Свет
Папата Лав XIV на првата миса: Технологијата, моќта и задоволството се некаде поважни од верата

За време на првата миса, папата Лав XIV изрази жалење поради фактот што во многу делови од светот технологијата, парите, успехот, моќта и задоволството се повредни од христијанската вера, која, како што предупреди, на многу места се смета за апсурдна, наменета за слабите и за неинтелигентните.
Новиот папа истакна дека верниците често се изложени на потсмев, предизвици, презир – или во најдобар случај – само се толерирани и сожалувани.
Тој додаде дека Исус сè повеќе се сведува на некаков харизматичен лидер или суперхерој и предупреди дека тоа не се случува само меѓу неверниците, туку и меѓу крстените, кои, според него, го живеат својот живот во состојба на практичен атеизам.
Папата ја почна мисата со обраќање на англиски јазик велејќи како Господ направил чудесни дела.
„Додека денес славиме заедно, ве повикувам да ги прославиме чудата што Господ ги направи и благословите што тој продолжува да ги излева врз нас“, рече тој.
Папата истакна дека бил повикан да ја прифати оваа мисија од службата на свети Петар.
„Знам дека можам да сметам на секој од вас да оди со мене“, заклучи папата Лав XIV.
„Затоа што ние сме народот што Бог го избра како свој за да ги објави чудесните дела на оној што нè повика од темнината во својата прекрасна светлина“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ и Путин разговарале по обвинувањата дека Србија ја снабдува Украина со оружје

Коментирајќи ги обвинувањата од Русија дека српските воени компании ги снабдуваат Украинците, српскиот претседател Александар Вучиќ рече дека за ова прашање разговарал приватно со рускиот претседател Владимир Путин. Тој додаде дека е формирана комисија која ќе ја испита вистинитоста на тие обвинувања.
„Не би ги открил деталите од разговорот со Путин. Формиравме работна група заедно со нашите руски партнери за да ги утврдиме фактите“, посочи тој. Вучиќ тврди дека е точно дека има договор со Чешка, но наведува дека не се издадени дозволи и дека не се испорачани ракети.
„Русите имаат добра поговорка: Колку повеќе се чеша и колку повеќе се мие, враната е се’ поцрна. Така е и тука, кога си независна земја, сите те напаѓаат“, предупреди тој. Се пожали дека претходно бил нападнат поради наводен извоз на оружје во Русија.
„Нашите фабрики мора да живеат и работат“, нагласи тој. Праша каде Србија да го извезува оружјето ако не може во Африка, САД, Азија, Русија и Европа.
„Од друга страна, тоа го научив политички“, рече тој, додавајќи дека оние кои велеле дека е руски шпион сега велат дека работи за други.
„Ние сме независна земја која е на европскиот пат, но која имаше храброст да го испрати својот највисок претставник на парадата во Москва и да се спротивстави на ужасниот притисок“, нагласи тој. Смета дека е важно сите да ја почитуваат Србија.
Свет
Франција го забрани пушењето околу сите образовни установи, плажи, паркови, автобуски постојки

Француската влада соопшти дека од 1 јули ќе биде забрането пушењето на отворени јавни места каде што може да се наоѓаат деца, како што се плажи, паркови, околу училишта, автобуски постојки и спортски објекти.
„Каде што има деца, тутунот мора да исчезне“, рече министерката за здравство и семејни прашања Кетрин Вотрин во интервју за регионалниот весник Ouest-France.
Таа изјави дека казната за непочитување на забраната ќе биде 135 евра и посочи дека „слободата за пушење завршува таму каде што почнува правото на децата да дишат чист воздух“.
Освен за градинките и основните училишта, забраната ќе важи и за средните и високите училишта, особено со цел учениците да не пушат пред нивните училишта.
Сепак, забраната нема да ги опфати кафулињата, ниту електронските цигари.
Министерката за здравство изрази желба да се намали „дозволеното ниво на никотин“ во електронските цигари и да се ограничи опсегот на вкусови.
„Потребен ми е научен и технички совет за да се утврдат деталите“ на тие мерки, кои треба да стапат во сила „до крајот на првата половина на 2026 година“, рече министерката.
Широкото воведување простори без чад, како што најави министерот Вотен, е една од мерките наведени во Националната програма за контрола на тутунот 2023-2027 година со цел да се создаде „генерација на непушачи“ до 2032 година.
Според истражувањето спроведено од Лигата против ракот, 62 отсто од Французите се за поширока забрана за пушење на јавни места.
Се проценува дека пушењето предизвикува 75.000 смртни случаи годишно во Франција.
Свет
Од гениј до разочарување: Како пропадна сојузот меѓу Трамп и Маск

