Американскиот претседател Доналд Трамп ќе биде домаќин на лидери од пет африкански земји во Вашингтон следната недела за да разговараат за „трговските можности“, изјави функционер од Белата куќа.

Трамп ќе биде домаќин на лидерите на Габон, Гвинеја-Бисао, Либерија, Мавританија и Сенегал на разговори и ручек во Белата куќа на 9 јули, изјави функционерот.

„Претседателот Трамп верува дека африканските земји нудат неверојатни трговски можности што им користат на американскиот народ, како и на африканските партнери“, рече функционерот, објаснувајќи ја причината за состанокот.

Американската администрација го намали поголемиот дел од американската странска помош за Африка како дел од планот за намалување на трошоците што ги смета за расипнички и несогласни со политиките на Трамп „Америка на прво место“, за кои тој вели дека сака да се фокусира на трговијата и инвестициите.

Во вторник, државниот секретар Марко Рубио изјави дека САД се оддалечуваат од она што го нарече модел на странска помош базиран на добротворни цели и дека ќе им дадат предност на оние земји што покажуваат „и способност и волја да си помогнат самите себеси“.

Американските претставници во Африка ќе бидат оценувани според трговските договори што ќе ги постигнат, изјави во мај Трој Фитрел, висок функционер во Канцеларијата за африкански прашања, опишувајќи го тоа како нова стратегија за обезбедување помош на континентот.

Израелскиот министер за национална безбедност Итамар Бен Гвир изјави дека нема да го поддржи предлогот за договор за прекин на огнот и ослободување на заложниците бидејќи го смета за „неодговорен и штетен“.

Бен Гвир го повика министерот за финансии Безалел Смотрич и неговата партија, заедно да го „торпедираат и потонат“ договорот со Хамас, повикувајќи на гласање против неговата потврда во израелската влада.

„Нема да дозволам да се склучи овој неодговорен договор. Се надевам дека Смотрич ќе ми се придружи. Избрани сме со 14 мандати од луѓе кои не сакаат да се предадеме во Газа“, рече Бен Гвир.

Според него, Израел има „историска можност“ да победи во Газа и е убеден дека со потврдување на договорот и суспендирање на воената операција, владата ќе ја „згази“ таа можност.

„Не смееме да ја запреме војната без победа. Што мислите дека ќе се случи ако застанеме сега? Дека Хамас ќе дели цвеќе“, праша тој.

Неговите радикални ставови се дополнително потврдени со изјава во која тој тврди дека најголемиот пораз на израелската армија е тоа што хуманитарната помош беше дозволена да влезе во Појасот Газа.

„Беше огромна грешка што дозволивме повторно да влезе помош на крајот на мај по речиси тримесечна целосна блокада. Срам ми е што бев единствениот член на кабинетот кој гласаше против тоа. Ако сакаме да победиме, мора да одиме до крај“, заклучи Бен Гвир.

Петнаесет лица се повредени кога авион за падобранство скршнал од пистата и се урнаl во шумата во близина на аеродром во јужен Њу Џерси, соопштија властите во среда вечерта.

Инцидентот се случил на аеродромот околу 34 километри југоисточно од Филаделфија, кога авионот, кој превезувал 15 лица, излетал од пистата, според портпаролката на Федералната администрација за воздухопловство, која моментално истражува, како што објави АП.

Три лица биле пренесени во трауматолошкиот центар на болницата во Камден, Њу Џерси, додека осум лица со полесни повреди биле примени во одделот за итни случаи, изјави портпаролката на болницата Венди Марано.

Одделот за итни случаи на округот Глостер ја предупреди јавноста на својата Фејсбук страница да ја избегнува областа за да можат службите за итни случаи да пристапат до местото на несреќата.