Свет
ОН: Планот на Израел за преземање на Газа мора веднаш да се запре

Планот на израелската влада за воено заземање на Газа ќе предизвика повеќе смртни случаи и страдања и мора веднаш да се запре, изјави шефот на Советот за човекови права на ОН, Фолкер Турк.
„Планот е во спротивност со пресудата на Меѓународниот суд на правдата дека Израел мора што поскоро да ја прекине окупацијата за да постигне решение за две држави и да го оствари правото на самоопределување на Палестинците“, вели Турк во соопштението.
Безбедносниот кабинет на Израел рано утрово одобри план за преземање на контролата врз градот Газа, додека земјата ги проширува своите воени операции и покрај растечките критики дома и во странство за разорната, речиси двегодишна војна.
„Врз основа на сè што видовме досега, понатамошната ескалација ќе резултира со поголемо присилно раселување, повеќе убиства, повеќе страдања, бесмислено уништување и криминал“, предупреди Турк.
„Наместо да ја ескалира војната, израелската влада треба да направи сè што може за да ги спаси животите на цивилите во Газа, дозволувајќи влез на хуманитарна помош. Палестинските вооружени групи треба веднаш и безусловно да ги ослободат заложниците“, додаде тој.
Фото: ЕПА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Европа се подготвува за хаос: „Опасноста е огромна“

Бурата „Алис“ може да предизвика сериозен хаос во Западна Европа, па затоа највисоко ниво на опасност е издадено за шпанската Коста Бланка.
Целиот регион е во состојба на висока тревога поради обилни врнежи од дожд.
Шпанската метеоролошка агенција AEMET вчера издаде црвено предупредување поради обилни врнежи од дожд во туристичкиот центар Аликанте, во регионот Валенсија.
⛈️🇪🇸 La DANA “Alice” golpea Alicante y Elche
Calles inundadas, autos arrastrados y alerta roja de AEMET por lluvias torrenciales que superan los 50 l/m² en una hora. Autoridades piden evitar ramblas y zonas bajas. #Alicante #Elche #DanaAlice pic.twitter.com/jCyrwHwkKb
— Global Network News 🌎 (@iluminnatii) October 9, 2025
Истото ова подрачје претрпе катастрофални поплави во октомври минатата година, во кои дури 220 луѓе ги загубија животите.
„Огромна опасност. Можни се поплави и поројни бранови. Следете ги упатствата на цивилната заштита“, објави агенцијата AEMET на X.
Бурата започнува денес во 10 часот и ќе трае до понеделник.
Метеоролозите изјавија дека вкупната количина на врнежи може да надмине 140 милиметри во период од 12 часа, особено во Валенсија.
Се очекува бурата да ги погоди и другите медитерански крајбрежни региони, вклучувајќи ја соседната покраина Мурсија и Балеарските Острови.
Според предупредувањата, обилните дождови треба да започнат околу 10 часот наутро денес и да траат до понеделник.
„Поројните дождови можат да предизвикаат локални поплави во рамничарските области, потоци и клисури, па затоа нивото на потенцијална опасност е многу високо“, се додава во соопштението.
Службите за итни случаи се во состојба на готовност и на островот Ибица, каде што е на сила портокалово предупредување поради дожд и бури, објавува „Дејли меил“.
Минатиот месец овој регион во Шпанија беше погоден и од обилни поплави.
Минатогодишната катастрофа предизвика протести од населението, кои ги обвинија локалните власти дека не издале навремени предупредувања.
Во текот на минатиот месец, овој шпански регион повторно беше погоден од обилни дождови, поради што многу училишта и универзитети беа затворени, а имаше и прекин на железничкиот и патниот сообраќај, како и локални поплави.
Фото: принтскрин
Свет
Трамп: Не ги решив војните поради Нобеловата награда

Претседателот на Соединетите Американски Држави, Доналд Трамп, денес изјави дека не ги решил војните за да ја добие Нобеловата награда за мир, туку за да спаси животи и нагласи дека нема став по прашањето за можна палестинска државност.
„Никој во историјата не ги спречил осумте војни во период од девет месеци, а јас го направив тоа. Но, тие ќе прават што сакаат. Што и да прават, во ред е. Не го направив тоа за награда. Го направив тоа затоа што спасив многу животи“, објави Гардијан.
Во исто време, Трамп изрази оптимизам во врска со решавањето на преостанатите прашања што не беа опфатени со првите фази од договорот за прекин на огнот во Газа, но нагласи дека не сака да заземе став за идната палестинска држава. „Немам став за тоа. Ќе прифатам што и да се договорат“, нагласи американскиот претседател, пренесува CNN.
Тој, исто така, објави дека ќе отпатува во Египет за официјалното потпишување на договорот за прекин на огнот меѓу Хамас и Израел и дека е поканет да зборува во израелскиот Кнесет, што и тој го прифати.
Фото: принтскрин
Регион
Русија ѝ се заблагодарува на Србија за донацијата од речиси 6 милиони долари: „Посебна симболика“

Според соопштението на руското Министерство за надворешни работи, Србија обезбедила „финансиска хуманитарна помош во вредност од 472 милиони рубли (околу 5,8 милиони американски долари)“ за регионот Курск.
Руското министерство во соопштението наведува дека, според нивните тврдења, српската влада го доделила наведениот износ како хуманитарна помош.
„Средствата се исплатени на Фондот за развој на регионот Курск, кој спроведува проекти за поддршка на најранливите групи на населението погодени од криминалните активности на режимот во Киев“, се вели во соопштението на министерството.
Москва ѝ се заблагодари на „пријателска Србија“ за „вниманието и сочувството, грижата за судбината на руските граѓани“, истакнувајќи дека овој чин носи „посебна симболика што го одразува вековното братство и блиските врски на двете земји и народи“.
Досега, официјален Белград не потврди дека е испратена каква било помош во Русија.
Србија претходно ѝ обезбеди хуманитарна помош на Украина, вклучително и откако Русија ја сруши хидроелектричната брана Каховка.
Српскиот претседател, Александар Вучиќ, исто така, изјави дека неговата земја е подготвена да учествува во обновата на еден или два украински региони.
Фото: ЕПА