Бомбаш самоубиец уби 12 војници и рани неколку други откако активираше возило полно со експлозив на безбедносен контролен пункт во северозападен Пакистан, соопштија денеска официјални лица.

Нападот, еден од најсмртоносните во последните месеци, се случи во вторникот вечерта во Бан, област во провинцијата Хајбер Пахтунхва.

Во соопштението на армијата се наведува дека во престрелка на лице место биле убиени шестмина „Хавариџ“, односно пакистански талибанци.

„Обидот да се влезе во контролниот пункт беше ефикасно спречен од нашите војници, кои принудија еден Хариџит да удри со возило натоварено со експлозив во безбедносниот пункт“, се вели во соопштението.

Украина првпат истрела британски ракети „Сторм Шадоу“ на руска територија, пишува Блумберг, повикувајќи се на извори.

Според извештајот, проектилите биле истрелани како дел од украинската офанзива, а претставници на британската влада не коментирале за конкретни операции или извештаи.

Велика Британија претходно и дозволи на Украина да ги користи споменатите ракети на нејзина територија, додека украинските власти во последните месеци побараа од САД да овозможат употреба на тие ракети за напади врз цели во Русија.

Италија, Шпанија и Грција денеска ги затворија своите амбасади во Киев поради американските информации за можен руски напад со беспилотни летала и проектили врз главниот град на Украина во текот на денот, јави украинската државна телевизија „Суспилна“.

Како што се наведува, податоците на украинското разузнавање укажуваат на можен руски комбиниран напад со беспилотни летала и ракети врз Киев, а не се смета дека потенцијалниот напад е поврзан со вчерашната промена на руската нуклеарна доктрина, пишува „Гардијан“.

Претходно утринава, САД привремено ја затворија својата амбасада во Киев поради „конкретни информации за потенцијален значаен воздушен напад“ во текот на денот, соопшти Стејт департментот.

„Како мерка на претпазливост, Амбасадата ќе биде затворена, а на вработените во неа им е наредено да се евакуираат на безбедно. Амбасадата на САД препорачува граѓаните на САД да бидат подготвени за итна евакуација во случај да биде издадена воздушна тревога“, се вели во соопштението, пренесе „Скај њуз“.

„Укринформ“ објави дека во Киев во сила е воздушна тревога и дека експлозии може да се слушнат во главниот град.

Украинската армија исто така ги предупреди граѓаните за беспилотни летала над Киев и беа активирани системите за противвоздушна одбрана.