Жителите на три згради во 19-тиот арондисман во Париз не смеат да користат топла вода во изминатиот месец, откако во нивниот систем за топла вода е откриено покачено ниво на бактерија легионела, која предизвикува легионерска болест, објави денеска телевизијата БФМ.

Предупредувањето се однесува на 488 станови, кои оттогаш не смеат да користат топла вода за туширање или одржување хигиена во домаќинствата.

Легионерската болест е сериозна инфекција на белите дробови, која се пренесува на луѓето преку респираторниот тракт, со вдишување на микрокапки и аеросоли од контаминирана топла вода.

Луѓето кои веќе имаат хронична болест, пушачите, лицата со ослабен имунитет и повозрасните се изложени на поголем ризик од инфекција со овие бактерии. Смртноста на пациентите е 5-10%.

Изложеноста на легионела не секогаш води до болест. Секоја година, повеќе од 1.000 патници се заразуваат со оваа болест, но ризикот од легионерска болест во сместувачките капацитети може да се намали.

Легионерската болест се пренесува со вдишување на микроскопски капки вода (аеросоли) кои содржат бактерии од родот Legionella кои живеат во вода и се размножуваат во соодветни услови – во застоена вода на температура од 20 °C до 50 °C. Аеросоли во кои е присутна легионела може да се создадат, на пример, кога тече вода од чешма или туш, кога се создаваат меурчиња во водата во хидромасажни базени или преку некои системи за климатизација.

Температурата на водата помеѓу 20°C и 50°C обезбедува поволни услови за развој на легионела.

Ризични места се: цистерни или резервоари за топла или ладна вода, цевки со мал или никаков проток на вода, бигор, корозија и нечистотија на внатрешните површини на цевките, резервоарите, тушевите и славините.

Симптомите на болеста обично започнуваат два до десет дена по изложувањето, а во ретки случаи, потребни се и до три недели за да се развијат.

Најчести симптоми на болеста се: висока температура, треска, главоболка и болки во мускулите.

После тоа, се појавува сува кашлица и проблеми со дишењето кои можат да прераснат во тешко воспаление на белите дробови, често се јавува дијареа или повраќање, а половина од заболените доживуваат конфузија или делириум. Повеќето пациенти имаат потреба од болничко лекување со соодветни антибиотици.

Украинскиот претседател Володимир Зеленски денеска изјави дека има добри шанси да се стави крај на војната со Русија, откако Украина и Америка предложија 30-дневен прекин на огнот, на кој Москва рече дека ќе се согласи само доколку се исполнат одредени услови.

Зеленски истакна дека рускиот претседател Владимир Путин ќе се обиде да ги одложи преговорите за прекин на огнот и ги повика Америка и другите сојузници на Украина да извршат притисок врз Русија, пренесува Ројтерс.

По разговорите во Џеда, Украина го прифати предлогот на САД за 30-дневен прекин на огнот, а Путин рече дека начелно се согласува со предлогот, но дека „има нијанси“, пренесува Танјуг.

Генералниот секретар на НАТО Марк Руте денеска повика на нормализација на односите со Русија по завршувањето на војната во Украина.

„Нормално е, ако војната некако престане, Европа, чекор по чекор, а исто така и САД, чекор по чекор, да ги обноват нормалните односи со Русија“, рече Руте во интервју за ТВ Блумберг.

Сепак, тој посочи дека се уште не е време за тоа и дека е неопходно да се продолжи притисокот врз Русија за Москва „сериозно да ги сфати преговорите“.

„Мораме да продолжиме да ги притискаме за да се увериме дека се подготвени сериозно да се вклучат во разговори со американската администрација и, се разбира, со Украинците“, рече Руте, пренесува Танјуг.

Блумберг наведува дека најважната задача на Руте е да го одржи ангажманот на САД во НАТО, додека американскиот претседател Доналд Трамп се заканува дека ќе ја повлече таа земја од Алијансата бидејќи, како што наведува, другите членки не одвојуваат доволно средства за одбрана.

Се забележува дека еден од најголемите адути на генералниот секретар на НАТО е неговиот добар работен однос со Трамп, кој беше воспоставен за време на првиот мандат на Трамп во Белата куќа, кога Руте беше премиер на Холандија, анализираат медиумите.

Откако дојде на чело на НАТО, Руте ги зголеми инвестициите во одбраната и трошоците, а Алијансата ќе се обиде да ги зголеми целните трошоци на членките за одбрана на најмалку три проценти од БДП на следниот самит во јуни. Трамп побара од сојузниците да издвојат пет отсто од БДП за одбраната.