, Моника Ганди, професор по медицина на Универзитетот во Калифорнија, рече дека коронавирусот не се шири низ површините.

„На почетокот на пандемијата, постоеше многу страв од пренесување на вирусот преку површини. Сега знаеме дека клучот за ширење не е допирање на површини и последователно допирање на очите. Вирусот се шири кога сте во близина на некој што го исфрла од устата и носот”, рече Ганди.