Свет
ОН: Ова е најтоплата деценија откако се вршат мерења
Деценијата во која живееме речиси со сигурност е најтопла од кога се вршат мерења, објави Светската метеоролошка организација (WMO) на климатскиот самитот на Обединетите нации во Мадрид.
Според податоците на WMO, 2019 година е втора или трета најтопла година во историјата, а периодот од 2015 до 2019 е најжешкиот петгодишен период откако постојат мерењата.
Екстремно брзото глобално затоплување без сомнение е поттикнато од емисиите на стакленички гасови.
„Не сме ни блиску до исполнување на целите од Парискиот договор“, рече генералниот секретар на WMO, Петери Теалас.
„Ако сега не преземеме итни мерки за климата, до крајот на векот ќе бидеме сведоци на пораст на просечната температура за повеќе од 3 степени“, предупреди тој.
Претставници на речиси 200 земји од светот се собраа во шпанската престолнина за да се договорат како да ги постигнат целите утврдени со Парискиот климатски договор, односно да го ограничат глобалното затоплување значително под два Целзиусови степена во однос на периодот пред индустриската револуција.
Глобалната просечна температура до октомври годинава изнесувала 1,1 степен над нивото пред почетокот на индустриската револуција на крајот од 18 век, објави WМО.
WМО го повтори неодамна изнесениот податок дека минатата година нивото на јаглерод диоксид достигнало рекордно високо ниво во атмосферата и дека годинава продолжува да расте.
Теалас рече дека податоците за WМО укажуваат оти океаните плаќаат висока цена поради глобалното затоплување, бидејќи тие апсорбираат голем дел од топлината и јаглеродниот диоксид, поради што температурата на морската вода се зголемува.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас предаде тела, Израел порачува: „Борбата за нашите заложници не запира“
Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.
Свет
Медведев го нарече белгискиот министер „имбецил“, Франкен му возврати со песна на Селена Гомез
Белгискиот министер за одбрана Тео Франкен влезе во вербален судир со поранешниот руски претседател и сегашен заменик-претседател на Советот за безбедност на Русија, Дмитриј Медведев.
Се започнало кога Франкен изјавил дека, доколку Русија ја нападне Белгија, „НАТО би ја израмнил Москва со земја“. На тоа, Медведев остро реагирал, нарекувајќи го „имбецил“ и потсетувајќи дека оваа недела Русија го тестирала нуклеарното суперторпедо „Посејдон“, кое го опишал како „вистинско оружје на судниот ден“.
Франкен утрово возвратил преку Инстаграм: „Главниот руски насилник не престанува да се заканува и навредува. НАТО не е во војна со Русија, но принципот на одмазда е неприкосновен веќе 76 години. Не повлекувам ниту збор.“
На крајот, министерот ја споделил песната „Calm Down“ од Селена Гомез со порака до Медведев – да се „смири“.
Свет
Зеленски: Новите санкции ќе ѝ донесат на Русија загуби од најмалку 50 милијарди долари годишно
Украинскиот претседател Володимир Зеленски изјави дека новите санкции против Русија ќе ѝ предизвикаат годишни загуби од најмалку 50 милијарди долари, пренесе „Укринформ“.
Тој се повика на извештај на шефот на украинската надворешна разузнавачка служба Олег Ивашченко и рече дека санкциите против нафтените компании веќе создаваат сериозни финансиски последици за Москва.
Зеленски изрази надеж дека ќе следат и нови санкциски мерки, нагласувајќи дека арапските земји со своите испораки нафта можат да спречат какви било потреси на светскиот пазар.
Тој додаде дека Украина сојузниците редовно ги информира за лица и структури што заслужуваат санкции и дека „голем дел од нашите предлози се земаат предвид“.
На 23 октомври високата претставничка на ЕУ за надворешна политика Каја Калас објави дека е одобрен 19-от пакет санкции против Русија, а американското министерство за финансии веќе воведе мерки против „Росњефт“ и „Лукоил“. Зеленски претходно изјави дека американските санкции би можеле да ги намалат руските приходи за околу 5 милијарди долари месечно.

