Свет
Полска ги обвини руските контролори на летање за намерно уривање на авионот на Качински
Во бизарен пресврт на настаните полските обвинители сега бараат апсење на тројца руски контролори на летање од аеродромот во Смоленск, кои ги обвинуваат за намерно предизвикување на несреќата, во која загина поранешниот претседател Лех Качински во 2010 година, пренесува РТ.
Истражителите поднеле барање до Окружниот суд во регионот Варшава-Мокотов со предлог за привремено апсење на тројцата контролори, вели Ева Бијалик, портпарол на канцеларијата на јавниот обвинител.
„Обвиненијата поведени против контролорите на летање се однесуваат на намерно предизвикување на авионската несреќа, која резултира со смрт на многу луѓе“, додаде таа.
Качински и неговата сопруга беа меѓу 96-те лица во авионот на полското воено воздухопловство „Ту-154М“ што се урна пред Смоленск, во западна Русија, на 10 април 2010 година при обид да слета во густа магла. Патувањето беше дел од обидот на тогашниот руски претседател Дмитриј Медведев за средување на одосите со Варшава.
Првичните истраги и од полски и од руски официјални лица не утврдија технички проблем со леталото и посочија дека станува збор за пилотска грешка. Во тоа време полските власти открија сериозни проблеми со организацијата и стандардите на вклучената единица на воздухопловните сили, која потоа беше распуштена.
Сепак, братот близнак на претседателот, Јарослав Качински, уште од тогаш тврди дека несреќата е предизвикана од некаква руска перфидност. Полските и меѓународните истраги не пронајдоа докази што ги поддржуваат неговите тврдења.
Како и да е, неговите тврдења се чини го привлекоа полското јавно мислење бидејќи истражувањето објавено на почетокот на годинава покажа дека 44 отсто од Полјаците сметаат оти авионската несреќа е најголемото актуелно прашање меѓу Варшава и Москва.
Иако во моментот нема политичка функција, Јарослав Качински е претседател на владејачката ултранационалистичка партија Закон и правда (ПиС), која е на власт од 2015 година. Тековните обвиненија против руските контролори на летање се засноваат на тврдење на полски истражители од 2018 година дека во остатоците се пронајдени траги од експлозив. Сепак, такви докази не се пронајдени за време на оригиналната истрага ниту во примероците на почвата собрани во тоа време.
Несреќата во Смоленск беше голем удар врз обидите за поправање на полско-руските односи. Качински требаше да присуствува на комеморацијата на советското убиство на полските војници во Катинската шума за време на Втората светска војна.
Во владеењето на ПиС, Полска повеќепати се судри со Русија на дипломатско ниво и ги повика членките на НАТО трајно да стационираат војници на нејзина територија. Сепак, Варшава водеше и многубројни политички битки со ЕУ, која се спротивстави на политиките на ПиС, што беа во судир со вредностите официјално прифатени од Брисел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Украина демантира вмешаност во атентатот врз рускиот генерал
Украина не стои зад обидот за атентат врз генерал-полковник Владимир Алексеев, прв заменик-шеф на руската воена разузнавачка служба (ГРУ), изјави заменикот на украинскиот министер за надворешни работи, Андриј Сибиха, за „Ројтерс“.
„Не знаеме што точно се случи со тој генерал, можно е да станува збор за внатрешен конфликт во Русија“, изјави Сибиха.
Изјавата уследи откако руската Федерална служба за безбедност (ФСБ) објави дека Украина стои зад нарачката за обидот за убиство. Според ФСБ, осомничениот напаѓач, кој пукал во генералот во Москва, бил уапсен во Дубаи и идентификуван како Љубомир Корба – руски државјанин роден во украинскиот регион Тернопил. Наводно, тој делувал по налог на украинската служба за безбедност и веќе бил екстрадиран во Москва.
ФСБ тврди и дека идентификувала двајца соучесници – руски државјани. Едниот, Виктор Васин, бил уапсен во Москва, а другата, Зинаида Серебрицкаја, побегнала во Украина.
Истражувачкиот новинар од „Инсајдер“, Христо Грозев, објави дека Васин работел за фирма поврзана со ФСБ, која произведува надзорни алатки. Според него, станува збор за компанијата „НТЦ Атлас“, подружница на државниот воено-индустриски гигант Ростех.
Алексеев, роден во 1961 година во тогашна советска Украина, е прв заменик-шеф на ГРУ од 2011 година. На 6 февруари Кремљ потврди дека бил нападнат со огнено оружје, а ден подоцна државните медиуми објавија дека преживеал операција и е во свест.
САД му воведоа санкции во 2016 година за организирање на сајбер напади за време на претседателските избори во кои победи Доналд Трамп. Бил и одликуван со титулата Херој на Руската Федерација.
Алексеев го обвинуваа и Велика Британија и ЕУ за организирање на нападот со хемиско оружје врз двојниот агент Сергеј Скрипаљ и неговата ќерка во Солсбери, 2018 година.
Свет
Захарова: Неуспесите на бојното поле Киев ги заменува со терористички напади врз Русите
Портпаролката на руското Министерство за надворешни работи, Марија Захарова, изјави дека, свесен за сопствената неспособност да постигне резултати на фронтот, „киевскиот режим“ ги надоместува неуспесите со терористички напади врз цивили во Русија.
„Онаму каде што сфаќаат – а секако сфаќаат – дека не можат да постигнат резултати на бојното поле, тие неуспеси ги компензираат со терористички напади врз цивили и цивилна инфраструктура“, изјави Захарова за телевизијата „Русија 1“, пренесе ТАСС.
Таа нагласи дека Русија отсекогаш ги гледала таквите напади како дел од хибридната војна што, според неа, ја води Киев.
Свет
Оставка во кабинетот на британскиот премиер поради поврзаност со Епстин
Шефот на кабинетот на британскиот премиер Кир Стармер, Морган Максвини, денеска соопшти дека поднел оставка, откако признал дека дал совет за назначување на Питер Менделсон за амбасадор во САД — лице што било во комуникација со осудениот сексуален престапник Џефри Епстин.
Според „Ројтерс“, Менделсон бил именуван во 2024 година, но објавените досиеја на американското Министерство за правда откриваат обемна комуникација меѓу него и Епстин. Тоа предизвика најголема политичка криза за Стармер од неговото доаѓање на власт.
Максвини, еден од најблиските соработници на премиерот, призна дека бил директно вклучен во процесот и изјави:
„Одлуката за именување на Питер Менделсон беше погрешна. Тој ѝ нанесе штета на нашата партија, на земјата и на довербата во политиката. Преземам целосна одговорност за тој совет.“

