Свет
Нови судири меѓу Израел и Хамас во Газа, меѓународните посредници работат на прекин на огнот

Израелските војници и палестинските вооружени лица се судрија во Појасот Газа за време на викендот, а меѓународните посредници се обидоа да ги забрзаат разговорите за прекин на огнот за да го спречат ослободувањето на заложниците и палестинските затвореници на Хамас за време на рамазан.
Договорот за прекин на огнот не изгледаше веројатен со оглед на израелските најави за проширување на опсегот на своите операции за уништување на Хамас, а исламистичката група остана на своите барања за итен прекин на петмесечната војна.
Жителите на Газа изјавија дека израелските сили гранатирале неколку области на споменатата енклава, а за тоа време тенкови влегле во Беит Лахија. Војници и вооружени лица се бореле во северниот дел на градот Газа.
Најмалку 86 Палестинци се убиени во израелските напади во изминатите два дена, според медицинскиот персонал. Од друга страна, израелската армија соопшти дека двајца војници загинале во конфликтот на југот на Газа и дека нејзини војници убиле и притвориле група палестински вооружени напаѓачи.
Израелскиот премиер Бенјамин Нетанјаху свика состанок на воениот кабинет во саботата, каде што највисоките разузнавачки претставници ги информираа за исходот од разговорите со катарските, египетските и американските посредници во Париз за евентуален втор прекин на огнот во Газа.
Советникот за национална безбедност на Белата куќа, Џејк Саливан, изјави за Си-eн-eн дека преговарачите од САД, Египет, Катар и Израел постигнале начелен договор за основните елементи на договорот за ослободување на заложниците што ги држи Хамас.
Споменатиот договор сè уште не е запечатен, додаде Саливан, бидејќи сè уште се очекуваат индиректни разговори меѓу Хамас, од една страна, и Катар и Египет, од друга.
Нетанјаху за Си-би-ес изјави дека сè уште не е сигурно дали разговорите во Париз навистина ќе резултираат со конечен договор за ослободување на заложниците. Тој не сакаше да зборува за детали, но нагласи дека барањата на Хамас мора да бидат разумни.
„Изгледа дека живеат на друга планета. Но, ако тие се симнат на Земјата и се вратат во реалноста, тогаш ќе имаме договор за заложници. Се надевам на таков исход“, изјави израелскиот премиер.
Високиот функционер на Хамас, Сами Абу Зухри, одговори дека коментарите на Нетанјаху фрлаат сомнеж во подготвеноста на Израел да постигне договор.
„Коментарите на Нетанјаху покажуваат дека тој не се грижи за успешно завршување на преговорите“, изјави Абу Зухри за „Ројтерс“ обвинувајќи го израелскиот премиер дека сака „да ги продолжи преговорите под бомбардирањето и крвопролевањето на Палестинците“.
Египетските безбедносни извори велат дека ќе има повеќе можности за разговори оваа недела во Доха по што ќе следува уште една рунда во Каиро.
Првиот прекин на огнот меѓу двете конфликтни страни се случи во ноември минатата година, при што беа ослободени речиси половина од 253-те лица што Хамас ги приведе по нападот на 7 октомври. Израел ослободи нешто помалку од 400 палестински затвореници и дозволи пристигнување поголем број хуманитарни конвои.
Израелските медиуми, повикувајќи се на неименувани официјални лица, тврдат дека се разгледува ослободување за речиси една третина од 130-те преостанати затвореници за време на шестнеделното примирје, кое ќе го вклучи и светиот муслимански месец рамазан. Сепак, ваквите наводи не се официјално потврдени од една страна.
Палестинските власти соопштија дека Хамас инсистира на прекин на израелската офанзива и повлекување на израелската армија доколку не се постигне договор. Но, израелската страна најави дека има намера да се движи кон еден од последните градови, каде што Хамас има недопрени сили.
„Работиме на ослободување на нашите киднапирани, но и на елиминирање на баталјоните на Хамас и Рафа“, рече Нетанјаху на „Фејсбук“ мислејќи на градот на крајниот југ од Газа, во близина на границата со Египет.
Оваа недела, додаде премиерот, израелскиот кабинет ќе ги одобри воените планови за Рафа, кои вклучуваат евакуација на повеќе од милион раселени палестински цивили, кои побарале засолниште таму и чија судбина ги загрижува светските сили.
Военото раководство во неделата ги претстави споменатите планови пред внатрешниот воен кабинет на Нетанјаху, кој исто така го одобри планот за влез на хуманитарни конвои во Газа, соопшти кабинетот на израелскиот премиер.
Околу 30.000 Палестинци се убиени од почетокот на војната, проценуваат здравствените работници во Газа, а Хамас уби 1.200 луѓе во Израел во напад на 7 октомври 2023 година. Покрај нив, Израел загуби 241 војник во борбите веднаш по нападот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Украина и Европа подготвуваат мировен план од 12 точки за крај на војната

