Свет
ОН: Израелската армија предупреди повеќе од милион луѓе во Газа да се евакуираат

Обединетите нации рано утринава соопштија дека израелската војска им кажала дека околу 1,1 милион Палестинци во Газа треба да се преселат на југ од енклавата во следните 24 часа.
„Обединетите нации сметаат дека е невозможно такво движење да се случи без катастрофални хуманитарни последици“, се вели во соопштението на портпаролот на ОН, Стефан Дујарик.
„Обединетите нации силно бараат секоја таква наредба, доколку биде потврдена, да биде поништена за да се избегне претворање на она што веќе е трагедија во катастрофална ситуација“, рече тој. Дујарик додаде дека наредбата на израелската војска се однесува и на целиот персонал на ОН и на оние што се сместени во објектите на ОН, вклучувајќи училишта, здравствени центри и клиники“, пренесува „Ројтерс“.
Израел вети дека ќе го уништи движењето Хамас што владее со Појасот Газа како одмазда за најсмртоносниот напад врз цивили во израелската историја кога стотици вооружени мажи ја преминаа границата и дивееја низ израелските градови во саботата.
Израелските власти соопштија дека бројот на загинати внатре во Израел се искачи на повеќе од 1.300. Повеќето се цивили убиени во своите домови, на улиците или на забава. Властите во Газа објавија дека повеќе од 1.500 Палестинци се убиени, а над 6.000 ранети во одмазднички израелски воздушни напади и планираат копнен напад.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Масовни протести во Шпанија против корупција

Повеќе од десетици илјади луѓе се собраа денес во Мадрид на демонстрации организирани од главната конзервативна опозициска партија, против владата на социјалистичкиот премиер Педро Санчез, обвинувајќи ја за корупција.
Демонстрантите се собраа на Шпанскиот плоштад во центарот на главниот град, велејќи му на Санчез да „поднесе оставка“.
Народната партија го свика собирот откако протечените аудио снимки наводно покажуваат дека член на Социјалистичката партија води кампања за клевета против полициска единица што истражува обвинувања за корупција, во која наводно се вклучени сопругата, братот и поранешната десна рака на Педро Санчез.
Социјалистичката членка ги негираше обвинувањата, кажувајќи им на новинарите дека спроведувала истражување за книгата и дека не работи во име на партијата или на Педро Санчез, а потоа ја напуштила Социјалистичката партија.
Лидерот на Народната партија, Алберто Нуњез Феихо, ја обвини владата за „мафијашки практики“ во аферата, тврдејќи дека Санчез е во центарот на повеќе корупциски скандали.
Народната партија процени дека повеќе од 100.000 луѓе присуствувале на денешниот митинг под слоганот „Мафија или демократија“.
Владин претставник во Мадрид процени дека на демонстрациите имало помеѓу 45.000 и 50.000 луѓе.
Свет
Тропската бура Барбара се формираше покрај брегот на Мексико

Тропската бура Барбара се формираше покрај југозападниот брег на Мексико, соопшти Националниот центар за урагани во Мајами рано утрово. Не се издадени предупредувања за крајбрежна опасност.
Брзината на ветерот беше околу 75 километри на час со повремени силни налети. Се очекува бурата да прерасне во ураган во понеделник.
Во делови од мексиканските држави Гереро, Мичоакан, Колима и Халиско можни се обилни врнежи од дожд од 5 до 10 сантиметри, а на некои места и до 15 сантиметри. Врнежите од дожд можат да доведат до поплави и лизгање на земјиштето.
Свет
Израел тврди дека бродот со активистите и Грета Тунберг нема да стигне до Газа

Израелскиот министер за одбрана Израел Кац денес изјави дека ќе го спречи бродот со хуманитарна помош што ги носи Грета Тунберг и други активисти да стигне до Појасот Газа и со тоа ќе ја прекине поморската блокада на палестинската територија, која наводно има за цел да го спречи Хамас да се здобие со оружје.
Тунберг, активистка за климатски промени, е меѓу 12-те активисти, вклучувајќи го и актерот од „Игра на тронови“, Лиам Канигкем, кои се наоѓаат на бродот, чија цел е да се стави крај на блокадата на Газа и да се достави хуманитарна помош, а воедно да се подигне свеста за растечката хуманитарна криза.
Активистите изјавија дека планираат да стигнат до Газа уште денес.
Рима Хасан, француска европратеничка од палестинско потекло, исто така е дел од тимот. Нејзе ѝ беше забранет влезот во Израел поради нејзиното противење на политиката на Израел кон Палестинците. По тримесечна целосна блокада, Израел минатиот месец почна да дозволува основна помош во Газа, но хуманитарните работници предупредија на глад доколку блокадата и војната не се прекинат.
Минатиот месец, обидот на друг брод од истата организација да стигне до Газа не успеа, откако бродот беше нападнат од беспилотни летала додека пловеше во меѓународни води крај Малта. Групата го обвини Израел за нападот, во кој беше оштетен предниот дел на бродот.