Илон Маск влезе на политичката сцена како помошник на претседателот на САД, Доналд Трамп, држејќи моторна пила в рака, потсетува француската новинска агенција АФП, откако Макс најави повлекување од администрацијата.
Трамп го нарече Маск одличен и најави дека во петок ќе одржат заедничка прес-конференција, откако јужноафриканскиот магнат ќе го напушти таканаречениот Оддел за ефикасност на владата (DOGE).
„Ова ќе му биде последен ден, но не и навистина, затоа што секогаш ќе биде со нас и ќе ни помага на секој чекор“, објави Трамп на својата мрежа Truth Social во четвртокот.
Сѐ поголеми фрустрации
Но топлите зборови не можеа да ги сокријат отворените фрустрации што Маск, најбогатиот човек на светот, ги изразуваше последните недели околу својата контроверзна улога во намалувањето на државните трошоци.
Некогаш незаобиколен дел од тимот на републиканецот Трамп, Маск почна сѐ повеќе да се разочарува од пречките со кои се соочува DOGE, и покрај тоа што брутално ја намалуваше американската бирократија.
Наместо најавената заштеда од 2 билиони долари, списанието The Atlantic пресмета дека DOGE заштедил само илјадити дел од таа сума, иако десетици илјади вработени биле отпуштени.
Маск сега ќе се фокусира на SpaceX и Tesla, како и на својата цел – колонизација на Марс.
Ракетен подем со Трамп
На почетокот, сѐ изгледаше поинаку. Маск се издигнуваше низ Трамповата орбита со брзина на една од неговите ракети – иако, како што знаеме, некои од нив експлодираа.
Тој беше најголемиот донатор за трамповата изборна кампања во 2024 година, а ги поврзуваше десничарската политика и заедничката желба да ја искоренат т.н. „длабока држава“.
DOGE беше шеговито именуван по криптовалутата Doge, но самата институција не беше шега. Млади технолошки „волшебници“ затворија цели владини оддели, а некои странски држави останаа без помош преку ноќ.
Маск, со очила за сонце и моторна пила, на конзервативен настан се пофали колку е лесно да се заштеди пари – дури направи гест што кај некои предизвика асоцијации на нацистички поздрав.
„Копретседател“
Критичарите го нарекоа „копретседател“, бидејќи постојано беше покрај Трамп. На една прес-конференција во Овалната соба се појави со својот мал син. Присуствуваше на седници на кабинетот, леташе заедно со Трамп, и гледаа ММА борби заедно.
Многумина се прашуваа: колку долго можат да коегзистираат две толку големи ега?
Но, Трамп остана лојален на генијот, како што го нарекуваше Маск. Во еден момент дури ја претвори Белата куќа во pop-up Tesla салон, откако демонстранти ја нападнаа фабриката на Маск.
Почеток на крајот
Сепак, Маск тешко се снаоѓаше со американската политика.
„Почетокот на крајот започна во март, кога Маск се скара на неколку состаноци во Белата куќа“, изјави за „АФП“ Елејн Камарк од Brookings Institution.
Најголема караница, велат, се случила со министерот за финансии Скот Бесент, а Маск јавно го нарекол советникот Питер Наваро „поглуп од вреќа тули“.
Ниту автократскиот стил на Маск, ниту мантрата на Силиконската долина „движи се брзо, руши сѐ пред себе“ не функционираа во Вашингтон.
Удар врз бизнисот
Неговите бизниси исто така почнаа да трпат. Неколку неуспешни лансирања на SpaceX, гневни акционери на Tesla – и Маск почна да размислува за повлекување.
Изјави дека „DOGE е начин на живот, како будизам“, кој ќе продолжи и без него.
Крајот дојде кога Маск, на својот социјален медиум „Икс“, објави дека е разочаран од трамповиот нов закон за масовна потрошувачка и дека нема повеќе да се занимава со политика.
Но, можеби тоа не е крајот.
„Мислам дека тие искрено се сакаат“, вели Камарк.
„А и Маск има многу пари – ако биде поттикнат, повторно може да се вклучи. Мислам дека нивниот однос ќе продолжи.“