Европските земји во соработка со Украина изработуваат предлог од 12 точки за запирање на војната, кој би се темелел на задржување на постојните линии на фронтот, објави „Блумберг“.
Според изворите на агенцијата, планот предвидува прекин на огнот, враќање на украинските деца депортирани во Русија, размена на заробеници, гаранции за безбедност и финансиска помош за обнова на Украина, како и забрзан пат кон членство во Европската унија.
Спроведувањето на договорот би го надгледувал мировен одбор под раководство на американскиот претседател Доналд Трамп. Санкциите кон Москва би се укинале постепено, а околу 300 милијарди евра замрзнати руски средства би ѝ биле вратени дури по прифаќањето на руската финансиска помош за реконструкцијата на Украина.
Планот засега не е финализиран и може да претрпи измени. Европски претставници оваа недела ќе отпатуваат во Вашингтон за разговори, а целта е со договорот да се отвори пат за почеток на мировни преговори меѓу Киев и Москва, наведува Блумберг.
Регион
Хрватска урива стотина дивоградби покрај брегот

Во наредните три недели на плажата Зрќе во Новалија ќе бидат урнати 124 бесправно изградени објекти, соопшти Државниот инспекторат на Хрватска, пренесе „Јутарњи“. Од нив, 119 се наоѓаат во камп, а пет се угостителски објекти изградени без дозвола надвор од градежната зона.
Инспекторатот соопшти дека отстранувањето ќе се врши на трошок на сопствениците и е проценето на околу 720 илјади евра. Акции за уривање на нелегални градби ќе има и во други делови oд Хрватска.
Од 2019 година досега во таа земја се отстранети повеќе од 2300 нелегални градби, спроведени се повеќе од 42 илјади инспекциски надзори, поднесени се 334 кривични пријави, а изречените парични казни достигнуваат 16,5 милиони евра, соопшти Инспекторатот.
Свет
„Дојче веле“: Хамас и ИСИС добиваат пари од Германија

Терористички организации како Хамас и Исламска држава добиваат финансиска поддршка од Германија преку донации собрани на социјалните мрежи, објави Дојче веле. Според истражувањето, повици за „давање богатство за џихад“ кружат на интернет, а од германски следбеници се бараат пари за оружје.
Главна фигура во мрежата на финансирање, според германските истражители, е жена од Минхен, Елиф О., која како тинејџерка заминала во Сирија и наводно сега ги координира донациите за жените-припаднички на ИСИС. Судовите веќе осудиле неколку нејзини помагачи кои собрале околу 40 000 евра.
Поради правни ограничувања, тешко е да се докаже дека конкретна донација директно финансирала терористички чин. Затоа германското министерство за правда подготвува закон со кој би се казнувал и обид за финансирање тероризам.
Според експертот за тероризам Ханс-Јакоб Шиндлер, Германија треба да го следи американскиот модел каде секоја донација кон организација од листата се смета за финансирање тероризам и се казнува со најмалку десет години затвор.
Истражувањето наведува и пример со австрискиот активист Мустафа А. од Линц, кој преку својот Телеграм-канал „Gaza Now“ собирал крипто-донации во милионски износи, дел од кои, според американската компанија Chainalysis, завршиле кај Хамас. Тој е во притвор, а САД и Британија го ставиле на своите санкциски листи уште во март 2024 година.