Свет
Новинарот Вудворд во новата книга го опишува хаосот во Белата куќа

Новата книга на легендарниот новинар Боб Вудворд, „Страв: Трамп во Белата куќа“, содржи сведочења на вработени во администрацијата, го прикажува американскиот претседател, Доналд Трамп, како опасно неупатен во светските прашања, а неговата Бела куќа како дисфункционална и преокупирана со внатрешните спорови.
Книгата е заснована на стотина часови со луѓе кои од прва рака учествувале во 20-месечното претседателствување на Трамп.
Американскиот лидер е опишан како човек опседнат со кривична истрага во врска со прашањето дали ја опструирал правдата обидувајќи се да ја спречи истрагата на специјалниот обвинител Роберт Милер за руското мешање во претседателските избори во 2016 година, пренесе „Глас на Америка“.
Во еден момент, како што пишува Вудворд во книгата, адвокатот на Трамп, Џон Дауд, организирал симулирано испитување на Трамп за врските на неговиот изборен штаб со Русија и неговите потези на функцијата претседател, но Трамп многупати се сопна на фактите, што на крајот изгуби контрола и се разбесни.
„Таа работа е проклета измама“, рече Трамп за истрагата додека вежбата за сведочењето заврши со неговата реченица: „Навистина не сакам да сведочам“.
Според пишувањето на Вудворд, Дауд му рекол на Трамп дека ќе заврши во портокалово затворско одело ако сведочи пред Милер.
Неколку месеци подоцна, како што наведува Вудворд, Трамп му рекол на Дауд: „Би бил навистина добар сведок“.
„Не сте добар сведок. Господине претседателе, се плашам дека едноставно не можам да ви помогнам“, одговорил Дауд.
Следното утро Дауд даде оставка во тимот на адвокати на Трамп.
Сегашните адвокати на Трамп со месеци преговараа со правниот тим на Милер, кој, пак, сака да разговара со претседателот, но сè уште не е постигнат договор за тоа.
Вудворд, кој пред повеќе децении како млад репортер на „Вашингтон пост“ напиша истражувачки текстови за корупција во Белата куќа, кои доведоа до оставка на претседателот Ричард Никсон, се повикува на актуелни и поранешни претставници на Белата куќа, кои многу негативно зборуваат за Трамп, наведувајќи дека не го интересира дека неговите чекори како претседател би можеле да ја загрозат светската безбедност и дека често не е запознаен со општо познати факти.
Обидите на Вудворд да добие интервју со Трамп беа неуспешни, иако претседателот се обиде да разговара со новинарот откако тој ја заврши книгата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Свет
Изнајмувач на Airbnb со вештачка интелигенција креирал штети во станот и барал 12.000 фунти отштета од станарката

Жена од Лондон добила извинување и поврат на средства од речиси 4.300 фунти од компанијата Airbnb, откако домаќин во Њујорк лажно ја обвинил дека предизвикала штета од над 12.000 фунти, пренесува Гардијан. Тој приложил фотографии како наводен доказ, кои, според жената, биле создадени со вештачка интелигенција.
Жената го резервирала еднособниот стан на Менхетен во Њујорк за два и пол месеци за да остане во него додека студира, но решила да замине порано бидејќи се чувствувала небезбедно во областа.
Кратко по нејзиното заминување, домаќинот поднел жалба до Airbnb, тврдејќи дека направила штета во вредност од над 12.000 фунти. Навел дека искршила масичка за кафе, душекот го извалкала со урина, оштетила робот правосмукалка, софа, микробранова печка, телевизор и клима-уред. Притоа, приложил и фотографии.
Airbnb ѝ соопштил дека, „по внимателен преглед на фотографиите“, треба да му плати 5.314 фунти на домаќинот. Таа поднела жалба и истакнала дека има очевидец, кој може да потврди дека станот бил оставен во уредна состојба. Дополнително, укажала на јасни визуелни несогласувања во фотографиите, што, според неа, укажувало на дигитална манипулација или употреба на вештачка интелигенција, пишува Гардијан.
„Такви несогласувања не се можни на автентични фотографии од ист објект. Тоа требаше да биде веднаш препознаено од Airbnb“, изјавила таа.
Пет дена по обраќањето на Гардијан до Airbnb, компанијата ја прифатила нејзината жалба. Прво ѝ понудиле 500 фунти, а потоа уште 854 фунти, што претставувало помалку од една петтина од вкупната цена на резервацијата. Откако жената одбила, на крајот ѝ била рефундирана целата сума од 4.269 фунти, а негативната оценка што домаќинот ја оставил на нејзиниот профил била отстранета.
„Загрижена сум за другите корисници кои можеби немаат ресурси да се одбранат од вакви измами. Денес е премногу лесно да се фалсификуваат фотографии со помош на вештачка интелигенција. Airbnb мора да има поостри критериуми за проверка“, изјавила таа за Гардијан.
Домаќинот што ја пријавил има статус на „супердомаќин“, што значи дека има искуство и високи оценки од претходни гости. Тој не одговорил на барањата од Гардијан за коментар.
Од Airbnb изјавиле дека не можеле да ја потврдат автентичноста на испратените фотографии и дека домаќинот добил предупредување за кршење на правилата. Доколку повторно добијат слична пријава, тој ќе биде отстранет од платформата.
„Сериозно ги сфаќаме пријавите за штета. Нашиот специјализиран тим ги разгледува сите достапни докази, а одлуките може да се обжалат“, изјавиле од компанијата за Гардијан.
Серпил Хол, директорка за економски криминал при консултантската фирма Baringa, објаснила дека денес е многу лесно да се манипулираат фотографии и видеа. Софтверите за оваа цел се евтини, достапни и лесни за користење.
„Многу компании веќе не ги прифаќаат фотографиите како единствен доказ во спорови“, рекла таа и додала дека „потребни се форензички алатки и системи за откривање измами, за да се потврди нивната веродостојност“.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија