Свет
Папата патува на Арктикот, каде што ќе им се извини на Ескимите за сексуалното малтретирање деца

Папата Франциско денеска патува на Арктикот на крајот од својата кампања во Канада, каде што ќе се сретне со Инуитите, кои очекуваат и извинување за сексуалната злоупотреба на децата во интернатите.
Папата, кој има 85 години, ќе го одржи својот последен говор во Квебек во петок наутро пред да одлета за Икалуит, главниот и најголем град на територијата Нунавут.
Пристигнувањето во тој дел од арктичкиот архипелаг, чие име значи „место каде што има многу риби“, е можно само со авион. Има нешто повеќе од 7.000 жители, главно домородни луѓе. Жителите на Икалуит, град со куќи во светли бои сместени на карпи со поглед на морето, од самиот почеток внимателно го следат престојот на папата во Канада.
Папата во градското училиште ќе се сретне со преживеаните домородци што се школуваа во католичките интернати, каде што ќе го одржи својот последен говор.
„Полесно ми е по она што се случи, по извинувањето“, вели Карол Маблик (17), која сепак признава дека нејзините емоции се измешани.
„Тоа нема да реши ништо, но извинување пред целиот свет значи многу за нас“, рече Елисапи Нушота (36).
Простувањето за злото извршено врз домородното население што го побара папата во понеделникот во Алберта, на запад, во близина на поранешен интернат, симбол на децениската присилна асимилација на првите нации, беше оценета како историски настан. Но, многу членови на домородната заедница потсетуваат дека има уште многу да се направи и дека ова е само почеток на долгиот процес на лекување.
„Тие треба да направат повеќе, да организираат установи за терапија и ментално здравје“, изјави за АФП, Израел Маблик (43), кој се школувал во католички интернат. Од крајот на 19 век до 90-тите околу 150.000 луѓе од Инуитите, Метисите и првите нации беа насилно одведени во повеќе од 130 такви институции, отсечени од своите семејства, јазик и култура.
Многу од нив биле физички и сексуално малтретирани, а илјадници никогаш не се вратиле, умираат од болести, неисхранетост и запоставување. Во Икалуит многумина очекуваат јасен одговор од папата на обвинувањата против свештеникот Јоханес Ривоар, кој за многумина е симбол на неказнивост на сексуалните предатори во Црквата.
По тој француски свештеник, кој помина три децении на крајниот север на Канада, беше распишана потерница, но до сега не беше во центарот на вниманието на надлежните служби. Тој ја напушти Канада во 1993 година и живее во Лион, Франција.
Претседателот на организацијата, Нунавут Тунгавик, која ги застапува Инуитите во областа Киликвак Каблона смета дека „извинувањето на папата не е целосно“.
„Би сакале Ривоар да биде екстрадиран во Канада за да се соочи со обвиненијата на суд и побаравме од папата да интервенира во тој поглед“, додаде таа.
Духовниот поглавар на 1,3 милијарда католици, кои ги посети западна Канада и Квебек пред да дојде на Арктикот, се движи во инвалидска количка поради болки во десното колено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Силна бура го парализираше црногорското приморје, најкритично во Котор

Силна бура го погоди црногорскиот приморски појас утрово, оставајќи го Котор и околните градови под тежок пороен дожд. Которскиот Залив е целосно погоден од силниот дожд и ветрови, а морето е разбрането, со големи бранови кои се спојуваат со сивото небо.
Туристите, кои вчера уживале во пливање, денес се соочуваат со потполно нестабилни услови.
„Колку и да уживавме во пливањето вчера, денес можеме да пливаме на улица“, изјавил еден од нив.
Ситуацијата е особено критична во близина на Вирпазар, каде што сообраќајот е прекинат поради несреќа, објави РТЦГ. Локалните власти апелираат на внимание и ги советуваат граѓаните да ги следат предупредувањата за безбедност.
Регион
(Видео) Драма на скопскиот аеродром: Aвион од Крит со 200 лица слета во Скопје наместо во Белград

Патници на авиокомпанијата „Виз ер“ кои требаше да летаат од Крит за Белград, наместо тоа завршија на аеродромот во Скопје околу 4 часот утрото, пренесува N1.rs.
Летот, кој бил закажан 15 минути по полноќ, првично бил пријавен како празен, што ги изненадило и полицијата и вработените на скопскиот аеродром.
Јелена, една од патничките, изјавила дека околу 200 лица излегле од авионот, без претходна информација за пренасочувањето. Патниците најпрво добивале СМС-пораки за одложување, а потоа, во 4:20 часот, полетале кон Скопје. На аеродромот биле задржани во авионот подолго време, а не им било дозволено да излезат сè додека една жена не почувствувала влошување на здравјето. На крајот, патниците останале на празен аеродром додека не им бил обезбеден автобус за Белград.
Пилотот им појаснил дека неговото работно време е завршено и дека повеќе информации ќе добијат на аеродромот, но и таму вработените биле целосно збунети бидејќи им било пријавено дека авионот е празен. Патниците се обратиле и до Амбасадата на Србија, но добиле одговор дека не може ништо да се стори, со образложение дека „аеродромот во Белград не работи и не прима авиони“.
Според официјалните информации, веб-страницата на белградскиот аеродром го прикажува летот како откажан, додека на македонскиот аеродром е евидентиран како реализиран, но со задоцнување од повеќе од три часа. На веб-сервисот FlightRadar се забележува дека авионот наместо во Белград, слетал во Скопје, без објаснување за причините.
Свет
(Вознемирувачко фото+видео) Пукање среде ден во Лавов, убиен Андриј Парубиј, херојот на Евромајдан

Поранешениот претседател на Врховната рада и една од клучните фигури на револуцијата на Евромајдан, Андриј Парубиј беше убиен со огнено оружје во својот роден град Лавов.
Националната полиција соопшти дека пукотници одекнале околу пладне во јужниот дел на градот, во округот Франкивски. Жртвата починала на лице место, и покрај брзата реакција на службите за итна помош.
Првите информации беа потврдени од пратеничката Ирина Херашченко, која за „Киев Индепендент“ изјави дека убиениот политичар е токму Парубиј.
Неколку часа подоцна, украинскиот претседател Володимир Зеленски соопшти:
„Министерот за внатрешни работи и главниот државен обвинител ме информираа за првите околности на страшното убиство. Убиен е Андриј Парубиј. Изразувам длабоко сочувство до неговото семејство и најблиските“.
Зеленски додаде дека сите потребни ресурси се вклучени во истрагата и во потрагата по сторителот. Засега, властите не соопштуваат детали за можни осомничени или за мотивот на злосторството.
Парубиј важеше за еден од симболите на отпорот и демократските промени во Украина, особено по неговата улога во протестите на Евромајдан и неговото политичко лидерство во најкритичните години на државата.
Случајот предизвика силни реакции низ цела Украина, со бројни пораки на осуда и повици за брзо расветлување на убиството.