Американскиот претседател Доналд Трамп вели дека не може да каже дали Владимир Путин сака крај на војната во Украина, но најави дека ќе дознае за околу две недели.

„Моите пораки до Русија зборуваат гласно“, рече Трамп и предупреди дека ќе реагира поинаку ако открие дека Путин само го завлекува.

„Наскоро ќе дознаеме дали нè користи или не, а ако нè користи – ќе реагираме малку поинаку“, им рече Трамп на новинарите пред Белата куќа.

Тој додаде дека е разочаран од она што се случува во Украина, повторувајќи ги критиките упатени кон Русија по големите ракетни и беспилотни напади минатиот викенд.

На прашањето зошто сè уште не вовел санкции кон Русија, Трамп одговори дека не сака да ја уништи шансата за мировен договор, додавајќи дека е подготвен да седне со украинскиот претседател Володимир Зеленски и со Владимир Путин, доколку е потребно.

Русија денеска и предложи на Украина датумот и времето на новата рунда преговори, тоа е 2 јуни и повторно во Турција.

Францускиот суд денеска го осуди пензионираниот хирург Жоел ле Скварнек на 20 години затвор за силување и сексуално злоставување на стотици пациенти, од кои многумина биле деца, често додека биле под анестезија или додека се буделе по операциите, објави „Франс 24“.

Пензионираниот хирург Жоел ле Скварнек (74) призна дека сексуално злоставувал стотици пациенти во текот на повеќе од две децении, во еден од најголемите случаи на сексуална злоупотреба на деца во Франција.

Скварнек веќе е во затвор откако во 2020 година беше осуден на 15 години за силување и сексуално злоставување на четири деца, вклучително и две од неговите внуки.

На судењето за силување на пациенти, кое почна во февруари, тој призна дека сексуално нападнал или силувал 299 пациенти, од кои 256 биле помлади од 15 години, во болниците во западна Франција помеѓу 1989 и 2014 година. Тој беше обвинет за 111 силувања и 189 сексуални напади.

Жртвите, кои беа застапувани од 60 адвокати, и застапниците за правата на децата рекоа дека случајот на хирургот ги истакна системските пропусти што му дозволија на Ле Скварнек постојано да врши сексуални злосторства.

Во пресрет на вториот круг од претседателските избори, Полска ја тресе голем скандал. Конзервативниот претседателски кандидат Карол Навроцки го обвинуваат дека во младоста имал врски со подземјето.

Имено, сајтот Онет, најчитаниот сајт на весници во Полска, го обвини Навроцки дека додека работел во службата за безбедност и заштита на хотел, наводно учествувал во регрутирање проститутки за клиенти за време на нивниот престој.

Полскиот националист ги отфрли сите наводи, додека новинарите во својот напис цитираа две личности кои тогаш биле блиски со него.

Навроцки отиде чекор подалеку и рече дека ќе ја тужи страницата. Во исто време, Георге Симион, романски политичар, кој е во Варшава и присуствува на конгрес на конзервативците, ги нападна сите медиуми во Полска, обвинувајќи ги за објавување лажни вести.

Според веб-страницата Онет, Навроцки наводно учествувал во процесот на носење проститутки на гостите на хотелот Гранд во Сопот, каде што работел како обезбедување. Ова го тврдат неговите колеги од обезбедувањето со кои тој тогаш работел.